又話有仔趁嫩生？娛樂圈8位高齡產婦

恭喜關心妍順利生下B女，不過原來36歲嘅佢己經屬於高齡產婦，所以醫生都要佢調節飲食，控制飲食。其實35歲或以上生BB就屬於高齡產婦，患上妊娠高血壓或妊娠糖尿病機會、出發併發症機會都高好多架。

不過，原來圈中都有唔少高齡產婦，一齊睇吓呢8位：

關心妍－36歲

關心妍（Jade）同老公楊長智結婚7年，婚後一直努力造人，不過由於頭2年仲算後生，所以無心急過去造B。但開始踏入33歲，擔心自己會成為高齡產婦，而兩老婆又好想有細路，所以Jabe喺2013年全面停工積極造人，但都唔成功。之後試盡中西醫秘方食療，點知都係唔得。最後反而無刻意做過咩，仲開埋演唱會chur到盡，反而就成功懷孕，近日仲順利剖腹產B女添～

梁詠琪－38歲

梁詠琪（Gigi）同西班牙籍老公Sergio於2011年結婚後一直努力造人，佢兩個都好鍾意小朋友，又想生返兩、三個，心知年紀越大越高風險。所以Gigi睇中醫調理身體，但係越焦慮反而唔得。結婚3年，老公想Gigi放鬆心情，帶佢去美國放大假，反而成功造人，38歲嘅Gigi終於喺2014年順利誕下混血B女。

黎姿－38、41歲

2009年TVB當家花旦兼女神黎姿宣布嫁畀商人馬廷強，其後淡出娛樂圈。2010年7月，未生日嘅38歲黎姿剖腹誕下一對雙胞胎女嬰。黎姿未懼高齡產婦嘅風險，2012年41歲嘅佢再度懷孕，並順利喺同年年尾誕下8磅B女。

朱茵－40歲

朱茵同Beyond成員黃貫中拍拖15年，一直屢傳婚訊。 2012年4月17日，朱茵突然喺微博宣布自己懷孕，引起大眾震驚。其後於同年年尾10月23日，自己41歲生日前，順利誕下B女「叉燒包」黃鶯，並隨即與黃貫中完成結婚手續。此後黃貫中不時都會曬吓愛女愛妻，一家三口好幸福。

吳君如－40歲

吳君如與陳可辛導演90年代起一齊，至今仍未結婚，但已經係娛樂圈公認嘅老父老妻。05年懷孕，但因為高齡產婦問題，吳君如特別謹慎，而且怕BB小氣，點都唔肯承認有BB，並且出親街都經常用大衣遮掩（其實都明白嘅）。最後以40歲之齡，於06年4月誕下B女陳是知。

關詠荷－41歲

2003年TVB當家花旦關詠荷與張家輝結束十幾年愛情長跑結婚，其後不幸經歷一次流產，其實終於喺2005年成功再度懷孕。最終關詠荷以41歲高齡，順利喺2016年1月誕下女兒Brittany，並為咗可以陪住囡囡成長，而半淡出娛樂圈，只會偶然接拍劇集。

李嘉欣－41歲

大美人李嘉欣於08年與富商許晉亨結婚，嫁入豪門。2011年，李嘉欣喺養和醫院誕下B仔許建彤（Jayden Max Hui），仲用囝囝名義成立咗個幫助中國學童嘅「JM Children’s Charitable Foundation」基金。 而大美人生完之後火速瘦身，Keep得到美貌同身材。

林青霞－41、46歲

林青霞40歲先嫁畀香港富商邢李源，扮演過東方不敗嘅佢果然霸氣迫人，毫不懼怕做高齡產婦，分別以41歲及46歲高齡，先後誕下愛女邢愛林及邢言愛。林青霞生完之後為咗專心照顧兩個囡囡，就慢慢淡出娛樂圈。近年拍內地真人秀，第一美人嘅氣質依然未減。

圖片來源：關心妍微博、梁詠琪微博、黎姿微博、黃貫中微博、吳君如微博、情投意荷關詠荷中國影迷會微博、李嘉欣微博、邢嘉倩instagram