【專文】賴清德就職演講應以母語為主

要求賴清德就職演講應該以母語為主，是要予愈來愈聳鬚呣是款的外來赤藍權貴，尤其是親中的藍營立委知影，台灣是台灣人的台灣，台灣呣是中國的一部分，台灣的前途事務咁哪台灣人有權利決定，外來赤藍人和中國人攏無權利！

美國馬里蘭州東海岸的切沙埤海灣(Chesapeake Bay)，出產藍蟳(blue crab)出名。一群朋友炊歸鼎蟳仔作伙擘哩食，是在地流行的交誼文化。對炊蟳仔的經驗，咱會當觀察著二種現象：

一、當咱將一堆活跳跳的蟳仔置落鼎內，在頂面的蟳仔攏會要爬出去逃走，壓在下腳的蟳仔著會將頂面的蟳仔夾住，予頂面的蟳仔祙當脫出鼎外。這種現象叫著「蟳仔籠效應」(crab-bucket effect)，這種心態叫做「蟳仔心態」，著是忌妒、怨恨仝類的別人有成就，認為自己若祙當成功，別人嘛祙使突破困境成功。

金恩博士在1960年代推動民權運動過程，嘛是有遭受一部份非裔的「黑權」（black power）運動者的批判和攻擊，有一擺伊著是感慨勸非裔的美國人，呣通有蟳仔心態，台灣話講的互相扶後腳。

二、當咱將一堆活跳跳的蟳仔置落鼎內，若仝時糝一寡馬里蘭特別炊蟳仔用的香料，號做「漚迷」(Old Bay)，安呢，無蟳仔會爭要逃走，所有鼎內的蟳仔攏乖乖恬恬等水滾、等被煮熟。

用母語演講和炊蟳仔有啥關係哩？

蔣介石爸子流亡台灣建構假「中華民國」民族壓迫體制了後，為著鞏固外來少數赤藍權貴的特權利益，用政治暴力強推「北京話」禁「台灣方言」，做為拆毀台灣人意識和文化的手段之一；台灣話就安呢被壓迫到引起有台灣民族意識的台灣人的警覺，在民主化鬥爭的潮流中，啟動了復興咱自己台灣話的努力。

失去母國的赤藍族群在台灣雖是相對少數，台灣人的善良和愚戇，無堅定執行合理必要的轉型正義，容允怹繼續擁有大部分過去在台灣，憑政治暴力所竊佔的政經、軍事和社會優勢地位和資源，容允怹藉這寡優勢繼續施展反台灣社會正常化的影響力。

現在，這寡反動的赤藍權貴，一點仔著無躊躇公開引進企圖併吞台灣的中共勢力，協助怹維持已經被相當中國化的台灣社會現狀，阻擋台灣社會恢復正常台灣化的趨勢，阻擋台灣人普遍恢復講、寫台灣話，已經是台灣民族鬥爭的一個戰場。

台灣大學歷史系教授周婉窈，4月初1戇人節在人面冊（Facebook）貼一篇《不是愚人節笑話：台灣是偉大的世界奇蹟地！！》，伊內底講著：「台灣真的是奇蹟地…華語本來是壓迫的語言，現在你講台語還會被說壓迫到誰了。」

周婉窈教授所領受的不服被「壓迫」的對象，若是赤藍人中國人，嘿著是怹出自反台灣人的一種民族壓迫心態；若是出自台灣人中間無仝的族群，嘿著是反台灣人爭民族自由和尊嚴的蟳仔心態。

講予白，若是客家或原住民反對賴清德用台灣話演講，認為伊應該用中國話演講，遮著是失去台灣民族立場的蟳仔心態。這種心態基本上是叫台灣人社會，著選擇被糝中國化「漚迷」，大家乖乖屈服接受外來語言壓迫，這種民族是在等水滾、等被煮熟。

正確健康的民族心態，應該是要求賴清德用輔助的方法，予客家、原住民等聽有或瞭解演講內容。

蘇聯1940併吞波羅地海三國了後，執行嚴厲的語言壓迫政策，規定正式場合一定著講俄語。1988年愛沙尼亞本籍的共產黨領袖眉農哇拉斯(Vaino Valas)上任，伊在就職演講，公開用自己的母語向共產黨中央委員會講話，無用法律上規定的俄語，伊勇敢的行動捲起三國民族主義者的激情。

在1989的「600公里自由人鏈」(Freedom Chain)籌備會議中，三國代表攏使用自己的母語發言，拒絕使用共通的俄語，「自由人鏈」撼動嘛感動全世界，促成1990、1991三國先後勝利恢復國家獨立。

勇敢的民族領導者，著存民族責任和遠見，堅定徛台灣人的立場，務實推動台灣民族獨立建國！

專文屬作者意見，文責歸屬作者，不代表本報立場。