叱咤2023︳女歌手獎Gin Lee壓線贏陳蕾拎金獎 Marf@COLLAR有望出道即奪銅獎

今日有傳媒率先披露叱咤頒獎禮嘅「專業推介 叱咤十大」得獎歌曲名單，以及各大獎走勢。本網早於9月分析叱咤樂壇女歌手獎時，已估計三甲人選為Gin Lee、陳蕾及AGA，而3個月過後形勢大致雷同。

Gin Lee近月再派新歌《哭泣健康指南》上台，全年5首上榜歌皆打入十大，並有2首成為冠軍。勁敵陳蕾同樣有5首歌派台，但只有一首冠軍歌。今年Gin Lee加盟英皇，新東家相信落足力爭取成績，加上播放率因素，估計Gin Lee最終可以力壓陳蕾首奪女歌手金獎。

至於女歌手銅獎本應落入AGA手上，但近月走勢放緩，對上一首上榜歌更加係同陳奕迅合唱嘅Speciall One，播放率只能計一半。反觀處於新人年嘅COLLAR成員Marf（邱彥筒）下半年keep住出歌，至今全年4首派台歌都打入十大，更有一首冠軍歌。而且Marf曲風頗被DJ受落，有望喺今年一眾女歌手中脫穎而出，以新人姿態打入女歌手三甲。另外，有傳今年叱咤生力軍將繼續分男、女歌手及組合頒發，若果屬實Marf應該同時穩奪生力軍女歌手金獎。

另一有望爭入女歌手三甲嘅會係Serrini，佢今年同樣一共有5首上榜歌，當中《不冷淡不熱情》更登上冠軍，計落比AGA似乎更有勝算，而Serrini同Marf可能最終要睇內部播放數字先至決定到邊個係銅獎得主。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！