【台語世界】我上愛食ê 果子

文一／Tân Iū-siù（陳侑秀）

我上愛食ê 果子是檨仔，酸酸koh 甜甜，親像愛情ê滋味；無論加牛奶á-sī做飲料，lóng足合。
阮兜lóng先將檨仔子做中心，分3塊，koh用井形剖到底，gè- -落-去，你就知我為啥物愛食檨仔 ah！
台灣字（白話字）版
Góa siōng ài chia̍h ê kóe-chí
Góa siōng ài chia̍h ê kóe-chí sī soāiⁿ-á. Sng-sng koh tiⁿ-tiⁿ, chhin-chhiūⁿ ài-chêng ê chu-bī, bô-lūn ka gû-leng á-sī chò ím-liāu, lóng chiok ha̍h.

Goán tau lóng seng chiong soāiⁿ-á-chí chò tiong-sim, hun saⁿ tè, koh iōng chéⁿ-hêng phòa kàu té, gè- -lo̍h-khì, lí chiū chai ūi-siáⁿ-mı̍h góa ē ài chia̍h soāiⁿ-á- -ah!

食- -起-來甜甜koh軟軟e荔枝。圖/擷自網路

文二／Chhòa I-san（蔡依珊）
我上愛食ê 果子是荔枝。食- -起-來甜甜koh軟軟。逐擺lóng hō͘我食kah停bē落- -來。M̄-nā 我愛食，連蟲mā愛食。有時陣會拄著1、2粒hō͘ in 搶- -去 ê 情況。雖然會hō͘蟲驚- -著，m̄-koh我猶是足kah意食荔枝。
台灣字（白話字）版
Góa siōng ài chia̍h ê kóe-chí
Góa siōng ài chia̍ h ê kóe-chí sī nāi-chi. Chia̍h- -khí-lâi tiⁿ-tiⁿ koh nńg-nńg. Ta̍k-pái lóng hō͘ góa chia̍h kah thêng bē lo̍h- -lâi. M̄-nā góa ài chia̍h, liân thâng mā ài chia̍h. Ū sî-chūn ē tú tio̍h 1、2 lia̍p hō͘ in chhiúⁿ- -khì ê chêng-hóng. Sui-jiân ē hō͘ thâng kiaⁿ-tio̍h, m̄-koh góa iáu-sī chiok kah-ì chia̍h nāi-chi.
註：本文為台南市復興國中學生作品，指導老師：許珮旻。