【有膠味】《與諜同謀》賴慰玲施展驚人記憶力

由羅嘉良、李佳芯、鄭俊弘及黃心穎等主演嘅無綫劇集《與諜同謀》喺星期一已經出街，劇集以商業間諜為題材，講述潘少杰（鄭俊弘飾演）係一個商業間諜集團首領，帶著一班成員向羅嘉良飾演嘅卓君臨報仇。其實佢哋嘅行動理應睇到觀眾覺得好緊張刺激，但係似乎未達到預期效果，尤其喺噚晚由賴慰玲飾演嘅網絡宅女成員忍忍，佢嗰part嘅行動真係睇到網民O晒嘴，原來忍忍係有過目不忘、記憶力驚人兼識得將記憶畫面zoom in嘅超能力。

噚晚講到鄭俊弘已經成功加入美世代集團做市場部經理，仲令到忍忍成功被卓君臨聘請去IT部返工，目的係盜取美世代客戶資料。喺盜取客戶資料嘅行動入面，竟然連環派膠，真係睇到都覺得尷尬。 首先，忍忍已經一早整定一張入經理室嘅假卡，之後佢竟然憑之前見到經理㩒密碼嘅玻璃倒影記憶，成功入到經理室。

為營造緊張效果，當然唔會咁容易俾佢攞到啲客戶資料啦，就係要佢喺輸入密碼開啟電腦。喺第一次嘗試輸入密碼嘅時候，忍忍竟然記得經理身份證上嘅生日日期，可惜密碼唔啱。之後佢試咗幾次都唔成功，喺最後一次機會嘅時候，忍忍再一次利用驚人嘅記憶力兼定格無限Zoom in經理手鏈上嘅四粒數目字，成功輸入密碼及盜取客戶資料。

另外，亦有網民發現喺忍忍扮顧客喺留言板向顧客服務部員工提出專業意見嘅時候，無綫又再一次使出「C Drive上網大法」。

雖然劇集只係播咗幾集，但係已經有膠味，希望呢套劇集唔會成為今年嘅膠劇之最啦！