叱咤2022︳曾揮低古天樂陳冠希拎生力軍 網民惡搞投張家輝做「我最喜愛男歌手」

商台《2022年度叱咤樂壇流行榜頒獎典禮》開始進行「我最喜愛男／女歌手／組合」投票，歌手們都開始喺社交平台上拉票。樂迷投票後係會有一張有歌手大頭照、可以share到社交媒體嘅圖，等佢地分享投票選擇。有網友就將呢張圖key上根本無份角逐嘅張家輝，連MIRROR嘅AK（江𤒹生）都有share。唔知係咪因為家輝早前喺胡楓紅館演唱會上開金口，令大家諗返起呢位Do姐（鄭裕玲）稱為「樂壇騙子」嘅隱世歌手。

張家輝喺亞視嘅年代，已經有唱劇集主題曲。跳槽TVB後，有一次佢為CASH流行曲創作大賽負責演繹參賽作品，唱得甚有水準，更令參賽歌獲得冠軍，因此被賞識簽約英皇做歌手。而當年家輝第一首主打《愛得起》，就係CASH比賽冠軍作品嘅廣東話版。

而同張家輝同樣喺2000年出道樂壇嘅新人，唔算多但係份量十足，有同樣由電視圈跨界嘅古天樂、一出道個勢好勁嘅陳冠希、由台灣紅到香港嘅蕭亞軒、丁子高有份嘅VRF等。結果張家輝打低對手拎到《2000年度叱咤樂壇流行榜頒獎典禮》生力軍男歌手獎。後來商台亦為佢舉行過《貼身拉闊音樂會》。

張家輝一共出過2張唱片，之後「封咪」多年，到2015年為自己執導嘅電影《陀地驅魔人》翻唱《你是我心愛的姑娘》先再次錄歌。要數張家輝經典歌，可能係當年拍《中華賭俠》唱嘅惡搞版《眼睛想旅行》；同埋劇集《十萬噸情緣》嘅主題曲《全速前進》，「會掛念～就承認太掛念～」係咪見到字都feel到有聲先！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！