【台語世界】我看Pelosi 訪台

文／康順添 Khng Sūn-thiam
M̄是烏面三媽
Mā m̄是六房媽
伊是阿西媽
紅--ê頭鬃是伊ê熱情
粉紅--ê衫是阮向望足久ê一葩火
硬骨ê阿媽kēng有志氣ê番薯á囝
你ê飛機有淀淀淀ê向望
有人講“beh拍beh ji̍h”
阿西媽m̄驚，番薯á囝mā m̄驚
天理不從，甲子不容
恁有恁ê想法，阮有阮ê主張
田無溝水無流
假使
大國ê拗蠻，是beh叫阮屈服
台灣國ê人民，會hō͘你看著阮ê驕傲
阿西媽，阿西媽
多謝妳
多謝妳送來覺醒kap向望
阮ê堅持會成做未來囝囝孫孫ê 幸福
台灣字（白話字）版
Góa khòaⁿ Pelosi hóng Tâi

M̄-sī O͘-bīn-saⁿ-má
Mā m̄-sī La̍k-pâng-má
I sī A-se-má
Âng--ê thâu-chang sī i ê jia̍t-chêng
Hún-âng--ê saⁿ sī gún ǹg-bāng chiok kú ê chi̍t-pha-hóe
Ngē-kut ê a-má kēng ū chì-khì ê han-chî-á-kiáⁿ
Lí ê hui-ki ū tīⁿ-tīⁿ-tīⁿ ê ǹg-bāng
Ū lâng kóng “beh phah beh ji̍h”
A-se-má m̄ kiaⁿ, han-chî-á-kiáⁿ mā m̄ kiaⁿ
Thiⁿ-lí put chiông, kah-chí put iông
Lín ū lín ê siūⁿ hoat, gún ū goán ê chú-tiuⁿ
Chhân bô kau chúi bô lâu
Ká-sú
Tōa kok ê áu-bân, sī beh kiò gún khut-ho̍k
Tâi-oân-kok ê jîn-bîn, ē hō͘ lí khòaⁿ tio̍h gún ê kiau-ngō͘
A-se-má, A-se-má
To-siā--lí
To-siā lí sàng lâi kak-chhéⁿ kap ǹg-bāng
Gún ê kian-chhî ē chiâⁿ chò bī-lâi kiáⁿ-kiáⁿ-sun-sun ê hēng-hok.