《愛·回家之八時入席》簡淑兒甜美笑容成功吸引網民注意

無綫處境劇《愛·回家之八時入席》收視成績同口碑都一般，可能為咗刺激收視，最近頻頻搵其他女星客串演出。好似之前有宅男女神陳瀅、無綫新咪神張秀文（Sammi）、劉溫馨。其中Sammi仲著上比堅尼，引嚟一班巴打瘋狂cap圖。

去到噚晚，《八時入席》搵咗喺劇中飾演會計部秘書嘅簡淑兒做單元主角，講述自從林小小（毛舜筠飾演）轉職之後，綜藝科員工需要分擔行政工作，阿齊（阮政峰 飾演）就設局為自己暗戀嘅袁冰冰Elsa（簡淑兒飾演）可以成功調職擔任邦主古曉臣（黎耀祥飾演）嘅行政秘書。Elsa第一日去綜藝科返工，阿齊依舊喺小巴站扮偶遇。返到Elsa將親自整曲奇請大家食，阿齊好開心以為自己嘅曲奇係與別不同，其實Elsa送畀十仔（馬貫東）嗰份先係特別嘅心形曲奇。

Elsa擺明鍾意十仔，特登坐喺十仔對面，唔少網民都覺得阿齊做兵好慘。之前《愛·回家》嘅三角戀（馬子仁、思思、木偶哥）都可以做好多集，睇嚟今次呢段三角戀都可以有排玩。唔少網民都大讚簡淑兒好靚、個樣好得意、笑得好甜，有網民仲話佢啲戲演得自然，仲好過港姐邵佩詩，講對白唔會好似佢咁讀出嚟、有佢演嗰集嘅《八時入席》都會捧場睇咁話。

部分留言：

26歲嘅簡淑兒屬於組合少女標本成員，8歲就跟隨屋企人移民到美國生活。大學副修藝術設計嘅佢，2012年參與香港小姐競選，可惜落敗。之後加入無綫做娛樂新聞主播，後來先漸漸為人熟悉。上年與許雅婷Kabby、袁紫僑Coco及溫心Swan組成女子組合「少女標本」。有唔少巴打就因為睇完《3日2夜》後覺得佢好「正」、好得意而迷上佢。上年8月為拍攝《3日2夜》去到名古屋舉行嘅「世界Cosplay大賽」，打扮成卡哇伊學生妹嘅簡淑兒，仲被世界各地嘅動漫迷要求影相。之後就開始參演劇集《愛·回家之八時入席》、《波士早晨》，同埋拍攝中嘅《迷》。

另外，睇番預告，今晚會有新咪神陳偉琪嘅演出，鍾意佢嘅網民記得留意啦！