(專論)建立台灣的母語語言景觀

咱攏知影台灣是一個語言多樣的美麗島嶼。可惜，本土語言流失真緊。華語親像臭青仔（銀合歡）gâu生湠，共咱的本土語言毒毒死，霸佔台灣的語言花園，予本底多彩的語言花園失去光彩。平常時仔看無本土語言的語言景觀著是一個例。

語言景觀是咱日常看著的文字、聽著的語音及符號。行路踅街的時陣，你會看著濟濟的語言景觀，有的是官方的標誌，親像街仔路名的牌仔，嘛有民間的草根標誌，親像商店、餐廳的看板。若講遮的語言景觀是語言的路燈，你會感覺母語這條路烏暗無光，咱的母語親像風中的蠟燭，無久著會化去。咱著愛佇逐所在建立咱的母語景觀，咱的母語才會當得著氣力，復興閣活。

佇街仔路光焱焱彼爿，你看著的是中語及英語。陳淑嬌教授調查臺北及高雄官方標誌，發現中英雙語佔三分之二，攏用中文的佔三分之一，真罕得看著本土語言。語言景觀反映閣影響語言政策及語言活力。咱逐工用目睭咧體驗的是臭酸的中國民族主義、惡質的威權意識及粗俗的國際化想像，看無母語景觀是語言無公平，閣會影響著母語的保存。

建立台灣母語的語言景觀有濟濟的好處。社會語言學家講語言景觀影響著咱母語的性命力。母語聽會著、看會著，才有活力，才會當傳落去。另外，母語景觀會當增加咱對本土歷史文化的了解，提升咱的在地及台灣認同，培養多元文化的價值觀， 閣有促進轉型正義、拍破語言等級制度及語言歧視。

咱欲按怎行出烏暗悲慘的磅空，走向有光明、有向望的語言景觀咧？咱愛了解國家語言發展法有予咱建立國家語言景觀的權利，街仔路名嘛有相關的法規及程序通好改變。較困難的是說服大眾支持、參與起造母語語言景觀的活動，這著需要有母語意識、語言公平及轉型正義的意識。著是講，需要招募有志作伙佇社區、學校進行在地語言景觀意識啟發的運動，予人了解建立在地語言景觀的重要性。德國的少數民族索布族，為著爭取索布語的街路標誌，佇干焦德語的牌仔貼「索布語佇佗位？」紅底白字的貼紙，尾仔爭取著族語的語言景觀。

意識啟發以外，咱嘛愛對家己做起，開喙講母語，gia̍h筆寫母語文。佇日常生活建立咱的母語景觀，予母語看會著、聽會著。內裡-馬馬尼（Neri Mamani）是克丘亞語的語言運動家，伊的母語長期被邊緣化，所以伊著堅持佇私人及公開的場合攏講母語，建立母語景觀。伊按呢講：「若講咱咧敲電話、上網、坐公車、踅超市… 的時陣無使用母語，按呢，猶有啥人會使用母語？語言是咱上明顯、上有力的文化認同標記。」咱愛學習伊的精神及做法，佇日常生活定定使用母語，咱的母語才袂落落去恬靜無聲的烏暗地。

今，咱對過去的烏暗地，慢慢行向光明。有寡所在已經成功建立在地的語言景觀，親像介壽路改為「凱達格蘭大道」（Ketagalan Ave），竹北市的路牌除了中英雙語，嘛有加上客語的Zhugbed shi，臺南有全國通濟的中正路（三十八條），現此時，嘛有一條中正路改做「湯德章大道」，實踐公平正義的理想。改變需要時間，阮學校頭前彼條西康路改做大學路開十五冬。「無落種，袂收成」透過個人及集體的行動，咱有法度建立母語的語言景觀。

族群主流化的台灣語言景觀定著愛看會著及聽會著台語、客語及原住民語。平平是台灣人，著愛共下作伙照顧拋荒的母語花園，重建台灣多種的語言景觀，復興咱的母語。 （作者為台東大學華語文學系教授、台灣教授協會會員）