【台語世界／錄音】來去恆春Ná行ná寫詩

文、錄音／蘇晏德 So͘ Iàn-tek

2023年7月初10，早時8點30分出發，chit二日ê目的地是屏東縣恆春鎮，有人講恆春三寶是瓊麻、洋蔥、落山風，雖罔以前tiāⁿ-tiāⁿ來恆春，m̄-koh無特別做記錄，chit擺是利用歇熱ê拜一拜二 khah bē that車，才來一chōa深度ê旅遊。Chit二工lóng-chóng去十ê所在，每一站lóng用一首詩kā伊記錄起來，請大家做伙來欣賞。

第一站：恆春古城
東門往東是滿州、孤柱koân-koân ná大樹、
西門bih-sih ê城牆、ná像tiām-chì ê姑娘、
南門威嚴teh鎮守、恆春對外ê目睭、
北門平靜真清幽、暗時觀星賞月娘。

第二站：交落水(ka-la̍uh-chúi)
佳樂水原名交落水、奇形怪石一大堆、
山海景緻有夠súi、透早日頭現光輝。

第三站：龍磐公園
公園草坪風teh動、歡喜氣氛無tè藏、
白色婚紗有新人、準備迎接入洞房。

第四站：風吹沙
太平洋邊二六線、山海公路切斷我、
日頭熱度ak bē hoa、隔山看海風吹沙。

第五站：鵝鑾鼻
國境之南鵝鑾鼻、燈塔koân-koân真標緻、
保護漁民去掠魚、再造風華ê印記。

第六站：貓鼻頭
貓形怪石真迷人、山海景色無tè藏、
情人散步真輕鬆、編寫美麗青春夢。

第七站：關山日落
夕陽落海有氣氛、日頭溫度真溫純、
愛情道路欲平順、追求日落愛慇勤。

第八站：後壁湖漁港
黃昏夕陽來相送、情人歡喜來出帆、
坐船消遙真輕鬆、遊湖心情心放空。

第九站：台電南部展示館
今生有緣坐佇chia、觀看3D ê電影、
館內有我ê腳跡、性命歌詩我來寫。

第十站：船帆石
黃昏美景報你知、人頭怪石等你來、
觀看日頭沉落海、欣賞夕陽ê光彩。

台灣字（白話字）版
Lâi-khì Hêng-chhun Ná kiâⁿ ná siá si

2023 nî 7 goe̍h chhe 10，chá-sî 8 tiám 30 hun chhut-hoat, chit nn̄g-ji̍t ê bo̍k-te̍k-tē sī Pîn-tong-koān Hêng-chhun-tìn, ū lâng kóng Hêng-chhun sam-pó sī khêng-môa, iûⁿ-chhang, lo̍h-soaⁿ-hong. Sui-bóng í-chêng tiāⁿ-tiāⁿ lâi Hêng-chhun, m̄-koh bô te̍k-pia̍t chò kì-lio̍k. Chit pái sī lī-iōng hioh-joa̍h ê pài-it pài-jī khah bē that-chhia, chiah lâi chi̍t-chōa chhim-tō͘ ê lú-iû. Chit nn̄g kang lóng-chóng khì cha̍p ê só͘-chāi, múi chi̍t chām lóng ēng chi̍t siú si kā kì-lio̍k- -khí-lâi. Chhiáⁿ ta̍k-ê chò-hóe lâi him-sióng.

Tē-it chām: Hêng-chhun kó͘-siâⁿ
Tang-mn̂g óng tang sī Boán-chiu, Ko͘-thiāu koân-koân ná tōa-chhiū
Sai-mn̂g bih-sih ê siâⁿ-chhiûⁿ, Ná chhiūⁿ tiām-chì ê ko͘-niû
Lâm-mn̂g ui-giâm teh tìn-siú, Hêng-chhun tùi-gōa ê ba̍k-chiu
Pak-mn̂g pêng-chēng chin chheng-iu, Àm-sî koan chheⁿ siúⁿ goe̍h-niû

Tē-jī chām: Ka-la̍uh-chúi
Ka-lo̍k-chúi goân-miâ ka-la̍uh-chúi
Ki-hêng koài-chio̍h chi̍t-tōa-tui
Soaⁿ hái kéng-tì ū-kàu súi
Thàu-chá ji̍t-thâu hiàn kong-hui

Tē-saⁿ chām: Liông-phoân kong-hn̂g
Kong-hn̂g chháu-phiâⁿ hong teh tāng
Hoaⁿ-hí khì-hun bô-tè-chhàng
Pe̍h-sek hun-se ū sin-lâng
Chún-pī gêng-chiap ji̍p tōng-pâng

Tē-sì chām: Hong-chhoe-soa
Thài-pêng-iûⁿ piⁿ 26 sòaⁿ
Soaⁿ hái kong-lō͘ chhiat-tn̄g góa
Ji̍t-thâu jia̍t-tō͘ ak bē hoa
Keh soaⁿ khòaⁿ hái Hong-chhoe-soa

Tē-gō͘ chām: Gô-loân-phīⁿ
Kok-kéng chi lâm Gô-loân-phīⁿ
Teng-thah koân-koân chin piau-tì
Pó-hō͘ hî-bîn khì lia̍h-hî
Chài-chō hong-hôa ê ìn-kì

Tē-la̍k chām: Niau-phīⁿ-thâu
Niau-hêng koài-chio̍h chin bê-lâng
Soaⁿ hái kéng-sek bô-tè-chhàng
Chêng-jîn sàn-pō͘ chin khin-sang
Pian-siá bí-lē chheng-chhun bāng

Tē-chhit chām: Koan-san ji̍t lo̍h
Se̍k-iông lo̍h-hái ū khì-hun
Ji̍t-thâu un-tō͘ chin un-sûn
Ài-chêng tō-lō͘ beh pêng-sūn
Tui-kiû ji̍t lo̍h ài un-khûn

Tē-peh chām: Āu-piàh-ô͘ hî-káng
Hông-hun se̍k-iông lâi sio-sàng
Chêng-jîn hoaⁿ-hí lâi chhut-phâng
Chē chûn siau-iâu chin khin-sang
Iû ô͘ sim-chêng sim pàng-khang

Tē-káu chām: Tâi-tiān lâm-pō͘ tián-sī-koán
Kim-seng ū iân chē tī-chia
Koan-sióng 3D ê tiān-iáⁿ
Koán-lāi ū góa ê kha-jiah
Sèⁿ-miā koa-si góa lâi siá

Tē-cha̍p chām: Chûn-phâng-chio̍h
Hông-hun bí-kéng pò lí chai
Lâng-thâu koài-chio̍h tán lí lâi
Koan-khòaⁿ ji̍t-thâu tîm lo̍h-hái
Him-sióng se̍k-iông ê kong-chhái

讀hōo你聽：