【台語世界／錄音】海洋環境保護

文、錄音／高嘉徽 Ko Ka-hui

Lán ê 海洋是人類寶貴ê資產，咱若是m̄-chai珍惜，真正會後悔。最近chit幾冬，海洋破壞kah真嚴重，塑膠kap塑料hō͘ 人類使用liáu lóng流入溪仔，落尾流入海洋。Chia ê 物件m̄-nā對人類ê身體無好，對規ê大自然kap海洋ê環境chiok害，海洋ê動物lóng會chia̍h tio̍h 塑膠物，á-sī 因為套入去塑膠袋仔造成死亡，che lóng是咱人類需要減少使用kap保護chia ê 環境。

其實海洋目前ê汙染chiâⁿ 嚴重，咱kap環保團體應該愛hó-hó-á 討論beh按怎chò對咱ê海洋環境有幫贊，人類應該愛減少使用塑膠物件，使用會當koh-chài利用ê物件，電火若是bô用盡量愛ē記得關，尤其是咱對塑膠ê物件siuⁿ-kòe重視，若是出外買飯kap買飲料，ē-sái使用環保杯仔kap袋仔、便當盒仔，連餐具用環保ê koh-khah好，án-ne tō會當減輕地球ê負擔，mā 會當hō͘ 有ê 得beh絕種ê動物kap植物有機會生存落去。所致，海洋環境保護ê議題m̄-nā是我家己愛做起，咱生活tī地球ê人類lóng愛盡chi̍t份心力!

台灣字（白話字）版

Lán ê hái-iûⁿ sī jîn-lūi pó-kùi ê chu-sán. Lán nā-sī m̄-chai tin-sioh, chin-chiàⁿ ē hiō-hóe. Chòe-kīn chit kúi tang hái-iûⁿ phò-hoāi kah chin giâm-tiōng, sok-ka kap sok-liāu hō͘ jîn-lūi liáu lóng lâu ji̍p-khì khe-á, lo̍h-bóe lâu-ji̍p hái-iûⁿ. Chia ê mi̍h-kiāⁿ m̄-nā tùi ê sin-thé bô-hó, tùi kui ê tāi-chū-liân ê kap hái-iûⁿ ê khoân-kéng chiok hāi. Hái-iûⁿ ê tōng-bu̍t lóng ē chia̍h tio̍h sok-ka mi̍h, á-sī in-ūi thò-ji̍p khì sok-ka-tē-á chō-sêng sí-bông. Che lóng sī lánjîn-lūi su-iàu kiám-chió sú-iōng kap pó-hō͘ chia ê khoân-kéng.

Kî-si̍t hái-iûⁿ bo̍k-chêng ê u-jiám chiâⁿ giâm-tiōng. Lán kap khoân-pó thoân-thé eng-kai ài hó-hó-á thó-lūn beh án-chóaⁿ chò tùi lán ê hái-iûⁿ khoân-kéng ū pang-chān. Jîn-lūi eng-kai ài kiám-chió sú-iōng sok-ka mi̍h-kiāⁿ. Sú-iōng ē-tàng koh chài lī-iōng ê mi̍h-kiāⁿ. Tiān-hóe nā-sī bô iōng chīn-liōng ài ē kì-tit koaiⁿ , iû-kî sī lán tùi sok-ka ê mi̍h-kiāⁿ siuⁿ-kòe tiōng-sī. Nā-sī chhut-gōa bé pn̄g kap ím-liāu, ē-sái sú-iōng khoân-pó poe-á kap tē-á, piān-tong a̍p-á, liân chhan-kū iōng khoân-pó ê koh-khah hó. Án-ne tō ē kiám-khin tē-kiû ê hū-tam, mā ē-tàng hō͘ ū ê tit-beh choa̍t-chéng ê tōng-bu̍t kap si̍t-bu̍t ū ki-hōe seng-chûn- -lo̍h-khì. Só͘-tì, hái-iûⁿ khoân-pó pó-hō͘ ê gī-tê m̄-nā sī góa ka-tī ài chò-khí, lán seng-oa̍h tī tē-kiû ê jîn-lūi lóng ài chin chi̍t hūn sim-le̍k!

讀hōo你聽：