安安靜靜的力量

記持是袂拍毋見（phang-kinn）的，只是時間共一件一件摺（tsih）起來，囥咧屜仔（thuah-a）內，編號、收入去性命的大庫房，等甲你若想欲佮伊面會，你著愛照時間的號碼去揣，按呢，真緊你就會當轉去過去。

我拍開性命的屜仔，揣來到二○○二，彼年我的第二本臺語詩集《路寒袖台語詩選》出版，屈指一算，離這馬（tsit-ma）已經十八冬囉。這十八冬來我毋是閒閒坐佇遐納涼啉茶，顛倒是誠認真咧寫作，出版十四本冊，有詩集、攝影詩集、散文集、繪本冊、報導文學……等等，猶閣有辦十場的攝影個展，主編抑是參與著作的冊嘛有數十本。

我對母語書寫的看法一直是：第一，用母語書寫是一个作家的天職。二者，有一寡幼膩（iu-ji/li）幽微的感情干焦母語才會當表達完全。第三咧，一作家一定愛有一部分的母語作品。

十八年來我的臺語創作從來攏毋捌停過，收佇這本詩集內底的作品，上早的是佇一九九四年寫的，最近的是今年（二○二○）發表的，規本總共四十六首，差不多分布佇每一年份。

進前兩本詩集有一个共同點，就是相當比例的作品是我參與臺語流行音樂所創作的歌詩，尤其是第一本《春天花蕊》（皇冠，一九九五），收錄了《戲夢人生》電影音樂、潘麗麗《畫眉》專輯全部、《往事如影》一部分、李靜美《情鎖》……等的作品，遮的作品主要是咧描寫女性內心幼膩的情愛世界，抒情閣幽微。《有夢最美》這本雖然嘛有一寡這類的作品，像《往事如影》猶未收入去前兩本冊的部分，佮為鳳飛飛、蔡秋鳳、王識賢所寫的單曲，毋過，《有夢最美》上大的特色已經毋是予人牽腸掛肚的情詩矣，而是競選歌佮地誌詩。

全世界干焦咱臺灣有為候選人量身訂做的競選歌，臺灣第一首的競選歌就是一九九四年我替阿扁仔選臺北市長所寫的〈台北新故鄉〉佮〈春天花蕊〉。一開始我和羅文嘉猶無熟似，是伊揣林錦昌介紹的，羅文嘉講伊會揣我寫競選歌的靈感，是聽著我寫予潘麗麗唱的〈畫眉〉。我問林錦昌：恁想欲寫啥？伊回我四字：快樂、希望。

一禮拜了後，我交予負責作曲的詹宏達三首歌詞，〈台北新故鄉〉的臺語版佮華語版，佮〈春天花蕊〉。閣一禮拜，詹宏達的曲就做好矣，阮用隨身聽輪流聽拄拄仔出爐的DEMO卡帶，逐家攏誠滿意，羅文嘉就急咧問：「啥物時陣會使錄音？」我有淡薄仔躊躇：「這是選舉上重要的文宣，恁敢毋免提轉去予阿扁仔聽看覓？」羅文嘉笑笑仔講：「這件代誌阿扁仔交代予我處理，所以我決定就會使矣，伊袂有意見啦。」這是我第一擺見識著啥物叫做「授權」。

啥人知〈台北新故鄉〉佮〈春天花蕊〉竟然造成大轟動，本來是臺北市長的競選歌，煞唱到全臺灣，甚至唱去到海外，自按呢，伊引領起臺灣選舉的新風潮，袂輸若無競選歌，選舉就先輸一半。四年後，阿扁仔欲拚連任，我閣再為伊寫〈有夢最美〉。

一九九七年中，拄著阿扁仔，伊就當面共我講，連任的競選歌會使開始寫矣。毋過，因為先出世的大兄〈台北新故鄉〉、大姊〈春天花蕊〉這兩首選舉歌太衝（tshing）咧，紲落來的壓力有夠大。而且，我寫競選歌有幾原則佮信念：第一、提出選民對未來共同的向望。第二、傳達民主政治的基本概念。第三、對生養土地的愛。第四、堅持作者的自主意識。第五、無欲替特定的政治人物抹粉點胭脂。遮的想法其實佇〈台北新故鄉〉攏已經用誠淺白的文字表達甲清清楚楚矣，「拍開燈火揣希望／希望原來就是咱」講的就是「主權在民、人民做主」；「先來慢到攏相仝／新一代的臺北人」就是咧呼籲「族群平等、互重共榮；咱佇佗生活，遐就是故鄉」。我欲講的話好親像攏佇遮講了矣，閣來到底猶會當講啥？寫啥咧？

足足一年我才寫出〈有夢最美〉，這是我所有的競選歌內底，寫上久，寫著上痛苦，毋過，卻是結果上滿意的一首，雖然無幫贊著阿扁仔連任。

猶會記得佇競選歌曲佮選舉主標題欲發表的前幾工，林錦昌敲電話來講：「阮寫的一寡slogan攏無理想，這嘛著麻煩你鬥相工一下。」我就共〈有夢最美〉上佮意的兩句副歌歌詞「有夢的人上蓋媠（美）／希望永遠伴相隨」濃縮做「有夢最美，希望相隨」的標語，遮暗含兩个意思，「希望」聲調無仝的時，就有名詞、動詞無仝的詞性。這句slogan尾仔煞變做國民語言，無論行到佗，常在（tshiang-tsāi）會看著伊、聽著伊。像我家己就捌看過賣厝、賣車、賣CD、珍珠奶茶店、女子髮廊……攏提這句去做廣告詞，也有學生講，伊佇中國的古裝武俠連續劇內底，竟然看著「有夢最美，希望相隨」的對話。

陸陸續續我寫了阿扁仔兩屆的總統選舉、謝長廷兩屆選高雄市長、蔡明憲選臺中市長、廖永來選臺中縣長連任、游盈隆選花蓮縣長、李應元選臺北市長，以及前兩年（二○一八）陳其邁選高雄市長的競選歌。對一九九四到二○一八，十四年來創作了十八首（含四首的華語版）全世界特有的競選歌。

選舉毋是贏就是輸，但是毋管結果按怎，我攏感覺誠榮幸，因為我會當用作品來關心、參與臺灣的民主運動，盡一公民的責任，甚至改變臺灣的選舉文化，這十八首競選歌袂輸是一部旋律振奮閣自信的臺灣民主政治發展史。

臺灣細細仔，嘛因為無大，所以咱真簡單就會使全島行透透；臺灣雖然無大，毋過每一所在攏有亻因家己的特色，予人為亻因癡迷，佇這本詩集內有真濟寫在地的作品，寫咱生湠的母土臺灣，寫我足百起去主峰山頂尾溜九遍的玉山，寫高雄的蓮池潭、愛河、遷村的紅毛港，寫臺中四百年前傳奇的歷史大肚王、葫蘆墩圳、大里、南屯拍鐵仔街，寫九份、淡水、新店……。海邊到山頂，臺灣頭到臺灣尾，遮爾美麗的所在，真正是〈臺灣〉這首詩所寫的「小小的島嶼萬般豐富／…／有夠幸福這是咱的厝」。

回想我佇第一本臺語詩集《春天花蕊》（皇冠，一九九五）的自序就透露出對臺文書寫用字猶未統一的憂心，二十五年過去矣，佇逐家的努力之下，教育部已經有統一用字的辭典《臺灣閩南語常用詞辭典》，所以《有夢最美》的用字、拼音當然攏是遵照這本辭典。另外，冊愛按怎才有意義？我認為：第一，有人讀；第二，予人讀有。這本詩集內面有袂少的注解，毋是作者跳出來自我紹介詩的技巧藝術，抑是解讀伊的內在意涵，只是干焦做字、詞的讀音佮意思的說明，主要嘛是希望共閱讀的障礙降到上低。

講到遮，我第一愛說謝是周美香老師，這本詩集的臺語用字、注解的標音等，攏是靠伊專業佮頂真的校訂，伊是臺中教育大學語文教育的博士，碩士讀的是新竹教育大學臺灣語言與語文教育研究所，論文《路寒袖台語歌詩的語言美研究──以語音和聲情為中心》就是研究我的臺語詩，會使講誠了解我的作品。我本底是拜託伊幫我做臺語用字校訂，想袂到伊煞參校對嘛看甲真斟酌（tsim-tsiok），有伊共這本詩集看頭顧尾，我就安一百粒心矣。

雖然有注解、標音，毋過我相信一定猶閣有真濟人捎無摠（sa-bo-tsang），出版社嘛考慮著這點，所以，希望我會當親身朗讀所有的詩作，亻因會共朗讀佮歌曲的音檔囥佇雲端，予有興趣、想欲進一步了解的讀者會使對照閱讀。真感謝臺中大千廣播電臺董事長賴靜嫻、台長王榕嬅提供錄音室，佮我主持節目的好戰友王念慈、陳惠英、曾靜凰佇錄音、後製配樂方面的協助，共一份附帶的資料做甲遮專業。

多謝遠景出版社發行人葉麗晴、本身嘛是作家的執行編輯廖淑華，以及美編王英姝，編臺文冊是誠厚工的代誌，而且閣拄著像我這款凡事要求完美的作者，規本冊一改再改，尤其是音標的第八聲，因為電腦轉檔了後會徙位走精（tsau-tsing）去，只好一字仔一字微調倒轉來，多謝亻因的耐心。

最後愛感謝老朋友劉克襄，伊用真濟時間來寫推薦序。二十九年前，伊的第一本小說《風鳥皮諾查》（一九九一）拄完稿、猶未送印進前，先提予幾个好朋友看，問逐家的意見，其中我就是第一讀者，這馬，我這本特別閣蓋有意義的詩集，真歡喜換伊來做我的第一讀者。

對頭到尾，我閣巡一遍這本詩集，總共二十六年貼貼（tah-tah），編編咧，竟然干焦是兩百偌頁的一本冊。這四十六首詩佇出世的時是一款姿態佮風釆，真濟是佮優秀的演藝團體、樂團合作，佇全國各大演藝廳、街頭巷尾、廟埕廣場……奢颺（tshia-iānn）演出過。這馬，亻因閣做伙佇遮徛鬥陣，展現出安安靜靜的文字力量，若按呢，掀開這本冊的時，你嘛是《有夢最美》的第一个讀者。（本文摘自《有夢最美》一書，遠景出版）