【女版唐立言】《迷》田蕊妮演技獲網民大讚推舉做視后

無綫劇集《迷》噚晚大結局啦，起初好多觀眾都批評套戲派膠，又話睇到個人好迷，估唔到播到中後段，觀眾態度180度轉變。除左劇情高潮一浪接一浪之外，視后田蕊妮精湛嘅演出都幫套劇加左唔少分。

自從計穎妍(田蕊妮飾) 個女兒Chloe（簡淑兒飾）被殺後，佢開始踏上“成魔”之路，一步步展開復仇大計，狠樣盡出得到網民大讚，網民仲激讚佢拍哭戲時，連鼻涕都識做戲！到佢逼死坤哥嗰幕，精神陷入崩潰，一時聲淚俱下博同情，一時又面容兇狠咁威脅坤哥。

到噚晚大結局計穎妍無法接受被最愛嘅男人欺騙，精神進入瘋巔狀態（雖然跌落樓嗰part假到喊，頭髮冇飛起仲係咁整齊，仲要死唔去）。田蕊妮嘅演技獲網民激讚表現有層次，佢崩潰七情上面嘅演繹令人心寒，網民仲話睇住佢嘅演出覺得好驚、好恐怖，仲話要熱捧阿田再登視后寶座。