【台語世界】台語ê故事──燈台vs燈塔

文／陳明仁
 
航海beh回陸地，ài tī海港登陸。海闊茫茫，岸邊需要有koân燈塔火指引方向。燈塔是海事指點船隻入港真重要ê指標。
M̄-koh，日本話是稱呼”灯台”。有一首出名 ê 台語歌，<霧夜ê灯塔>，是日本曲<泣くな霧笛よ灯台よ>改台語歌詞，葉俊麟作詞，鄭日清演唱，有轟動，後koh編作電影，也是賣座票房，聲真koân。這首曲葉俊麟寫三版歌詞無kāng，張淑美唱 ê 版本是針對電影劇情，<霧夜的灯塔>。鄭日清唱 ê 歌名mā kāng款，m̄-koh khah chē人點唱；m̄-koh卡拉OK kā這兩首歌編號倒péng，beh唱鄭日清版本ài點張淑美唱 ê 編號，這m̄是主題，koh有一版 ê 詞是劉福助唱，歌名是<霧夜的灯台>。
我看過一齣米國電影〈世界 ê 邊緣〉（The Light at the Edge of the World）是Yul Brynner主演，結局是ian-tâu ê 男主角騎細隻馬仔 tī 灯台頂面kap敵人相戰，可見上頂面是平- -ê，應該是”灯台”chiah tio̍h！M̄-koh， ná會koh 有稱”灯塔”？塔是尖頂- -ê！
有1 kái我去台南安平劍獅埕拜訪蔡金安老師，我固定時間會ùi台北去台南請安，多年慣勢。中晝到tè，劍獅埕入口無遠有咖啡座，賣台南美食chia̍h-mi̍h，我時常約台文界朋友去hia lim chia̍h phò-tāu交陪，lóng蔡董事長招待。
Hit工我ka-tī先到位，蔡董事長陪一位súi姑娘teh開講，介紹是福建泉州海事博物館館長小姐，專工來台灣調查kóa民俗資料，行程ài拜訪幾位專家，有幾位我也有交陪。Beh tńg去是台北出發，有kóa資料我ài出發前去送資料去飯店hō͘- -i。
隔tńg年我kap蔡董事長去廈門泉州作調查，有去泉州海事博物館，拜訪館長，泉州是Chi-ná (China) 第一海港，聽講稅收是全國上chē ê所在，海事博物館有展lám所有航海有關ê舟台型工具齊全，koh有圖像。古早in無灯台，沿海ê廟寺有塔，就tī koân塔吊灯火，當作指點船隻入港ê記號，in ê話真正是灯塔。我chiah了解灯台，灯塔無kâng ê來源詞，lán lóng會sái引用。