唔係大墨魚 柴油私家車好環保！

一提油渣車，有啲老土人會耍手擰頭。「污染源頭嚟喎！」、「大墨魚嚟喎！」、「年年要驗車添喎！」如果你係咁諗，恭喜番你先，地球至少有一個組織叫香港政府好啱你去做，因為佢多年嚟一直漠視柴油私家車嘅好處，一味醜化佢幾唔環保。背後有咩原因，我又即管同你估下啦：當本地柴油已經發展到「零稅」嘅地步，如果全香港私家車轉晒用柴油，政府咪少咗份收入？而最大鑊係益晒班油魔，到時佢哋真係「#多謝GOV」。

柴油X5可留意7座版，扭力夠大坐滿人都好好力。

你咁熟車，一定明我點解猛讚柴油車（唔好再叫油渣車咁肉酸啦）。其實只要睇番近十年歐洲車壇發展，一定睇到人哋啲柴油引擎幾咁有效率，CO2同NOx排放低不特只，仲要異常咁慳油，要留意，唔係「非常」咁簡單，係「異常」。或者你可以話，柴油價格平過汽油所以你先覺得平啫，啱……一半啦，實際上係柴油引擎扭力好，一、二千轉已經好夠行，根本唔駛踩大油門，所以特別啱香港呢啲密集、短途嘅環境，淨係搶位突然加速嗰下已經贏晒。

Q7 TDI要定期補充adblue尿素，各大油站都可以買到。

香港有咩柴油私家車？自從2009年奧迪打破咗先例，入咗第一部符合歐盟6期標準嘅柴油版Q7之後，好幾個歐洲大廠都先後輸入唔同車款。近年嚟講，比較搶手嘅係寶馬320d、平治C220 BlueTEC、Mazda6 Diesel，呢幾架都係房車款，另外仲有頭先講嘅Q7、平治ML同寶馬X5四驅車。除咗性能好同慳油，柴油私家車仲有一個好處，就係二手價都算幾硬淨，至少比同款汽油版引擎型號跌得慢。

320d無論慳油同性能兩方面都好平均，二手價比C220 BlueTEC低一截。

其實以車款嚟計，SUV比房車更應該用柴油引擎，因為一般車重都幾高，起圍至頭段係要多啲扭力，柴油引擎咁好低扭就啱晒。Q7、ML同 X5點揀好？個人推薦寶馬，唔係因為牌子，原因又係因為兩個字：扭力。香港版X5xDrive30d，用3.0直六柴油Turbo引擎，份扭力高到57.1kgm，係三架之中最高，仲要低到1,500rpm已經爆發晒出嚟，嗰股力量大到連超過兩噸重嘅車身都可以輕易推郁，仲要平均每百公里耗油量只係6.2L，加上而家柴油只係$9.62/L（有車隊咭仲平啲添），如果搵架有七座option嘅二手車，做家庭腳車真係一流。

平治最好嘅係隔音出色同非常舒服。

柴油X5當年新車要成七十幾萬，兩年之後嘅今日，好彩嘅話五十到抆六十萬應該都有機會搵到，不過如果想坐七人，就記住俾多少少搵有第三排option嘅放盤。揀車要留意行車哩數，因為柴油車皮費低，一般都會用到盡，兩年車可能已經累積唔少km。不過遇到中港車嘅機會應該比較低，因為大陸嘅柴油唔係咁高質素，唔啱歐六柴油引擎用。

Mazda6 Diesel係唯一日本柴油私家車，亦係最低入場門檻嘅柴油型號。

咁房車又點揀呀？呢次真係老土啲都要講句：各花入各眼啦。有人鍾意粒星，話佢夠安全舒服喎，安唔安全我唔知啦，因為無搵過架C220 BlueTEC嚟撞，但舒服又的確係真嘅，避震吸力唔錯，過駁都feel唔到咁滯；不過相比320d嘅運動性表現，就都係呢架幕尼克出品好好多喇，咩叫「運動性」，即係底盤剛韌啲、避震又挺啲，加埋柴油偈咁鬼好抵扭，出彎都過癮啲咁囉。雖然兩個牌子不嬲都各有擁躉，不過一講到二手車價就寶馬吸引啲，三十萬左右可以揸返屋企。要留意3系啱啱facelift咗，新款有少少唔同，分別唔大嘅，但係如果接受唔到買舊款車，咁就要等下啦。

咦？漏咗Mazda6？梗係唔會啦，呢架係眾多柴油私家車之中，最低玩抵用嘅一款，亦係唯一嘅日本代表。二手價大約二十零萬，頂多係兩年幾車齡，但入面啲設備就同歐洲車一樣咁高級，因為呢陣子嘅萬事得大革新，已經再唔係以前嘅cheap車，而且呢副偈同2012年攞Japan Car of the Year嘅CX-5 Diesel一樣，得獎名車嚟喎，值得捧下場啦。