【扮棋≠冇運行】 努力被肯定！ 吳業坤何遠東齊齊彈起

近年極速彈起嘅吳業坤（坤哥），10年佢參加完第二季《超級巨聲》之後，就一直被無綫投閒置散，一路冇咩代表作。直至到佢喺14年台慶做「棋子」，令一班網民戥佢唔抵，希望無綫可以俾多啲機會佢，唔好嘥咗佢嘅唱歌天份。就係因為咁，無綫俾多咗好多機會坤哥表演同唱歌。首先就參演《愛·回家》第二輯飾演龔嘉欣細佬利樂童，去到而家同何廣沛、張振朗、黃子恆、何君誠組成新五虎正式上位，連而家播緊嘅台慶劇《誇時代》都有佢嘅演出。至於音樂方面，佢就曾經橫掃新人獎，仲喺《叱吒》到連奪三大獎項，人氣一時無兩，甚至比其他「巨聲幫」更加成功。

除咗工作順利之外，佢嘅愛情生活就更加令好多男士妒忌。緋聞女友多到兩隻手都數唔晒！當中包括孫慧雪、Super Girls隊長趙慧珊（ Aka）、Bella（林穎彤）、龔嘉欣、許靖韻（ Angela）、鄧佩儀、Super Girls成員 Heidi、譚淇淇（ KiKi）等等，雖然被網民話佢係「偽毒」扮傻溝女。不過經常被咁多靚女圍住，當然亦係唔少男士嘅夢想啦！

近排有報道話佢上位咁快係因為拜狐仙，不過咁啱得咁橋，另一個同佢一齊扮「棋子」嘅何遠東同樣都係由扮棋子開始就踏上上位之路！

近排憑著劇集《降魔的》角逐無綫頒獎禮「最佳男配角」嘅何遠東入行多年，雖然喺香港演藝學院畢業，不過一路喺無綫都只係做綠葉。由於無俊朗嘅外型，加上身形肥肥白白咁，主角角色當然有排都未輪到佢。不過佢多年嚟都未有放棄佢鍾意做戲嘅志願，無論做咩角色佢都全力以赴，唔怕俾人笑。

就好似由於外形關係，佢經常都要扮肥姐娛樂大家。不過佢就冇放棄，仍然傾力演出，同肥姐神似到連欣宜都讚佢。除此之外，佢就連「蕉」都扮過。而且當年佢同坤哥一齊喺節目做「棋子」，可惜當時所有人嘅注意力都只係放喺坤哥身上，無人留意到另一隻棋子其實演技精湛。

去到《心理追兇Mind Hunter》入面，何遠東飾演弒母殺手。雖然只係出現得五集，不過精湛多變嘅演技就已經贏得觀眾與網民一致讚好。而佢喺《巨輪II》入面飾演田蕊妮嘅細佬姚浩男為咗要證明肥仔都可以做藝人，完全唔介意着女裝跳舞。一班網民睇完都覺得佢好放，仲說：「呢個肥仔好頂癮。」，非常有觀眾緣。

而佢最新喺《降魔的》飾演龍貓一角演得有幾好相信唔使再多講，其中一幕講佢知道自己死咗之後嘅愕然又激動嘅超班演技就更加睇到一班觀眾喊晒，封佢為「綠葉王」兼推舉佢做最佳男配角。

講起又講，莫非係隻棋子旺佢哋？兩個人做扮之後事業都都開始漸入佳境，漸漸為人熟悉，其實做棋都唔係咁差啫！