【台語世界／錄音】2024總統大選

文、錄音／高嘉徽 Ko Ka-hui
我細漢寫過一篇咱國家需要啥物款ê領導人，來領導咱ê國家，我講治安ài好，koh有國家ê政策ài有好ê方向，chiah有法度kā咱ê國家治hō͘好勢。Chit-má我大漢—ah！我認為以我是母語老師ê角色來講，就是除了咱ê國勢kap外交ài創hō͘好以外，就是愛顧咱本土ê語言。台文通訊罔報ê總編輯陳豐惠老師講- -過，母語是正港咱國家ê語言，因為語言包含tio̍h台灣chiok豐沛ê文化，m̄管是台語、客語︑原住民語lóng-sī咱台灣siōng寶貴ê文化資產。我bat tī chi̍t篇文章講- -過，咱nā-sī無好好仔保護在地ê語言文化，tō會失去國家ê根基。按呢來講，實在chiok bô-chhái工，我認為咱2024年ê國家領導人，也就是未來ê總統，須要照顧tio̍h本土語言kap本土文化，尤其咱ê國家語言發展法已經通過，chit-má 中學mā必須要o̍h，m̄-koh現此時母語ê環境chiâⁿ需要國家級ê領導人來chhōa領阮，kā母語救倒轉- -來，若無，chhun ê lóng-sī 加講- -ê。
除了母語政策正常化，我感覺國際ê視線mā kài要緊，咱ê祖先留hō͘阮- -ê，應該愛保護，未來規个台灣ê局勢ê鋪排mā chin重要，我向望2024選- -tio̍h ê 總統，向望伊ē-tàng 好好仔chhōa領阮ê國家，有好ê政策︑有koh-khah友善ê環境，當然咱人民mā ē-sái做伙來拍拚，鬥陣kā國家迎向愈好ê未來。
台灣字（白話字）版
Góa sè-hàn siá-kòe chi̍t phiⁿ lán kok-ka su-iàu siáⁿ-mih khoán ê léng-tō jîn lâi léng-tō lán ê kok-ka. Góa kóng tī-an ài hó, koh ū ê chèng-chhek ài ū hó ê hong-hiòng, chiah ū hoat-tō͘ kā lán ê kok-ka tī hō͘ hó-sè. Chit-má góa tōa-hàn- -ah! Góa jīn-ûi í góa sī bú-gí lāu-su ê kak-sek lâi kóng, tû-liáu lán ê kok-sè kap gōa-kau ài chhòng hō͘ hó í-gōa, tō-sī ài kò͘ lán ê pún-thó͘ gí-giân. Tâi-bûn Thong-sìn Bóng-pò ê chóng pian-chi̍p Tân Hong-hūi lāu-su kóng- -kòe, “bú-gí sī chiàⁿ-káng lán kok-ka ê gí-giân.” In-ūi gí-giân pau-hâm tio̍h Tâi-oân chiok phong-phài ê bûn-hòa. M̄-koán sī Tâi-gí, Kheh-gí, Goân-chū-bîn gí lóng-sī Tâi-oân siōng pó-kùi ê bûn-hòa chu-sán. Góa bat tī chi̍t phiⁿbûn-chiuⁿ kóng- -kòe, lán nā-sī bô hó-hó-á pó-hō͘ chāi-tē ê gí-giân bûn-hòa, tō ē sit-khì kok-ka ê kin-ki.
Án-ne lâi kong, si̍t-chāi chiok bô-chhái kang. Góa jīn-ûi lán 2024 nî ê kok-ka léng-tō jîn, iā tō-sī bī-lâi ê chóng-thóng, su-iàu chiàu-kò͘ tio̍h pún-thó͘ gí-giân kap bûn-hòa. Iû-kî lán ê Kok-ka Gí-giân Hoat-tián hoat í-kang thong-kòe, chit-má tiong-ha̍k mā pit su-iàu o̍h. M̄-koh hiān-chhú sî ê khoân-kéng su-iàu kok-ka kip ê léng-tō jîn lâi chhōa-niá gún, kā bú-gí kiù tò-tńg- -lâi, nā-bô, chhun ê lóng-sī ke-kóng- -ê.
Tû-liáu bú-gí chèng-siông hòa í-gōa, góa kám-kak kok-chè ê sī-sòaⁿ mā kài iàu-kín. Lán ê chó͘-sian lâu hō͘ gún- -ê, eng-kai ài pó-hō͘, bī-lâi kui-ê Tâi-oân kio̍k-sè ê pho͘-pâi mā chin tiōng-iàu. góa ǹg-bāng 2024 soán- -tio̍h ê chóng-thóng, ǹg-bāng i ē-tàng hó-hó-á chhōa-niá gún ê kok-ka, ū hó ê chèng-chhek, ū koh-khah iú-siān ê khoân-kéng. Tong-liân lán jîn-bîn mā ē-sái chò-hóe lâi phah-piàⁿ, tàu-tīn kā kok-ka nigâ-hiòng jú hó ê bī-lâi.
讀hōo你聽