【台語世界／錄音】記tī頭殼碗ê故事

文／鍾蘭英  錄音／蘇晏德
我是客家人，teh學寫台文。講著美濃鎮竹山溝，真濟人會講，竹山溝有一欉真大欉ê檨仔，邊á有一間土地伯公 (客家人ê福德正神) 。聽人講，hit欉樹仔足老ah。我細漢ê時bat問過阮阿公，伯公樹幾歲ah？阿公講：「經過幾代人ah，至少200外歲ah。」伯公樹ê樹kho͘足粗勇。阮細漢ê時，定定幾ê囡仔手牽手，圍著伯公樹ê腰，做伙唱童謠，唱一遍koh一遍。tú-tio̍h外面起風ê時，囡仔隨衝到伯公樹腳搶lak落塗腳ê檨仔。目睭只有金金看著黃gìm-gìm koh飽tīⁿ ê檨仔lak tī塗跤，這時逐ê目睭足利，腳手緊，相爭koh刺激。伯公kah大樹互相做伴，互相倚靠，大樹陪伯公，伯公保庇大樹，一日koh一日、一年koh一年。
有時陣透早起床，為著beh去伯公樹跤khioh檨仔，檨仔是當時阮愛食ê物件。阮細漢ê時，囡仔定定tī伯公樹腳sńg chhit-thô物仔。大人tī hia答嘴鼓，講人ê閒仔話。鍾- -家、曾- -家ê夥房（家族）有人生囡仔、有嫁娶、農作物豐收、賣大豬、囡仔考著好學校、揣著好頭路，一定愛chhoân牲禮祭拜伯公，緊kā好消息報hō͘伯公知，感謝伯公ê保庇。伯公樹到今將近300歲ah，koh枝葉旺盛、果實濟濟，實在無簡單。伯公樹飼我大漢，伯公保庇我日日平安。我愛伯公愛大樹，祈願伯公kah大樹互相倚靠，世世代代bē分開。
讀hōo你聽