叱咤2023｜賽前大熱Gin Lee失落女歌手金獎網民戥唔抵 Gin Lee：冇話抵唔抵，每個歌手都付出好多努力

噚日（1日）元旦日就係「叱咤頒獎禮2023」嘅日子，各個獎項亦都塵埃落定，一班得獎歌手今年嘅努力都得到肯定。每個獎項只得一個，有人歡喜有人愁，早前被視為女歌手金獎賽前大熱嘅「實力唱將」Gin Lee李幸倪最後就只奪得銀獎，有部分網民戥佢唔抵，認為佢上年嘅努力應該值得攞金獎，Gin Lee對此亦都有回覆 Yahoo娛樂圈 ：「其實冇話抵唔抵，每個歌手都付出好多嘅努力，反而身邊人反應比較大，我仲要安慰番佢哋。琴晚我逐個睇番fans嘅留言，一路睇一路喊，因為好感動，真係好想多謝佢哋。無論如何，今年我會繼續努力。」

今年，Gin Lee轉投新唱片公司英皇，可以話係事業上嘅一個新開始，一年內發行5首歌，包括《Dum Dum》、《單戀這件小事》、《企好》、《後人類的美麗與哀愁》及《哭泣健康指南》，當中更有2首成為叱咤冠軍歌。由以往曲風比較單一偏向情歌、慢歌，去到今年挑戰不同曲風同主題，有為自己打氣嘅、節奏偏快嘅「肯定就是你」《Dum Dum》，有關於感情嘅《單戀這件小事》及《企好》，探討人生嘅《後人類的美麗與哀愁》，以及佢今年最後一首歌《哭泣健康指南》，關注聽眾嘅情緒健康，提醒聽眾哭泣嘅重要。獎項嘅結果未必盡如人意，每個歌手都有努力有付出，大家都有自己嘅心頭好，有網民、Fans支持同認可，相信比起獎項嚟得更重要。