去Party被猛男包圍 何志平胡慧中愛女何嘉珍 傳唔做TVB轉行做PR?

前民政事務局長何志平同台灣息影女星胡慧中嘅22歲獨女何嘉珍(Jasmin)，月前被爆同喺內地經營網店嘅梁勇拍拖，但係戀情曝光後極速分手，梁勇之後仲拍片控訴，被何嘉珍玩弄感情。

沉寂一輪之後，何嘉珍日前出席派對，仲同有「天下第一關」之稱嘅公關公司老闆鄭紹康合照，旁邊更加企咗幾位爆肌男，相當開心。有報導指，早前喺TVB做兼職嘅何嘉珍，已經離開大台，轉投鄭紹康嘅公關公司，但消息暫未能證實。

今年9月，梁勇喺個人社交平台post咗同Jasmin拍拖嘅照片，又寫道「每天生活超甜蜜的」。梁勇帶女友返老家，又post過同胡慧中合照，拍拖無耐就互訪見家長，似乎發展得幾好。殊不知戀情「見光死」，Jasmin回應網友留言時，聲稱已經分手，由放閃到分開只係前後3日。梁勇回應網民嘅負評時，強調自己冇駛女友錢，認為「我還算是有骨氣的人」，又澄清結識Jasmin時唔知對方家底。有人踢爆梁勇參加過內地配對節目《非誠勿擾》，同參加嘅女嘉賓成功配對，但係節目出街後又話自己單身，梁勇之後澄清上《非誠勿擾》係去年12月嘅事。唔少人見梁勇感情狀況「彈出彈入」，加上Jasmin係名人之後，都擔心女方俾人呃。但係梁勇之後拍片控訴，被何嘉珍玩弄感情！

梁勇拍片回應分手內情，提到因為同何嘉珍交往而被狠批，強調自己冇駛過女友嘅錢，最多都係收過一頂幾十蚊嘅帽，反而係Jasmin成日要梁勇送禮物。梁勇又不滿，當日被指係「軟飯王」時，何嘉珍唔止冇幫口，仲鬧埋一份。梁勇話要公開二人對話紀錄，何嘉珍先至回覆話考慮幫手澄清。最爆嘅係，梁勇聲稱何嘉珍講大話，話自己未拍過拖，後來何一時口疏自爆拍過三次拖！梁覺得被玩弄感情，所以決定公開真相。

至於何嘉珍未有回應梁勇所講嘅一切，相反仲繼續活躍玩社交媒體。微博以外，何嘉珍原來都有玩IG，佢嘅自我介紹入面有提到自己做過TVB劇《新四十二章》同《回歸》嘅臨記。何嘉珍又同網友玩「你問我答」，提到自己職業係「學生and part time TVB la」，有指當時何嘉珍喺TVB新聞部做兼職。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！