【台語世界】林詠梅女士記持中ê林茂生教授（1）

訪談主持人：蔣為文、呂越雄
來賓：林詠梅女士
林茂生教授是台灣第一位留學美國ê博士，mā是成大（彼陣ê台南高等工業學校）第一位台灣人教授。一世人lóng為著台灣ê教育teh付出，soah tī 1947年度hō͘國民黨lia̍h- -去，從此被消失- -去。今年伊唯一koh在世ê查某囝林詠梅女士mā已經87歲，m̄-koh伊對幾十年前父親林茂生教授ê記持猶原清楚。
林詠梅女士是厝內唯一ê查某囝。自細漢tio̍h真受父親疼痛。Tī林茂生教授hō͘-人lia̍h- -去ê時陣才tú kā過了十歲ê生日。伊會記得彼日二兄林宗義聽tio̍h風聲來勸父親閃避危險。M̄-koh父親堅持伊只是單純teh教冊，抑無反對政府，認為彼款lia̍h人ê代誌一定kah家己無關係。結果林詠梅女士kap弟弟做伙hō͘二兄chhōa去食in阿嫂ê米粉炒了後無jōa久，阿母tio̍h隨chhōe人來通知二兄，講阿爸hō͘人lia̍h- -去ah！雖然當時猶koh細漢，林詠梅女士mā感覺tio̍h一定有出代誌，是大難臨頭ah！
照林詠梅女士阿母ê解說，彼日接近中晝ùi一台烏頭車落來6 ê穿中山服、衫內有槍ê人，講是林茂生教授真熟sāi mā tiāⁿ-tiāⁿ leh 來往ê台大校長beh請伊去講話。In m̄管林教授講伊食飯飽chiah來去，tio̍h beh伊隨tòe in上車。林詠梅女士ê母親隨感覺代誌無單純，隨chhōe校長確認。發現林茂生教授真正hō͘人騙- -去ah！而且àn彼台車ê號碼去查，kan-na查出是hō͘人徵用ê 計程車，無法度知影事實上是啥人leh用。當時國民黨用欺騙、暗殺ê方式，完全無經過正經ê法院程序tio̍h kā家己ê阿爸lia̍h走koh m̄承認，hō͘林詠梅女士自細漢tio̍h知影in m̄是一ê正當ê政府！彼陣足濟律師、醫生、受高等教育ê人lóng hō͘人lia̍h- -去。林詠梅女士認為這tio̍h是in ê 自卑感，in感覺tī大陸是專制，知影in ê 教育程度來chia若beh用原來ê方法會有困難，而且tú-tio̍h chia有學問ê人會感覺自卑；所以用粗魯ê方式來解決in ê處境，用thâi人ê方法來處理in ê見笑！
林茂生教授無- -去後，林詠梅女士ê母親kap李瑞漢律師ê太太，koh有幾位仝款先生lóng失蹤ê太太，若聽人講tó-ūi ê田有死人lóng會出去chhōe，tio̍h是希望會當將親人ê身屍- -轉來。彼陣林詠梅女士ê大兄tio̍h喉結核，伊知影父親無- -去了煩惱，加深身體mā jú艱苦。當時連藥仔tio̍h買無！結果父親三- -月去了，伊仝年十- -月mā過身！Koh有林詠梅女士ê三哥，本來tī日本大學讀一半hō͘人叫去做兵。Koh轉來台灣ùi頭重考試才會當繼續讀外文系，讀無夠一冬父親無去後伊tio̍h隨離開學校去食頭路ah！(待續)

林詠梅女士。圖／《台灣字》雜誌提供

*本文由《台灣字》雜誌提供