Yahoo奇摩新聞 情人節倒數一日未買禮物？ 易整DIY禮物教學
情人節揀禮物絕對係最頭痛嘅一環，如果到今日都重未諗到嘅話，不如試下親手DIY獨一無二的禮物，即使禮物價值唔高，但單單係那份心意，足以冧死對方。但究竟DIY咩禮物最有心意或創意？今日就等個小編介紹大家整四款又容易整又靚嘅禮物啦。
1. 最有創意：底褲花
首先買返條覇氣鮮紅孖煙囪，當然其他色都冇問題，可以視乎你嘅另一半鍾意咩色。將條褲上下兩邊向中間摺，然後由一邊捲向另一邊，其實已經形成成玫瑰形㗎喇！至於花莖，就可以去＄10店買枝假花，然後抆走朵花，最後搵張bubble紙圍住花托，再用透明紙圍翻個用來托住玫瑰嘅space ，最後塞朵花入去就大功告成。
2. 永久保存：無敵乾花
點解話乾花係無敵，因為女仔鍾意收花，但係鮮花又唔擺得耐，如果係乾花就可以滿足到女仔鍾意收花心願之餘又可以永久保存，又可以DIY，實惠得來又貼心。製作方法都好簡單，常用方法有以下三種：
自然風乾
首先揀咗心水嘅花或者花束，然後摘走多餘嘅枝葉，將同類型嘅舊分類。如果係比較大多嘅花，例如繡球花，需要另外用麻繩係莖部下綁實形成小束，然後就倒掛係衣鉤或者繩上，記得要遠離濕氣重嘅牆同保持水平，如果唔係花瓣有機會因為重力而下垂。如果係薰衣草，記得要成扇形攤開，插係大口容器入面風乾。
乾燥劑法
係乾淨嘅盒上鋪滿乾燥劑顆粒，然後放入一朵朵嘅花，再將乾燥劑慢慢灑入花瓣之間固定花形，最後要確保花朵完全埋係乾燥劑內，然後蓋盒就大功告成。如果幾日後見到乾燥粒變成粉紅色，就代表完成架啦。膠粒仲可以循環再用，你要我放喺焗爐用200度嘅溫度焗1小時，就會回復乾燥。
微波爐烘乾法
懶人最愛因為需時較少，不過只適用於較小同扁平嘅花朵或者葉，例如雛菊、玫瑰、金盞花等。 只需要將鮮花或葉子用紙包裹，微波加熱數十秒至一分鐘，直至乾燥就得。
相片來源：afaerytalelife ＠tumblr
3. 最花時間：皮銀包
皮革製品都係呢幾年嘅熱門選擇，香港其實有好多小型嘅手作皮革工作室，會有一啲一次性嘅工作坊，有專人教大家點樣落手整皮革，而且需時都只係幾個鐘，走嘅時候就已經可以拎住製成品，加上有專業導師傍住，想整得核突都幾難啦。除咗銀包之外，其實可以根據對方嘅需要決定整邊一類型嘅製品，例如卡片套、相機套、電腦袋都係唔錯嘅選擇。
相片來源：ctbonvivant ＠tumblr
4. 最Sweet: 手作朱古力／曲奇
如果以上三款對你來講都難度太高，不妨從入門級朱古力或曲奇入手。其實網上都有好多教學，而且講到底基本上就只係將現成嘅朱古力溶咗再倒模，真係小學生都整到。當然佛靠金裝，整完之後加返個靚靚包裝同埋hand made 心意卡，有心意已經加晒分啦。
相片來源：whowhatchic ＠tumblr
