旅行岀發前4大不可忽略之工作

出發前去旅行梗係唔少得要做下準備工作，簡單如做下資料蒐集，計劃吓行程，book下酒店同埋當地嘅local tour，好多時已經要用咗一大段時間，當搞掂呢堆工作之後，就會覺得已經完成，可以準備去玩，其實除咗呢一啲基本嘅旅行前必做工作，仲有一啲相對比較多人會忽略嘅小準備， 就好似以下呢四件事。

1.信用卡用邊張

大部份香港人都起碼有兩張或以上嘅信用卡傍身，係出發去旅行嘅時候就記得要好好檢查清楚邊一張信用卡係海外嘅手續費比較低，或者係海外簽帳有某啲嘅特定優惠，揀好適合今次行程嘅信用卡其他就可以唔使帶去，自然亦都減低唔見信用卡嘅機會啦。

2.旅遊路線規劃

好多人習慣咗自由行之後，就未必會係出發前仔細計劃路線同行程，尤其去一啲比較熱門嘅大城市更加抱住唔需要擔心嘅心態。不過事實上每一個旅行地點都隨時會發生變化，出發之前最好都係先確定乘搭嘅交通工具班次，免得岀現不必要嘅麻煩。

3.預算要小心

以前去旅行大家都會習慣先喺香港兌換定當地貨幣，不過依家越來越多方便遊客嘅措施，好多人都會選擇去到當地先兌換又或者直接使用信用卡，不過最好就係出發前預先計算一下各項預算，邊啲項目使用現金，邊啲項目使用信用卡，咁樣可以方便你去到當地兌換貨幣嘅時候更加容易控制數量，唔使去到最後幾日要臨急臨忙洗晒啲錢又或者啲散紙多到用唔晒。

4.願望清單提示

好多朋友去旅行都好鍾意隨心隨性，唔會提前諗定有啲咩要買要食要玩，其實最好就係出發之前簡單列出一個願望清單，包括今次行程最想食到嘅當地食物，最想試嘅當地體驗，同埋最想買嘅當地手信，有住呢幾個清單，就算你唔洗計劃一個仔細嘅行程，都可以避免去到因為冇計劃而唔記得咗自己最想做嘅事。

相片來源：quirkymoonchild @tumblr