同林日曦遊首爾0溝通 蔣麗芸真嬲：佢嗰本雜誌仔就釘

ViuTV真人騷節目《跟著矛盾去旅行》題材新鮮，贏盡口碑同收視，第1集長毛同曾鈺成遊波蘭就已經有10.6％收視率（約68.9萬觀眾收看），成ViuTV最高收視節目。

去到前兩晚，終於輪到民建聯立法會議員「元秋」蔣麗芸同100毛「腦細」林日曦遊首爾。喺拍攝開始嘅時候，林日曦就提議做一個「社會實驗」，就係全程都唔同蔣麗芸直接對話，有咩想講，佢就搵翻譯小姐用廣東話翻譯廣東話，搞到蔣麗芸無癮仲好嬲。

網民反應兩極，有人認為佢冇禮貌、唔識尊重人、行為小學雞，但係亦有網民認為過癮、好真、蔣議員根本不值得尊重等等。

節目開頭已經標籤咗林日曦係「職業廢青」，而蔣麗芸就係「傳統精英」提出佢哋嘅矛盾。蔣議員一開頭都笑笑口，相反林日曦就目無表情，拒絕對話兼極速閃人，搞到蔣議員好冇癮。

雖然佢哋全程冇對話、0交流，有啲冷場，可能就係林日曦拒絕交流成功產生矛盾、氣氛尷尬。其中一part就講佢哋喺乒乓波枱前講下對韓國應徵者見工感受，呢一part喺兩集《矛盾》最犀利，搞到蔣議員黑面兼發火，話唔會再同林日曦喺一個場合， 要求分開拍攝，仲話佢嗰本雜誌仔（100毛）就釘，睇佢捱到幾耐，囂張到咁。

佢哋去咗影樓同義工組織進行拍攝之後就分頭行事（即使要訪問同一個脫北者），一個去咗街邊賣咖啡同煮茶餐廳嘢食俾韓國人試，一個去同北韓阿珠媽食北韓菜同遊覽漢江。