本尊就位｜網民批孔德賢演技幼嫩 低成本CG吼天犬似加魯魯獸？

仲有唔夠兩星期就到農曆新年，TVB奇幻賀歲喜劇《本尊就位》由新人孔德賢、陳嘉慧、及謝東閔等人主演，講述道士陳木昆（孔德賢飾）借神仙呂洞賓嗰名去招搖撞騙，結果驚動呂祖本尊，決定下凡點化佢，點知中途殺出吼天犬尋仇，陰差陽錯搞到佢失去法力，被迫滯留人間。之後呂洞賓以雷石之名伴隨木昆，除咗化解與木昆嘅恩怨之外，佢哋仲一起成長，破解鄉中唔少奇案。劇集喺噚晚（29日）首播，而家就同大家睇下網民有咩反應啦！

劇情輕輕鬆鬆
第一集劇情就講到陳木昆借呂祖名義呃善信錢，有富家子喺廟內暴打民女，陳木昆原本被富家子收買，不過喺見到民女傷勢後改指證富家子傷人。得罪有錢人後木昆打算逃亡，可惜逃亡不成，仲俾人綁咗上風箏飛到天空，誤打誤撞飛到五族房鎮山上。喺呢個時候，決定下凡點化木昆嘅呂洞賓，雖然成功搵到木昆，不過亦被哮天犬尋仇，大戰下意外拯救被「山妖」拐走嘅小童。劇集播出後，雖然有網民認為劇集欠缺新意，不過有唔少網民認為劇集輕輕鬆鬆及幾好笑，留言話「呢套嘢擺明係搞笑」、「劇情老套，但輕鬆」、「其實好耐無呢啲無腦輕鬆劇」、「呢套輕鬆笑下幾好ar ！」、「本身以為係膠劇 但睇左陣 唔係太差」、「唔係喎，幾好笑喎」、「CG同套戲都膠膠地，反而幾好睇」、「幾得意 膠膠地咪幾好」、「以為係膠劇，睇左一集原來又幾好睇，劇情快，故事豐富，題材講神仙一向吸引，白色𠱼天犬造型似洋犬，鐘意封神榜黑色多啲，選角兩位男角都好。」、「孔德賢 謝東閔 黃嘉樂 3個都支持 一定睇《本尊就位》 過年前開心下 仲有陳嘉慧BB 孔德賢加油 好睇，好輕鬆 呢套搞笑劇 輕輕鬆鬆幾好睇」及「套戲輕輕鬆鬆幾好睇」等等。

CG低成本製作好膠
《本尊就位》宣傳片講到明係古早味CG，所以喺首集已經有粗糙嘅特效，例如吼天犬心有不甘被呂洞賓毀其清譽，所以就搵呂洞賓尋仇，期間引發「神狗大戰」。唔少網民都認為CG低成本製作好膠，留言話「啲CG係咪玩膠」、「低成本製作」、「呢段over左 膠到」、「睇左啲咩」、「好cult」、「數碼暴龍咁」、「加魯魯獸」、「TVB版marval」、「呢隻哮天犬設計連動畫洗唔洗10萬」、「膠到癲咗 以為中學生拍片」、「2024年仲係封神榜水平嘅特效」、「真係好膠 古裝呢d特技好心跟大陸學下嘢啦」、「特技仲退步過八九十年代」、「呢隻哮天犬設計連動畫洗唔洗10萬」及「隻狗淨係識閃，郁都唔郁」等等。

孔德賢撞樣鄭嘉穎？
《本尊就位》搵嚟首度做男一嘅孔德賢孭飛，佢喺劇中飾演招搖撞騙嘅「神棍」陳木昆，雖然有唔少網民指佢演技幼嫩，不過仍然有唔少網民讚佢靚仔，仲話有啲似鄭嘉穎添，例如「有啲似橡膠穎」、「順眼過四眼峰」、「成個橡膠穎咁」、「孔德賢個樣有 d 似鄭嘉穎。」、「靚仔」、「樣係算靚仔但係矮, 演技又好稚嫩。」、「佢好戲過丁狗」、「孔德賢的戲都幾浮誇」及「孔生對眼眉，有點鄭嘉穎2.0」等等。

陳嘉慧及區明妙吸睛
陳嘉慧及區明妙分別喺《本尊就位》中飾演「花魁」白雪花及「琵琶仔」蝴蝶，噚晚劇情就講蝴蝶身世可憐，未成年就被賣往妓院，喺雪花幫助下企圖逃離妓女生涯，逃離時一波多折，除咗腳傷之外，仲被山妖活捉。古裝造型嘅陳嘉慧及區明妙深得網民喜愛，紛紛留言大讚佢哋靚女，例如「淨係想睇Erica」、「妙妙好正」、「睇女夠支撐睇到結局」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！