【台語世界／錄音】同窗會罔講罔談

文、錄音／陳俐雯 Tân Lī-bûn

目一nih高中已經出業三十幾冬，會記得tăⁿ出業hit時陣，同學lóng猶有leh相chhōe感情bē-bái，Só͘-pái參加同窗會ê人誠濟。後- -來同學隨个仔成家立業，無閒ê代誌變濟自然來參加同窗會ê人mā那來那少，沓沓仔著無koh再辦，那知一làng著二十幾冬。老同學尾手有法度koh再見面，愛感謝有心ê同學綿爛用社群網路chhōe人，kā失蹤、無聯絡ê同學一个仔一个koh箍倚- -來，大家才會當kā斷線ê緣份重再接- -起來，繼續辦同窗會。

論真講，來到中年同窗會有一款微妙ê氣氛，時間和青春走相掠是因端。出業hia久大家難免會好玄想beh看對方有變- -無、變成啥款？會好玄同學chit-má攏做啥工課，頭路好- -無？事業敢有成就？家庭婚姻、感情有美滿- -無？囡仔生幾个，有乖、有gâu讀冊- -無？Só͘-pái日本人才kā同窗會這款khǹg tī心內無講出嘴ê比較寫做小説，甚至是拍成戲劇，m̄-chiah有「假面同窗會」......chia ê題材出現。

自少年到taⁿ，我就m̄-sī hit款gâu讀冊gâu趁錢ê腳數，自認平凡無啥物通好比，參加同窗會更加m̄-sī為著啥趁錢ê目的才去ê，單純是beh去看久無見面ê老同學。轉- -來了後無致無意（無張持）tī網路看著足濟分張去參加同窗會ê文章。有人驚成就低見笑無愛去，有人是手機仔級數提siuⁿ bái驚人笑，mā有人是囡仔頇顢感覺sià面子......，理由百百款看kah我一粒頭若公園ê韆鞦幌bē停。

就是hām同學食飯聯絡感情niā-niā，若會有遐爾仔濟負面想法kap比較？這个時代變kah干焦注重表面，人人陷tī掰bē開ê比phēng，有影hō͘我chhoah chi̍t-tiô。

佳哉我頭殼雖罔簡單m̄-koh無破一空，無想hia lo̍k-kò so̍k-kò（有- -ê 無- -ê）無營養- -ê，心肝頭才無垃圾物仔蓬蓬坱，才通自在和得欲三十冬無見面ê老同學歡喜話仙phò-tāu。

台灣字（白話字）版
Tông-Chhong-Hōe Bóng-Kóng Bóng-Tâm

Ba̍k-chi̍t-nih ko-tiong í-keng chhut-gia̍p saⁿ-cha̍p kúi tang. Ē-kì-tit tăⁿ chhut-gia̍p hit sî-chūn, tông-o̍h lóng iáu ū teh sio-chhōe kám-chêng bē-bái, só͘-pái chham-ka tông-chhong-hōe ê lâng chiâⁿ-chē. Āu- -lâi tông-o̍h sûi-ê-á sêng-ka-li̍p-gia̍p, bô-êng ê tāi-chì pìⁿ chē chū-jiân lâi chham-ka tông-chhong-hōe ê lâng mā ná lâi ná chió. Ta̍uh-ta̍uh-á tio̍h bô koh chài pān. Ná-chai chi̍t làng tio̍h jī-cha̍p kúi tang. Lāu tông-o̍h bóe-chhiú ū-hoat-tō͘ koh-chài kìⁿ-bīn, ài kám-siā ū sim ê tông-o̍h mî-nōa iōng siā-kûn bāng-lō͘ chhōe-lâng, kā sit-chong, bô-liân-lo̍k ê tông-o̍h chi̍t-ê-á chi̍t-ê koh kho͘ óa—lâi. Tāi-ke chiah ē-àng kā tn̄g-sòaⁿ ê iân-hūn têng-chài chiap- -khí-lâi, kè-siok pān tông-chhong-hōe.

Lūn-chin kóng, lâi kàu tiong-liân tông-chhong-hōe ū chi̍t-khóan bî-biāu ê khì-hun, sî-kan hām chheng-chhun cháu-sio-lia̍h sī in-toaⁿ. Chhut-gia̍p hia kú tāi-ke lân-bián ē hòⁿ-hiân siūⁿ-beh khòaⁿ tùi-hong ū piàn- -bô, piàⁿ-sêng siáⁿ-khoán? Ē hòⁿ-hiân tông-o̍h chit-má lóng chò siáⁿ khang-khòe, thâu-lō͘ hó- -bô? Sū-gia̍p kám ū sêng-chiū? Ka-têng hun-in, kám-chêng ū bí-boán- -bô?
Gín-á seⁿ kúi-ê, ū koai, ū gâu tha̍k-chheh- -bô? Só͘-pái Ji̍t-pún-lâng chiah kā tông-chhong-hōe chit-khoán khǹg tī sim-lāi bô kóng chhut chhùi ê pí-kàu siá chò siáu-soat, sīm-chì sī phah sêng hì-kio̍k, m̄-chiah ū “ Ké-bīn Tông-chhong-hōe” ... chia ê tê-châi chhut-hiān.

Chū siáu-liân kàu-taⁿ, góa chiū m̄-sī hit-khóaⁿ gâu tha̍k-chheh gâu thàn-chîⁿ ê kha-siàu. Chū-jīn pêng-hoân bô siáⁿ thang hó pí, chham-ka tông-chhong-hōe kèng-ka m̄-sī ūi-tio̍h siáⁿ thàn-chîⁿ ê bo̍k-tek chiah khì ê. Tan-sûn sī beh khì khòaⁿ kú bô kìⁿ-bīn ê lāu tông-o̍h. Tńg- -lâi liáu-āu bô-tì-bô-ì (bô-tiuⁿ-tî) tī bāng-lō͘ khòaⁿ-tio̍h chiok chē pun-tiuⁿ khì chham-ka tông-chhong-hōe ê bûn-chiuⁿ. Ū lâng kiaⁿ sêng-chiū kē kiàn-siàu bô-ài-khì, ū lâng sī chhiú-ki-á kip-sò͘ the̍h siuⁿ bái kiaⁿ-lâng-chhiò, mā ū lâng sī gín-á han-bān kám-kak sià-bīn-chú..., lí-iû pah-pah-khoán khòaⁿ kah góa chi̍t-lia̍p-thâu ná kong-hn̂g ê chhian-chhiu hàiⁿ bē thêng.

Chiū sī hām tông-o̍h chia̍h-pn̄g liân-lo̍k kám-chêng niā-niā, ná ē ū hiah-nī-á chē hū-bīn siūⁿ-hoat kap pí-kàu? Chit-ê sî-tāi piàn kah kan-na chù-tiōng piáu-bīn, lâng lâng hām tī póe-bē-khui ê pí-phēng, ū-iáⁿ hō͘ góa chhoah-chi̍t-tiô. Ka-chài góa thâu-khak sui-bóng kán-tan m̄-koh bô phòa chi̍t-khang, bô siūⁿ hia lo̍k-kò so̍k-kò (ū- -ê bô- -ê ) bô-êng-ióng ê, sim-koaⁿ-thâu chiah bô lah-sap-mi̍h-á phōng-phōng eng, chiah thang chū-chāi hām tit-beh saⁿ-cha̍p-tang bô kìⁿ-bīn ê lāu tông-o̍h hoaⁿ-hí ōe-sian phò-tāu.

讀hōo你聽：