Yahoo奇摩新聞 最後的收視報告︳唔公布收視 咪冇節目低收視囉
與其解決問題，倒不如解決提出問題嘅人，呢個的確係好有效嘅方法。
TVB尋日宣布，「隨着新媒體的發展，廣大觀眾不再局限於透過傳統電視觀賞節目，同時亦可使用電腦、平板電腦或智能手機等透過多種媒體平台瀏覽，又可隨時隨地到 myTV SUPER 等網絡平台重溫，是以恆常於每周一發放電視直播收視資料已不合時宜，未必能完全反映觀眾收看電視節目的實際情況」。因此TVB將「重點聚焦於公布本台電視節目收視資料，以切合現時的收視數據公布環境」。
而喺呢篇公布後面就示範咗日後TVB公布收視嘅模式。「翡翠台昨（24 日）晚 8 時 30 分直播之《香港金曲頒獎典禮 2021/2022》，錄得跨平台直播最高收視 19.1 點，觀眾 124 萬收看，成績理想」。嗱，引號入面嘅都係官方公布內容，「成績理想」呢4個字都係TVB篇稿入面架。
首先，過去收視資料都係由TVB發布，本來只有翡翠台節目嘅7天跨平台收視（包括數碼頻道、myTV SUPER直播、7天追看收視及家外媒體），舊年5月開始改為公布本地三間電視台直播收視。的確，而家觀眾睇電視好少坐定等直播，數字亦未必反映節目有幾受歡迎。但係假如「廣大觀眾不再局限於透過傳統電視觀賞節目，同時亦可使用電腦、平板電腦或智能手機等透過多種媒體平台瀏覽，又可隨時隨地到 myTV SUPER 等網絡平台重溫」，咁何不公布返7天跨平台收視？。如果「直播收視資料已不合時宜」，「未必能完全反映觀眾收看電視節目的實際情況」，咁你啲sales拎咩去sell客落廣告？
又，將「重點聚焦於公布本台電視節目收視資料」，又有幾「切合現時的收視數據公布環境」？你咪又係拎個2日前嘅show話跨平台直播最高收視19.1 點！唔講以為你整疊有齊觀眾年齡層、收入狀況、觀看時數嘅數據分析我睇添，嚇得我。
而且當日係TVB自行更改公布資料內容，連對家條數都開埋，一年多啲咋噃？點解而家又彈出彈入，以昨日的我打倒今日的我？「電視直播收視資料已不合時宜，未必能完全反映觀眾收看電視節目的實際情況」？個世界快到咁呀？
攤開呢年幾以來嘅TVB收視數字睇，兩線劇集唔過20點係「新常態」，保持2字頭嘅多數係《愛．回家之開心速遞》同《東張西望》。一度大鑼大鼓改革嘅綜藝節目，結果最標青嘅係新聞部主理嘅《尋人記》，下一輯方東昇可以搵下失蹤多時、號稱旗艦嘅《開心大綜藝》去咗邊（仲有《爆足一周》！）。
公布收視唔一定對TVB不利，相反本欄多次提到，ViuTV近半年收視冇咩起色，基本盤3點收視好多時都守唔住，10點半2套綜藝更加慘不忍睹。就算外購韓劇建功，算出色嘅5點收視，同TVB江河日下嘅15點相比，仍然有距離。
既然大台覺得「聚焦於公布本台電視節目收視資料，以切合現時的收視數據公布環境」，咁大家自然識睇條數︰冇公開嘅，即係成績唔多靚仔啦。咁啱睇唔到《童時愛上你》結局周收幾多添，唔知有冇14點？不過我比較想知嚴重爛尾嘅I SWIM到底係升定跌囉。
冇收視數字唔緊要，作為上市公司TVB同ViuTV母公司電盈，點都要公布業績，到時隔離team YAHOO財經一定同你睇到實，佢地班才俊數口好過我好多！
收視報告︳Viu播金像獎收視破10點 I SWIM首播觀眾多一倍
上周（7月11－17日）收視報告可以話係ViuTV近來最搶眼嘅一期。首先新劇 I SWIM開播有5.8點，係今年ViuTV自家劇之中成績最好，果然出鏡仔+肌肉當堂成功吸客。對比上一套口碑麻麻嘅《冥冥之中》，觀眾人數直情多咗一倍。估計 I SWIM第二周收視應該過6點，但係因為只有十集，氣勢相信難以承接。由於 I SWIM收視好，緊接播放嘅綜藝《金像玩家》都有3.7點，算係今年至今Viu兩線綜藝節目中成績稍好嘅一個。
另一個亮點當然係星期日晚嘅香港電影金像獎頒獎典禮，平均收視有10.4點，係今年Viu最高收視節目。同樣因為高收視節目帶挈，連平時大約1點收視嘅7點鐘嘅新聞報道，都倍升至4.6點，好誇張。
由於TVB同Viu嘅支持者好少可轉台睇對家，所以間中先有「搶客」情況。不過金像獎係年度盛事，而且只此一家，因此真係令TVB同時段播嘅《聲生不息》收視下跌。向來《聲》平均有17點左右，而且收視人數十分穩定，但遇著金像獎當堂跌至13.5點。
而面對收視比前周升近3點嘅I SWIM，同時段播放嘅TVB劇《童時愛上你》收視只微跌0.2點至13.8點，所以兩台嘅收視升跌好多時都係互不相干，贏輸都係因為節目質素，畢竟而家觀眾有大把娛樂選擇。講返《童》，三周下來收視一路跌，而家平均14.1點，假如下周收視低過11.2點，就會同史上最低收視劇集《雙生陌生人》睇齊。即使keep住14點附近，都會係年度尾二，似乎高Ling挑戰視后又要等下套劇嘞。
反觀另一套開播TVB劇《回歸》就交到貨，首周有17.2點算係近期唔錯嘅成績。介紹套劇嘅時候都講過，《回歸》劇情唔會有太大驚喜，但觀眾可能寧願要呢啲都好過燒腦，相信後續收視唔會差得去邊，起碼唔怕打破收視低位。
7月4－10日收視報告︳《童時愛上你》收視再下探 開電視《一線搜查》有驚喜
上周（7月4－10日）收視報告，先講ViuTV。稍為值得一提嘅節目有2個︰探討生命話題嘅《21克公寓》升半點至3.3點，相信同陳敏兒分享兩度痛失至親嘅經歷有關。從成本效益計，訪談節目做得好的話實在本少利大。從社會角度睇，呢類心靈治癒系節目，好適合觀眾臨瞓前清一清個腦。另一個係星期六播嘅I SWIM製作特輯。MAKING OF都有3.2點，當然係多得鏡粉，亦可以推算本周播出嘅I SWIM，成績應該唔錯。你地估下過唔過到6點？
好少提及開電視收視，但近來著實有亮點︰被稱為開電視版《東張西望》嘅《一線搜查》，首周收視有2.7點。睇返過去3周，同一時段收視大約係2.2點，以新節目開播嚟計算唔錯，而且做出口碑之後會吸納更多觀眾，當年《今日睇真D》都係一步一步靠唔同搶眼話題（例如解剖外星人），迫到TVB要出招對付。而《一線搜查》亦帶挈林峯主演嘅《黑金風暴》收視升至3.3點。似乎開電視以其人之道還治其人之身對付大台，初步有效。
最後先講TVB。上周播出一連五集單元劇《回歸光影頌》，各個故事嘅收視係「落樓梯」式下降︰星期一龔嘉欣主演嘅《究竟天有幾高》收視最好有17.3點，以近期自家製劇集計更加係飲得杯落。之後嘅單元《母親的乒乓球》已經跌1.1點，到星期五嘅《曙光》已經返到15點。《曙光》亦即係今周首播嘅《回歸》前傳，由此可見《回》都未必開到個靚頭。
至於另一線劇集《童時愛上你》再跌半點至14點。今周有I SWIM打對台，估計對《童》影響未必太大，因為大台同Viu嘅觀眾好少因為對家節目啱睇而轉台，跌數都好有可能因為觀眾棄劇。
6月27日－7月3日收視報告︳《童時愛上你》首周收視唔過15點挑戰《雙生陌生人》包尾地位？
上周（6月27日－7月3日）雖然有長周末，但三台收視似乎未受影響。TVB方面，內地劇《尚食》結局周收19.3點，全劇平均收19點，最高亦過20點，論收視排名似乎好過唔少TVB自家劇，但睇數字其實同過去嘅外購／內地劇差唔多。至於首播嘅《童時愛上你》，我地都估劇種同開台以來最差收視嘅《雙生陌生人》類似，可能成績同《雙》差唔多。結果《童》首周收14.5點，一至五黃金時段嚟計排尾二，仲差過星期日播嘅《青春本我》。上一檔嘅《十八年後的終極告白2.0》個頭同樣開得麻麻，但因為劇情有懸疑性吸引到觀眾中途「上車」，後期收視都有上升。而《童》除非有劇情突破或口碑加持，否則同《雙生陌生人》爭包尾真係唔出奇。
回歸假期自有回歸show，TVB播嘅文藝晚會有23.4點，收視比起唔少大show更加亮麗，亦可能因為當晚8號風球造就好成績。
ViuTV繼續未見起色，多個自家製節目同劇集《冥冥之中》仍未衝破3點慣性收視，音樂節目Chill Club剛過去一集演出歌手比較冷門，令收視再跌至1.2點，都要諗下點樣改動下。反觀talk show《爆谷一周》近期有起色，上周六搵爾冬陞、彭秀慧等導演做嘉賓，收視3.7點更勝張敬軒做嘉賓嗰集。
再睇埋開電視條數，一至五黃昏六點嘅節目《聲東擊西》只有0.1點收視，即係只得大約6500人睇。我諗亞視熄機之後﹐都未見過有節目下探呢個新低。
6月20－26日收視報告︳《十八年後的終極告白2.0》收視史上尾二 林峯周秀娜《黑金風暴》收幾多點？
上周（6月20－26日）收視焦點係TVB劇《十八年後的終極告白2.0》結局篇到底成績如何？結果係16點，全劇平均15.6點一定唔算好，即使對比前一檔嘅史上最低收視黃金時段劇《雙生陌生人》多2.1點，但都係排全年尾二，亦係史上尾二。再睇返資料，截至去年嘅TVB一至五黃金時段劇集收視資料，最差嘅《刑偵日記》有13.8點，尾二係雪藏11年先翻叮嘅《蘭花劫》，有18點。而今年至今已經有《金宵大廈2》、《愛上我的衰神》、《食腦喪B》、《十八年後的終極告白2.0》同《雙生陌生人》差過《蘭花劫》，足以將《蘭》打出史上收視最差劇集前五名！不過由於TVB早幾年曾經只公布跨平台收視，難以同而家計直播收視所得資料作比較。但係以往TVB劇唔夠25點就已經算係仆直，大台劇入屋程度可謂今非昔比。
本來視為有力同TVB搶收視嘅ViuTV劇《冥冥之中》，繼續守住3點「保險線」。但隨住越來越多人恥笑劇情同演員表現，我相信喺其他渠道睇過套劇嘅人唔少。另外由林峯、黃浩然同周秀娜主演嘅開電視外購劇《黑金風暴》，第二周收視升少少至2.2點，起碼超越以往同時段「唔過2」嘅慣性。
臨近回歸25年，TVB多個相應節目之中，除咗新聞部嘅回顧節目《承先啟後廿五載》收視稍為穩陣，其餘都唔算標青。接替收視之星方東昇嘅《尋人記2》有《香港25個第一》，但明顯唔夠叫座力，比《尋》跌近4點至12.4。
6月13－19日收視報告︳三台收視異動分析 星期日TVB收視急跌之謎 特首專訪有幾多人睇？
上個禮拜（6月13－19日）收視報告，碎濕濕咁講下。
－ 一至五TVB收視保持平穩，《十八年後終極告白2.0》稍微反彈至16.1點，《尚食》繼續有19點以上。《尋人記》最後一周同前周一樣有16.1點，呢個成績值得開《尋人記3》。
－ 由TVB嘅《健康100錯》到Viu《恐怖醫學》到開電視《健康原因講多D》都有不俗收視，一向都話軟性醫學資訊節目有市場，TVB自家製呢類節目當然係反應快，但都不妨考慮外購……如果仲有日韓節目未被人買起。
－星期日TVB全線節目收視下跌，連穩陣嘅《聲生不息》都跌穿17點，《東張西望》更誇張地流失4點（約26萬觀眾）。原因？可能係父親節。同樣情況喺母親節同樣發生。
－《聲夢2》再跌1點，之前講過選秀節目要步入中後段先至有反彈，仲要有參加者交出令人眼前一亮嘅演出先吸到客。十幾年前楊宗緯唱《背叛》，同上年Chantel唱《戀愛預告》，都係節目吸納觀眾所必需。睇吓製作組有冇辦法chok到一個搶眼演出啦。
－ 《爆谷一周》一向收視平平，係幾出乎意料，因為香港冇幾多睇得舒服嘅主持人，谷德昭係少數之一，Viu一眾年青主持要學吓。上周反彈到3.4點，因為嘉賓係另一個受愛戴嘅人物張敬軒。
－ Viu節目排陣繼續冇咩亮點，2套綜藝收視都係死死地，《冥冥之中》彈上3點樓上，可能因為網上多人取笑……
－ 開電視星期日播出《特首告別專訪》，收視係0.4點，即係有大約26000人睇，而林太嘅facebook專頁有152803人like。乜咁嘅？
6月6－12日收視報告︳《尋人記》收視高過劇集 《聲夢傳奇2》首集低收唔駛驚
上周（6月6－12日）TVB整體收視出現反彈，一至日黃金時段大部份節目都被前周上升，連一至五6點鐘嘅國民教育式資訊節目都多咗人睇。兩線劇集分別高收一點左右，《尚食》亦步亦趨邁向20點，第2周嘅《18年後的終極告白2.0》都有起色，升到15.6點。但係更威嘅係收視之星方東昇，由佢主理嘅《尋人記》收視16.1點，比《18年後2.0》更高。
周六播出首集嘅《聲夢傳奇2》係少數比上周同時段出現下跌嘅節目，只有12.1點，差過前周播嘅電影《葉問》。不過睇返《聲夢》第一季收視，用作介紹參加者嘅第一集，跨平台計都只有14點收視，到正式比賽先開始多人注意，播出中段收視站穩16點以上。今季參加者水準更高，照計賽事會更好睇，收視應該唔會太差。
好少會提香港開電視，但上周幾個節目《山旮旯睇樓團》、《健康原因講多D》同《空間改造王》收視都高過ViuTV，而Viu出動埋Anson Lo等歌手嘅Chill Club音樂會轉播都只有3.1點。計埋TVB嘅《尚食》，似乎觀眾對外購節目越來越受落。反觀ViuTV，一至五9點半打後都係自家節目，但成績唔多理想，劇集《冥冥之中》開始被網民搵到恥笑位，上周收視跌至3點以下（2.9)，再係咁落去應該會成為公布直播收視資料以來，成績最差嘅ViuTV劇。而2套綜藝《地獄廚神是我媽》同《我哋係COLLAR》繼續唔過3點。
5月30日－6月5日收視報告︳兩台劇集大戰揸流攤 《十八年後的終極告白2.0》《冥冥之中》齊齊低收
上星期（5月30日－6月5日）TVB同ViuTV都有新劇推出﹐Viu仲要出動自家劇，不過數字一出，都幾失望。
緊接TVB史上最低收視劇集《雙生陌生人》出街嘅《十》，首周收14.7點，對比仆直嘅《雙》有近一點反彈，但係居然唔過15點就真係幾惡睇。畢竟《十》第一輯收視口碑俱佳，先至有機會開續集，但係連喪屍題材兼網上播完嘅《食腦喪B》首周都高佢3.5點，確係跌眼鏡。
那邊廂，ViuTV嘅《冥冥之中》搵郭羨妮、劉心悠等掛帥，結果開播只有3.3點，以今年Viu自家劇計係暫時最差。果然題材決定收視，兩台較早前嘅《反起跑線聯盟》同《家族榮耀》，絕對唔係燒腦懸疑劇種，反而成績幾好。創作人係咪應該思考下？
講返TVB，內地劇《尚食》同新聞部製作《尋人記2》分別收18.7及14.6點，保持平穩。因為《日日媽媽聲》低收而臨時上陣嘅《東．南歐潮什麼》果然立即建功有11.1點，起碼收返雙位數。睇返成盤數，上周TVB黃金時段，冇一個節目過21點，似乎仍未擺脫低潮。
ViuTV同樣唔多醒神，一至五2套綜藝節目齊齊唔過3點，以女團COLLAR組成嘅紀錄式綜藝《我哋係COLLAR》只有2.8點，收視低之餘，更值得留意COLLAR聲勢似乎欠缺後勁。不過前輩MIRROR同ERROR都唔係一出即爆，即管俾少少耐性睇睇。
5月23－29日收視報告︳《雙生陌生人》正式成為TVB史上最低收視劇集
上周（5月23－29日）收視報告，印證TVB一個紀錄的誕生！
馬德鐘主演嘅《雙生陌生人》，結局周收視稍為反彈至13.9點，以全劇平均收視13.5點，成為TVB開台55年來，一至五黃金時段收視最差嘅劇集。上年王浩信主演嘅《刑偵日記》，即使有惠英紅、姜皓文助陣，但因為讓路畀奧運延至10點15分播出，加上劇種唔對家庭觀眾胃口，平均慘收13.77點。點知紀錄未夠一年就被打破，而且《雙生陌生人》播出4周以來，收視從未超過14點，同《刑偵日記》先由17.5點拾級而下完全唔同。《刑偵》似係被棄劇，而《雙生》根本難以吸引觀眾興趣。
《雙生陌生人》因為低收視而由25集「被濃縮」至20集，綜藝節目《日日媽媽聲》都有類似情況。上周《日》只有8.9點收視，兩星期下來同10點收視越來越遠，結果今周被梁芷珮主持嘅《東．南歐潮什麼》取代。上星期我地都講過，《日日媽媽聲》第一輯本身已經反應一般，夾硬再開仲要放平日（周一至三），呢個安排真係好難理解。
近期TVB對低收視節目零容忍，都算係一種德政，起碼觀眾唔使眼冤。而且從上周數字嚟睇，早前嘅跌勢似乎已經喘定，《愛．回家》同《東張西望》重返21點以上。而「收視之星」方東昇主導嘅《尋人記II》再微升至14.7點，外購劇《尚食》都有近19點。加上星期日嘅《聲生不息》保持平穩，撇除《雙生陌生人》同《日日媽媽聲》嘅不濟，TVB都算係喜多於悲。
早前疫情高峰令TVB收視上升，對ViuTV影響唔大。但防疫限制逐漸解除後，對ViuTV嘅影響似乎大過TVB。上周最高收視嘅《恐怖醫學》得3.4點，一至五兩套韓劇僅僅貼近3點基本盤。負評多過乜嘅《瘋火與膠七》連2點都冇。今周播出嘅《我哋係COLLAR》唔止對出道聲勢先升後回軟嘅COLLAR係考驗，亦係ViuTV呢期必需嘅收視救亡丹。
5月16－22日收視報告︳收視救星方東昇 《尋人記2》淡市驚喜 《雙生陌生人》等做史上最差
上周收視報告（5月16－22日）焦點係TVB出動《尋人記2》同內地劇《尚食》打救收視，到底有冇成效？
先睇《尋人記2》，第一、二集主角係投訴王安仔，收視14.3點，非常之有交代。以10點半綜藝嚟計，對上一次有呢個數已經係一個月前嘅《三餸一湯》。估計隨住節目煲起話題，後段嘅主角人物夠綽頭的話，應該仲有得升。而周一至三出街嘅《日日媽媽聲》有比較有傷害，只得9.5點。上年《日》收視都係麻麻，再做第二輯嘅理由……可能係搵到個客贊助啩。
劇集方面，《尚食》首周有18.4點，亦係相當唔錯。似乎香港觀眾對內地劇越來越受落，唔止一眾大台製作人要打醒精神，藝員都似乎唔可以再借大台劇入屋優勢搵食。而「被濃縮」成20集嘅《雙生陌生人》上周再跌至13.1點，即使有評論話劇情終於步入佳境，但係無力回天，要等做史上最差收視劇了。
《聲生不息》上周有17點，幾周下來應該穩守呢個數。下個月再推埋《聲夢傳奇2》，大把歌聽啦觀眾。「音樂綜藝」收視有保證，TVB仲繼續開「掌門人」成效會點？
到Viu，上星期冇晒鏡仔孭飛節目，2套綜藝都過唔到3點收視合格線。《瘋火與膠七》keep住2.3點低位。就連最好成績嘅《恐怖醫學》／《大發不動產》都係得3.6點，之後播嘅自家劇《冥冥之中》真係不容有失，又或者快啲推全人類期待嘅i Swim啦。
5月9－15日 收視報告︳《雙生陌生人》邁向史上最差收視劇集 TVB又加備註踩Viu 今次講乜？
之前都提過，TVB發布嘅收視資料，間唔中會有幾行備註，補充未有涵蓋嘅資料。話就話備註，但通常有亮點，例如年頭《青春不要臉》出街，收視普普通通，但係收視資料下面就標註「《青春不要臉》內地豆瓣評分7.8分，佔一周華語口碑劇集榜第8位」，仲提供埋ViuTV劇《IT狗》豆瓣評分係5.9呢項資料。用意何在？自己諗啦。
尋日發布嘅收視資料又有「備註」，梗係立即睇！內容有2點︰星期六晚直播英格蘭足總盃決賽，平址收視8.7點，最高11.6點，賽前《球迷派對》平均7.7點。好正路吖，唯一思考位︰免費波都係得100萬人睇，平時NOW嘅足球賽訂戶人數查實可以有幾多？另一點，啄正ViuTV。J2星期日晚跨平台收視2.6點，仲提到「超越ViuTV同時段之2.5點」。而當晚播嘅電影《保持通話》平均3.1點，最高4.3點。
咦，J2個數係跨平台收視，Viu係直播收視喎……話時話，既然曾總經理話ViuTV收視只可以同J2相提並論，咁不如TVB公布埋J2收視資料啦，咪仲威！
好喇，返正題。有備註，可能因為要轉移視線。TVB上周(5月9-15日)收視起碼止住跌勢。《愛回家》同《東張西望》都微微反彈。《雙生陌生人》開播得13.5點令人嘩然，第2周keep住同樣數字，保持水準的話應該好大機會「鍊贏」《刑偵日記》成為開台55年以來收視最差劇集。結局周嘅《食腦喪B》不升反跌低收15.5點，開播以來未升過，全劇平均收視16.5點，以一至五黃金時段劇集計係今年最差，計埋周日播嘅《青春本我》先至叫尾二咋，陰功。好在TVB星期日收視全線彈起，《東張》更加比前周勁升4點，《聲生不息》都升2點至17.2點。
Viu都唔見得幾好。自家製綜藝《勁騎26》跌到3點樓下，被瘋狂負評嘅《瘋火與膠七》更加得2.3點，證明Viu冇幾多慣性收視揮霍。
5月2－8日收視報告︳差過《刑偵日記》《雙生陌生人》得13.5點 《肥美人》決賽同樣不濟
上星期（5月2－8日）收視嚟講，TVB 同ViuTV一樣有要鞭撻嘅地方！講咗成個月，因為防疫限制解除而令TVB收視下滑嘅勢頭仍未停止。上周首播嘅《雙生陌生人》首當其衝，只有平均13.5點！畀個數字你參考︰史上最低收TVB劇《刑偵日記》，舊年因為讓路俾奧運，調到10點15分播，結果本來疲弱嘅收視再跌至11.4點。《雙》冇奧運因素，時段仲係9點半，只得13.5點真係好大件事。而且首周已經低收，除非口碑超好，之後應該難有起色。如果全劇平均唔過13.8點，就會「打低」《刑偵日記》成為史上最低收視劇集。
另一套劇集《食腦喪B》上周再跌1點至15.8點，暫時平均唔夠17點，好大機會係年度榜尾三甲。而「兩大王牌」都keep住21點左右，而《愛．回家之開心速遞》就跌穿21點，星期日一集更加比上周跌2.5點得16.9點。
ViuTV一樣響警號。上周六《肥美人》決賽只有3.5點收視，完全偏離Viu台大show 5點水平。而全周冇個節目收視「過4」，連《恐怖醫學》都只得3.1點。而Chill Club同《爆谷一周》更加齊齊唔過2點。新上任嘅ViuTV總經理鍾廣德要諗下辦法喇。
4月25－5月1日︳《金宵大廈2》慘成年度包尾 TVB兩大皇牌失守20點
今次收視報告（4月25－5月1日）先講TVB劇集成績。上周大結局嘅《金宵大廈2》竟然打破「結局必升」嘅定律，以15.6點黯然收場。全劇平均收視17.4點，暫時成為今年度「包尾大幡」。本來《金》因為口碑好而開續集，論質素同上輯唔爭太遠，但係比收視的話，《金宵大廈》以跨平台計算係2019年年度季軍，的確始料不及。而第2周嘅《食腦喪B》同樣報跌，上周收16.6點，再係咁落去好大機會墊住《金宵2》。
連續關注咗好幾個星期疫情同TVB收視嘅關係，上星期收視全面反映放寬防疫限制嘅影響，見到2月尾疫情爆發時超過27點嘅《東張西望》同《愛．回家之開心速遞》（周一至五），上周已經回落到21點左右，比前周少咗2個收視點左右，基本上已經回到舊年疫情受控時嘅水平，星期六兩個節目嘅收視亦再次跌到18點附近。加上前述嘅劇集低收情況，除非網上收看人數好鼎盛，否則都幾肯定年初嘅TVB收視「小陽春」告一段落。
比較出人意表係首次喺直播頻道推出嘅內地合拍音樂節目《聲生不息》，連續2周企穩16.9點。有評論認為節目係豪裝版《流行經典50年》，從收視成績睇又的確係。
正所謂「一節淡三墟」，ViuTV上周日搞完Chill Club頒獎禮，上周整體收視立即無咩聲氣。《肥美人》連跌2周至3.8點，坊間唔多buy以節目軟銷大碼女士有美態有自信嘅觀點，而且節目環節未見新意亦唔算有太大迴響，似乎要捱多陣。同期各有MIRROR成員做主持嘅綜藝，聽聞唔少人睇完《Go執事務所》而「落坑」迷上Jeremy，另一成員Alton就有「自肥」成份嘅電單車節目《勁騎26》。結果上周《勁騎26》以3.7點險勝有3.5點嘅《Go！執！事務所》。
4月18－24日︳TVB跌勢未止 《聲生不息》大戰《Chill Club頒獎禮》邊個成績有驚喜？
呢幾個禮拜都關注緊同一個問題︰因為疫情嚴峻，多咗觀眾睇電視，因而造就嘅收視「小陽春」，會唔會喺防疫限制逐步放寬而下跌？上周四晚市堂食重開，對上周（4月18－24日）TVB直播收視又有幾大影響？
繼續以節目形式固定嘅《東張西望》及《愛．回家之開心速遞》做比較，星期一至五嘅收視比上周跌一點左右，分別收24.3及24.9點；星期六比較嚴重，《東》跌3.8點而《愛》跌3.4點。至於星期日《東》跌2.4點而《愛》跌1.4點。
再睇埋其他節目︰《金宵大廈2》跌勢未止，上周低見16.5點，重返上年劇集收視低迷位置；新劇《食腦喪B》好少少，開播有18.2 點，但比起《機智女法醫》首周同結局嘅23.1點，頓時高下立見。明顯見到TVB直播收視受影響，但唔排除觀眾多咗出街之後，轉為網上睇重溫。
周日晚嘅兩台音樂節目又如何？可以話無驚喜。《聲生不息》有近17點，《Chill Club頒獎禮》有5.8點。論人數點數TVB當然贏幾條街，不過對比之前同時段嘅綜藝The Show Must Go On，2集平均都有17.6點，以《聲》嘅歌手陣容收視只係稍勝《聲夢JUNIOR》梗係說不過去，但係音樂競賽節目往往到後期更緊湊，可以睇多幾集再定奪。
至於《Chill Club頒獎禮》嘅收視大概維持ViuTV大show水平，由於上年TVB未有公布埋友台收視，所以未能比較兩屆頒獎禮收視。但係我希望下年《Chill Club頒獎禮》嘅鏡頭唔好咁搖晃，同埋block咗台後「何啟華」燈牌個位。
4月11－17日︳《金宵大廈2》未見起色 《肥美人》突擊成功 兩台各有節目慢慢升
由上周（4月11－17日）收視資料所見，TVB黃金時段節目收視未見起色，一至五嘅《東張西望》及《愛．回家之開心速遞》分別有24.3及24.9點，已經係連續4周下跌，如果睇埋周末嘅收視，跌幅更為明顯，2個節目相對一個月前跌3－4點。坊間口碑唔錯嘅《金宵大廈2》微跌收18.5點，對比《家族榮耀》都幾大落差。早前假期都見到唔少人出街，市民見疫情好轉多咗外出，今個禮拜晚市堂食重開，會唔會令留喺屋企睇電視嘅觀眾更少？過2周睇收視報告就知。
稍為可喜係結局周嘅《機智女法醫》收23.1點，比上周升近1點。《機》全劇平均23點，外購劇而言算不俗。新登場綜藝《三餸一湯》有15.2點，保住大台烹飪節目15點基本盤，而且比曾總經理落場嘅《講你都唔信》更好成績。
值得一提係，星期日嘅訪談節目《諸朋好友》近來收視慢慢爬升，由初期8點附近升到上周終於過10，其實訪談節目向來有捧場客，放早一啲出街效果或者更好。
ViuTV都有呢類慢慢吸客節目，就係做咗一段時間嘅《今餐有料到》。細心睇數字，原來近排由2點逐級上，上周已經有3點了。再次證明，烹飪show的確長做長有，台灣嘅《型男大主廚》就係例子。
講返Viu，上周最高收視嘅節目居然唔係《恐怖醫學》，而係首周有4.5點嘅新節目《肥美人》。選秀（或稱另類選美？）向來係ViuTV賣點，要keep住4點以上應該唔難。
4月4－10日收視報告︳《金宵大廈2》首周低收 TVB又出豆瓣評分轉移視線
上周（4月4－10日）收視焦點，主要係睇備受期待嘅TVB新劇《金宵大廈2》開播成績。早前疫情高峰期，市民留家抗疫，造就TVB黃金時段節目收視上升。而家限制措施未完全解除，但從前周分析所見，抗疫帶動嘅收視效應似乎慢慢減退。而適值呢段時間出街嘅《金宵大廈2》首當其衝，首周收視只有18.8點，反觀口碑普通嘅《飛虎3》開播有22.4點，以《金宵大廈2》頭2個單元嘅反應，呢個數的確跌眼鏡。而TVB亦重施故技，喺收視報告上面標註《金宵2》喺內地豆瓣評分有8.5分，成為一周華語口碑劇集榜冠軍，哦。
之前所講疫情效應減退造成收視下跌，可以由其他收視硬淨節目嘅成績可見。《東張西望》及《愛．回家之開心速遞》前周都有26點，上周跌至25點左右，星期日2個節目更加跌2點。首2周保持23點以上嘅《機智女法醫》，上周跌1點至22.3點。《講你都唔信》跌半點至14點，《芬蘭潮什麼》跌2.3點至12.5點。
至於ViuTV，由於收視基數低，疫情效應唔太明顯，所以上周收視唔算有太大上落。劇集《反起跑線聯盟》結局周再微升至5.4點，整體成績唔錯；大改革嘅《MM730》比之前嘅《囝囝囡囡730》收視冇太大分別；新綜藝節目《為食家族》終於造出同時段近期最佳成績，開播周有3.8點。
3月28至4月3日收視報告︳《飛虎3》收視平平 都夠贏晒舊年4套台慶劇
上周（3月28至4月3日）3台收視對比前周大致平穩，但筆者嘗試對比個多月前疫情開始爆發時嘅水平，就發現「受惠」於較多觀眾留家收睇嘅TVB，上周節目收視稍微回落。以平日兩大王牌《東張西望》及《愛．回家之開心速遞》為指標，2個節目3月第一周（星期一至五）收視都衝破27點，而上周就齊頭26點。可以留意多2周嘅數字，尤其是晚市堂食重開之後，TVB收視會否打回原型，相信大台到時亦有兩手準備。
劇集方面，第2周嘅《機智女法醫》微升至23.4點，數字尚算不俗，亦證明劇本質素嘅重要。而上周播完嘅《飛虎3壯志英雄》埋尾重上21點，全劇平均收視約21.5點，以疫情之下人人留喺屋企嘅狀況計梗係唔算好。但係留意返，呢個數字已經勝過今年初口碑唔錯嘅《青春不要臉》，甚至贏晒舊年4套台慶劇，而且放諸舊年21.5點收視已經係打入劇集三甲。一套劇幾時播，可能緊要過拍成點，你睇吓《刑偵日記》……
另一個亮點係剛過去周日2套綜藝節目《思家大戰》及新推出嘅The Show Must Go On，後者第一集有18.8，相當唔錯。但係節目口碑麻麻，網民認為環節同《獎門人》大同小異，咁係咪會冇咩後勁？好難講，因為香港觀眾其實好鍾意睇《獎門人》。而《思家大戰》就站穩陣腳有近20點，諗起半年前嘅一面倒唔睇好，更重要係李思捷可以洗底成功。
而Viu嘅焦點就係劇集《反起跑線聯盟》，上周保持5.1點，今周就係結局，大致應該都係呢個數。收視之王依然係《恐怖醫學》（5.4點），而一至五新綜藝節目1 TAKE過有2.5點。Viu10點半打後2套綜藝時段，今年似乎得《神的女主角》靠Anson Lo而有好表現，有關方面要留意下。
3月21－27日收視報告︳兩台新劇《機智女法醫》《反起跑線聯盟》成今年開播最高收視劇集
上周（3月21－27日）TVB同ViuTV都有新劇出街，向來播內地劇成績普通嘅TVB今期播口碑唔錯嘅《機智女法醫》，而近期播外購劇成績好過自家劇嘅ViuTV就播原創劇《反起跑線聯盟》，結果係點？
TVB力sell《機智女法醫》喺內地本來被恥笑「全部演員十八線」，但係靠口碑成為年度十大高評分劇。呢個策略加埋紮實劇本，嚟到香港首周有23.1點，成為去年至今開播劇集最高收視。呢種查案劇向來有捧場客，預計其後集數收視都會向上。至於另一線TVB劇《飛虎3壯志英雄》終於「打破悶局」，不過係掉頭向下，由過去幾周平均約22點跌至近20點，明顯見到「棄劇」潮。
上周大台仲有綜藝節目《講你都唔信》同《芬蘭潮什麼》新登場，不過真係「講你都唔信」，掌門人曾志偉總經理領軍嘅《講》收視14.5點，比《芬》少半點，對比上周肥媽嘅飲食節目更見高下。另外TVB眼見周六晚播舊戲有市場，將會一連七周推出多套港產片，上周播嘅《賭俠大戰拉斯維加斯》有17.5點，算3不過不失。
而Viu嘅《反起跑線聯盟》亦有亮麗成績，首周有5.1點，力壓王牌《恐怖醫學》成為全周節目收視之冠，劇集要有呢個數字已經係上年嘅《大叔的愛》，算係為自家劇爭一口氣，亦為ViuTV創作團隊開啟新方向 － 唔駛吓吓都扭橋或者出MIRROR，都可以有好收視。
3月14－20日收視報告︳兩台劇集大結局 《家族榮耀》創1年半新高 《940920》低收
上星期（3月14－20日）收視焦點係2間電視台各有劇集大結局，到底成績如何？
TVB嘅《家族榮耀》越播越有，結局周平均收26.3點，上周五大結局收27.4點順理成章係全劇最高，全劇收視平均24.7點亦係大台18個月以來成績最好嘅劇集。經歷多套劇集喺20點左右苦苦掙扎嘅時間，TVB劇終於上返過往收視水平，對上一套直播成績彪炳嘅已經係《反黑路人甲》。《家族榮耀》亦超越埋上年收視之冠《逆天奇案》，相信隨住防疫措施放寬，市民可以外出晚膳，今年其他劇集要挑戰《家》確有難度。
另一套劇集《飛虎3壯志英雄》保持近22點收視，之後應該都係呢個水平。而一至五十點半由肥媽陸浩全面進場，《煮．野食》及《全民居家煮嘢食》平均有15.8點，以呢個時段計算係唔錯，亦見到當日「限廚令」幾咁無謂。因為《聲夢傳奇》嘅口碑，《聲夢JUNIOR》本來有望複製成績，但礙於參加者水平未見突出，收視連續2周喺13點樓下。
輪到ViuTV，十集自家劇《940920》結局周比上周微跌有3.8點，以Viu製作嚟計唔算太好，可能同觀眾評價麻麻有關。本周播嘅《反起跑線聯盟》未知成績，但製作特輯都有3.3點成為周六最高，似乎劇集出街後成績會有驚喜。
3月7－13日收視報告︳TVB收視稍跌 《940920》力保Viu自家劇收視水平
繼續係留家抗疫時期，上星期（3月7－13日）TVB節目收視卻出現下跌，一至日嘅《愛．回家之開心速遞》、一至五10點半綜藝《煮野食》、《學是疫學非》都比前周跌1－3個收視點不等。第2集嘅《聲夢JUNIOR》比較大鑊，比3周前播出嘅第1集下跌近4點至12.9點，可能同參加者表現有關。
王牌節目《東張西望》星期六嘅收視都比前周少3點，但一至五只跌半點，周日更微升，稱為TVB最有價值節目都真係當之無愧。收視未跌過嘅外購劇《家族榮耀》終於有「回吐」，上周收25.3點，但相信唔影響劇集成為（暫時）年度之冠。另一線劇《飛虎3壯志英雄》企穩21.8點，不跌就是贏。
Viu上周焦點應該係新劇《940920》，首周有4點，算係保持Viu自家劇嘅水平。上一套Viu出品《IT狗》首周有4.1點，但《IT狗》有MIRROR成員Lokman(楊樂文）、Frankie（陳瑞輝） 及Stanley（邱士縉）孭飛，向來有鏡仔出場嘅節目都會多人睇；《940920》冇MIRROR效應，劇情同前作《2月29》有連繫，冇睇未必知脈絡，有4點算係合格有餘。另一個新節目《打開你雪櫃》有2.9點，總算挽回《聲控鬥室》嘅頹勢。
呢期外購節目依然係ViuTV MVP，《恐怖醫學》5.3點成為全周冠軍，韓劇《女神降臨》有4.3點，仲好過《940920》。之後Viu仲有2套自家劇緊接《940920》出街，仲要2套都冇MIRROR成員主演，會唔會保得住Viu嘅3點基本收視？
2月28日－3月6日︳TVB多個節目衝破25點 《家族榮耀》繼續升 結局上望30點？
疫情依然嚴峻，上周（2月28日－3月6日）收視報告繼續反映TVB受惠於市民留家抗疫嘅新生活常態。黃金時段多個節目收視都衝破25點呢個近年少有達到嘅指標。星期一至五《東張西望》、《愛．回家之開心速遞》到《家族榮耀》呢2個鐘頭播放時間，3個節目平均分別有27.6、27及25.6點收視。平時收視較低嘅星期六晚，《東張》同《愛．回家》甚至有28點左右，十分誇張。
《家族榮耀》由開播以來收視逐級上，現時整體平均有24.1點。去年最高收視嘅《逆天奇案》，由於播出時撞正TVB改變收視計法，由跨平台收視改為公布直播收視，數字難以比較，但睇返《逆》最後3周平均都係24點左右，可見《家族榮耀》未入戲肉已經取得優異成績。加上疫情未來2周恐怕唔會即時降溫，繼續留家抗疫嘅觀眾依然唔少，大結局上望30點絕對有機會。
至於另一套劇《飛虎3壯志英雄》卻不升反跌，下滑0.6點至21.8點，似乎後續收視都會介乎22、23點左右，難有突破。而星期四、五晚新推出嘅《學是疫學非》食正抗疫同《學是學非》2個煞食元素，首周有16.4點，應該係近半年來呢個時段嘅綜藝節目之中最標青嘅收視。
而Viu繼續靠外購節目頂住，兩套韓劇《女神降臨》同《The Penthouse上流戰爭》都有超過4點收視，星期日《恐怖醫學》更有5.9點，呢個係Viu直播大show先有嘅數字！上周慘到唔夠2點嘅《聲控鬥室》由於有Mirror成員Tiger、Alton同Error嘅阿Dee做嘉賓，終於彈返上2.3點，再次見證MIRROR嘅吸力！
2月21－27日︳疫情下《東張西望》再破紀錄 Viu再靠MIRROR食糊
上周（2月21－27日）三台收視繼續受疫情因素左右，個案日破萬宗令唔少人都留家抗疫。之前都講過，呢段時間電視收視真正得益嘅只有TVB，因為本身年長觀眾群夠多。《東張西望》呢類軟性資訊節目最啱俾關心疫情嘅市民收睇﹐之前已經漸見升勢，上個禮拜一至六平均再上到27點樓上，周日更衝破28點，係2019年3月開拓埋周末時段以來最高。拍住上嘅《《愛．回家之開心速遞》都不遑多讓，一至五有27.4點，周末都有25點以上。
TVB近期收視好轉亦同節目排陣有關，大台拿手嘅豪門恩怨劇《家族榮耀》再升至24.6點，完全唔受網上平台一早播晒全劇嘅因素影響，照走勢睇好大機會打入今年收視三甲，TVB亦可以考慮再斬四兩。另一套合拍劇《飛虎3壯志英雄》開播有22.4點，對比舊年唔少劇集首周20點左右嘅成績算係標青。
周日綜藝方面，首播嘅《聲夢JUNIOR》有16.8點，舊年嘅《聲夢傳奇》喺例牌收視較低嘅星期六晚播出，大部份時間都係17點左右，但呢類歌唱選秀節目多數要去到中後段先至入戲肉，收視同人氣亦會上升，可以期待。
ViuTV母公司電盈上周出業績，焦點係受MIRROR大紅效益之下，ViuTV及相關業務收入倍升，而今個禮拜Viu節目《爆谷一周》亦係靠MIRROR食糊。過去幾周節目收視3點左右，上周六一集嘉賓有MIRROR嘅Lokman、Alton同Frankie以及經理人花姐，收視立即彈上4.5點。不過一無MIRROR，自家製節目當堂失色，一至五2套綜藝《商戰》及《聲控鬥室》收視再跌，分別得2點及1.7點。《聲控鬥室》由MIRROR同門師弟P1X3L主持，但完全無聲無息，更令人擔心呢隊3人男團未來走向。而本來接替《商戰》嘅《1 Take過》有MIRROR成員Tiger主持，可望帶起收視，但因為疫情而被抽起改播《今日疫情》，恐怕ViuTV要靠MIRROR谷收視都要等一等。
2月14－20日收視報告︳《鐵拳英雄》收個靚尾 疫情谷起《東張西望》收視
上周（2月14－20日）TVB收視繼續因為防疫措施及疫情下市民在家抗疫而有不俗表現，《家族榮耀》微升至23.3點，而結局周嘅《鐵拳英雄》再升至22.8點，大結局平均收視直情有近26點（最高27.1點），對比開播時嘅20點邊緣，以呢個卡士計算係合格過關。而《家族榮耀》如果能夠保持喺現有收視水平，就有望成為年度收視前列，打破合拍劇收視麻麻嘅定律。
疫情之下新聞資訊節目自然多人睇，《六點半新聞報導》有17.5點，對比1個月前嘅14.8點大有進步，而《東張西望》周一至六有近26點，星期日晚甚至有近28點，相當難得。雖則而家娛樂方式眾多，但大台主要客源年長觀眾都係比較忠實嘅「電視粉」，接收疫情資訊自然係睇電視先。
因此可以理解到，主打年青觀眾嘅ViuTV喺呢波疫情下，並無出現大台嘅明顯收視增長。收視破5嘅《哲仁王后》播完後，接檔嘅韓劇《女神降臨》有4點收視，已經係一至五黃金時段最好。自家製綜藝節目《商睇》及《聲控鬥室》分別只有2.5及2.4點，守唔住3點慣性收視之餘，亦係少數喺社交平台冇咩討論嘅ViuTV節目。上周其他自家製節目表現都係麻麻，外購嘅《健康要Fact Check》繼續係鎮台之寶，有4.9點。
去年上半年Viu有好多未出街已經令觀眾期待嘅節目，例如《大叔的愛》、《ERROR自肥企劃》、《調教你MIRROR》等，但今年數極都可能只係有拍起冇耐、冇咁快有得睇嘅劇集《i Swim》，加上部份節目已出現固有格式，新鮮感驟減。4月Viu 台慶會唔會公布更多話題節目等大家餓下？
2月7－13日收視報告︳疫情爆發TVB收視再升 《家族榮耀》首周創新高
早前嘅收視報告分析過，政府防疫措施推出之後，晚市無得堂食令市民夜晚唯有返屋企睇電視，造就TVB嘅收視上升。呢期疫情爆發仲日日過千宗，條街夜晚冇人行，會唔會令收視又有驚喜？
大台收視指標之一係《東張西望》同《愛．回家之開心速遞》，兩個節目上星期（2月7至13日）分別有25.1同26.3點，重返剛剛晚市禁堂食嘅水平。另一個觀察︰近半年來一至五10點半綜藝節目，收視大約係10－13點左右，但係上周新出街嘅《煮．野食》同《不可能任務》，居然有16.3同15.2點。
而兩線劇集亦有好成績。電視首播嘅《家族榮耀》有22.9點，2021年以來計算，呢個開播數字係第2高收視，僅次於《逆天奇案》。而播出以來收視同口碑都普通嘅《鐵拳英雄》，上周有突破反彈至22.4點，係咁多個禮拜以來最好。星期日表現同樣理想，《東張西望》同《愛．回家之開心速遞》都有25點以上，《青春本我》同《思家大戰》都有起色，後者甚至接近20點。
ViuTV嘅上周收視變動就冇咁大，近期鎮台之寶《哲仁王后》再次有5點以上，接力嘅《女神降臨》都有4.2點，以Viu 3 點慣性收視計絕對理想。另一王牌《健康要Fact Check》（星期日）甚至去到5.9點，係Viu嘅現場大show先有呢個數字。留意返，呢啲都係外購節目！
－－－－－－－－－－－
1月31日至2月6日︰特別標註《青春不要臉》、《IT狗》內地豆瓣網評分比高低 TVB咩玩法？
每星期TVB都會發佈3台收視資料，除咗收視數字之外，如有特別紀錄(多數係TVB節目)都會喺文件下方註腳打*提醒傳媒。今期(1月31日至2月6日)收視報告下方，其中一項打星嘅，就係提到「《青春不要臉》內地豆瓣評分7.8分，佔一周華語口碑劇集榜第8位」。豆瓣網係內地影視文化產品評分平台，分數由內地網友點評，呢項資料都係首次喺官方收視報告見到。最妙係同一份報告入面，提供埋ViuTV劇《IT狗》豆瓣評分係5.9呢項資料。
咁不如我地又睇吓近期TVB劇嘅豆瓣評分︰《青春本我》有6.4分、《家族榮耀》有5.7分，稍遜於《IT狗》。至於收埋倉底多時嘅《鐵拳英雄》暫時未有評分。
翻查資料，原來內地多個政府互聯網機關，去年1-11月期間就曾經因為豆瓣內容違規而判罰款合共900萬，豆瓣app上年12月仲被工信部下架。內地傳媒亦有報導，豆瓣因為fans亂咁評分捧偶像踩對手，一早為人詬病，更出現過內地劇集《風起洛陽》因事延遲一小時播放、但劇評喺原定播劇時間出現嘅「劇未播分已評」情況。到底TVB之後喺收視報告會唔會再提供豆瓣嘅評分？將香港收視成績同內地網民評價放埋一齊用意何在？睇吓TVB有冇興趣講吓啦。
講返收視，《青春不要臉》上星期一至三收視20.1點，比前周一至五平均21點跌0.9點，而星期六大結局有18.4點。上星期係農曆新年，跌數唔出奇，《青》播放三周收視逐級跌都可能係呢個原因引致。前周收視反彈嘅《鐵拳英雄》打回原形收20.4點。上周TVB亮點反而係星期五嘅冬奧開幕禮，根據備註資料，儀式喺翡翠台及J2直播收視最高有30.1點，都係近年少數過30嘅TVB節目。
Viu方面，「豆瓣評分5.9」嘅《IT狗》結局周成為全台最高收視節目，有4.8點，係劇集播放以來最高，而上次介紹過嘅韓劇《哲仁皇后》稍跌至4.7點。由七師傅主持嘅《七福星》反應唔錯，第2周仍然有4.4點。
1月17－23日收視報告︳晚市禁堂食效應減弱 TVB收視報跌 Viu外購劇多人睇過《IT狗》？
上次收視報告分析過，黃金時段三台收視上升，原因可能係食肆禁晚市堂食嘅防疫措施，令唔少人留喺屋企，於是多咗人睇電視。上周情況又點？
前周收視明顯上升嘅TVB，今次報告所見數字有所回落。一至五嘅《東張西望》同《愛．回家之開心速遞》分別由24.5及26點下跌至24.1及24.8點。十點半綜藝《新春開運王》由14.3微跌至13.5點。星期日嘅《青春本我》同《思家大戰》都同樣錄得跌勢，咁多個黃金時段節目之中，只有《星期日檔案》、《識貨2》同埋周末電影《賭城風雲III》有升幅。
劇集方面，第二周嘅《鐵拳英雄》比前周微跌半點險守20點邊緣，以陳展鵬唐詩詠掛帥嘅卡士來講都幾跌眼鏡，亦間接證明套劇收埋咁耐可能真係同質素有關。新劇《青春不要臉》有21.1點，比《異搜店》大結局流失28萬觀眾，但對比返同樣係新一代藝員何廣沛搭陳曉華嘅《異搜店》開播都係19點，《青春不要臉》算係有交代有凸。
反觀ViuTV收視無太大分別，當然可能同觀眾人數較少有關。最值得討論嘅係外購韓劇《哲仁王后》，播放4星期以來收視捷捷上升，由開播嘅3點升至最新嘅4.7點，成為全周最高收視節目，連自家劇《IT狗》（4.6點）都屈居其後。《哲》係改編自內地網劇《太子妃升職記》，喺韓國播放時收視都係逐步爬上冠軍位置。對於較少資源做製作嘅Viu嚟講，呢套劇嘅成績絕對有參考作用，亦可以考慮買埋越來越多人追嘅泰劇，甚至係灑狗血到不能嘅台灣鄉土劇！
1月10－16日收視報告︳晚市禁堂食效應？ TVB兩線劇見佳蹟 《異搜店》大結局創1年半新高
上次提到因為政府嘅防疫限制措施禁止食肆晚上6點後供應堂食，政策生效後嘅首個周末三間電視台收視都錄得上升，估計係少咗人出街食飯令電視觀眾人數上升。呢次嘅收視報告紀錄「冇晚市」整個星期收視情況，果然三台都受惠。
本身家庭及年長觀眾層面佔優勢嘅TVB，黃金時段普遍節目都有收視升勢。《愛．回家之開心速遞》星期一至五集數收視由23.7點升到26點（周六周日分別收25.4及25.7點），可以話係重返近年新高。需知道上月中（12月6－12日）《愛》劇只係收21.4點，相比之下觀眾人數升咗2成有多！而放於「炮灰檔」嘅《異搜店》同樣有驚喜，結局周收視25.5點，將全劇平均收視一下子扯高到22.3點。根據官方資料，以過去12個月嘅劇集計，《異搜店》排喺第3位，只係輸俾《逆天奇案》同《寶寶大過天》，喺新人＋假期兩大因素下做出好成績，外在因素功不可沒。值得一提係《異》大結局跨平台直播收視有28點，簡直係台慶頒獎禮水平，亦係近18個月單集收視之冠。
而收埋2年幾嘅《鐵拳英雄》，首周收20.9點，睇落唔錯但以呢個時機同卡士計，應該可以更好。TVB提供嘅資料指出，《鐵拳英雄》跨平台直播收視有21.7點，係12個月以來9點半劇計排第2。
ViuTV收視同樣有上升，上周反應麻麻嘅綜藝《玩埋我嗰份》同《演員．門》彈返上慣性收視3點水平，《玩》更加去到3.7。原創劇《IT狗》網民反應唔錯，加埋有MIRROR三子Frankie、Lokman及Stanley撐場，首周有4.1點，相信仲有得升。韓劇《哲仁皇后》穩步上揚，亦都有4.1點收視，有點意外。
