李施嬅宣佈離巢！TVB 力捧7大花旦做未來視后！

當楊怡、胡杏兒都北上拍戲搵真銀，岑麗香2018年又緊接離巢，今年終於輪到李施嬅宣佈離開TVB娘家！人才流失，TVB唯有先從當下有潛質或有話題性的藝員中入手。憑近年及接下來的多套大熱劇集中，不難發現以下花旦已經坐正，成為未來視后人選！

黃智雯有望繼續提名視后

TVB鬧人才荒，好多上位女主角都係港姐出身，好似黃智雯就係其中之一，07年當選後緊接一年，就有多套劇集演出經驗，由跑龍套開始做起，終於在《缺宅男女》飾演唯唯老婆（關二嫂），憑巴渣角色引起關注，能夠放下港姐氣質一面大膽演戲，實在不易。

▲TVB《缺宅男女》劇照。

去年黃智雯在《降魔的》分飾莊芷若正邪兩角、以及在《三個女人一個因》演繹多重人格病患者，一人分飾三角，成功被提名視后和「最受歡迎電視女角色」。網民也大讚其演出，更大力支持她攞視后！

▲TVB《三個女人一個因》電視截圖。

雖然最後輸俾李佳芯，但她也捧走馬來西亞及新加坡最喜愛TVB女主角，成為星馬雙料視后！承接熱潮，她更到韓國拍攝《一個因去跳舞》，加入女團落力演出，付出的努力有目共睹。相信TVB今年會繼續捧佢上位！

朱晨麗坐正做一姐

朱晨麗2011年挾「翻版陳法拉」之名當選港姐冠軍。2012年卸任後得到多套大熱劇集的演出機會，包括《名媛望族》、《衝上雲霄II》、《EU超時任務》、《致命復活》及《超時空男臣》等，不過一直都是第二或第三女主角。

入行7年，朱晨麗對每個角色好俾心機，例如在《棟仁的時光》裡有多場鋼管舞戲份，她就跟老師苦練幾個月鋼管舞；在《超時空男臣》中跟何廣沛飾演的小太監有段情，搞笑演繹令觀眾加深印象。

▲TVB《特技人》劇照。

去年開始，朱晨麗開始擔正做主角，默默耕耘了7年的她終於有出頭天！晨麗在《特技人》及《兄弟》中瞓身演出，飾演May豬及楊青青，成功入屋！

黃翠如繼續被力捧

翠如BB做過NOW同有線的娛樂主持，又做過旅遊節目，2012年被TVB非戲劇製作部總監余詠珊邀請加入，旋即被力捧，拍攝《心路GPS》，和陳展鵬有不少對手戲，不過因為無咩演出經驗，演技幼嫩而被網民大插。

縱然如此，翠如BB好快就得到飛躍進步女藝員獎項，明顯被捧上位！雖然演技麻麻，翠如BB憑清純爽直性格吸引大家注目，短短6年就接拍10多套劇，不少角色更是第一女主角，例如《師父·明白了》、《愛我請留言》、《師奶MADAM》、《我瞞結婚了》，更曾藉《幕後玩家》顧成雙一角獲提名最喜愛TVB電視角色及最喜愛TVB女主角。

翠如BB又於《使徒行者2》飾演臥底鄭淑梅再獲提名，雖然最終與獎無緣，但都係TVB重點栽培對象，在去年底殺青的《過街英雄》亦係擔正做女主角。相信今年大家又會在熒幕前見到佢的演出。

▲TVB《使徒行者2》官方海報。

視后李佳芯繼續坐穩

同翠如BB一樣，李佳芯由有線綜藝娛樂節目主持跳槽到TVB演戲，演藝路並不似黃翠如般一帆風順。2012年初加入頭3年，Ali只能擔任閒角，在黃翠如擔正的《愛我請留言》中只屬客串。

不過TVB花旦愈來愈少，在無人接棒下唯有力捧Ali。Ali不負所望，先在《潮流教主》偏演紀芸芸，短裙、高踭鞋打扮的名媛氣質成功搶鏡，亦能演活不擇手段的奸角角色，難怪TVB之後再俾機會，在《律政強人》、《與諜同謀》及《BB來了》中有得坐正，成功登上一姐地位。

▲李佳芯於《BB來了》演活初為媽媽的辛酸。

繼2016年Ali 奪得《萬千星輝頒獎典禮2016》飛躍進步女藝員，短短2年時間，她便憑《BB來了》再奪《萬千星輝頒獎典禮2018》最佳女主角，上位極快！

黃心穎今年正式做女一

黃心穎2012年以港姐亞軍姿態加入娛樂圈，即上位做女配角，參演《再戰明天》、《點金勝手》、《以和為貴》等劇。

2015年，心穎BB已經獲提名《萬千星輝頒獎典禮2015》的「飛躍進步女藝員」、「最受歡迎電視女角色」、「最佳女配角」及「最佳節目主持」，能夠獲得多項提名，絕對唔簡單！

去年《宮心計2之深宮計》中，佢同馬國明情侶檔演出，被指演技突飛猛進，更因慘死一幕而得到網民過千留言關心劇情，佢亦好識做，劇集網上點擊率達30億時曬Bikini瞓身照派福利！

嚟緊佢將會在《丫鬟大聯盟》及《牛下女高音》中首次任女主角，正式登上一線花旦地位。

陳凱琳生完仔有望再復出

陳凱琳以民選大熱姿態當選2013年港姐冠軍，一卸任拍劇就有得做女配角及女主角，更因拍劇而無得參加2014年世界小姐，可見極受TVB重視。她先在《四個女仔三個BAR》及《張保仔》坐正，但因無乜經驗，表情浮誇、層次欠奉。

不過2015年Grace已獲「飛躍進步女藝員」獎項，即使演技未夠班仍被力捧。自從同鄭嘉穎拍拖後，陳凱琳被男友訓練得多，演技大有進步，在《平安谷之詭谷傳說》飾演外國長大、有開放思想的羅桂思，憑外國人樣加上恰到好的演出，令人深入民心。

蔡思貝靠「醜」上位

同Grace同屆港姐出身的蔡思貝都係力捧小花之一，出道2年即有機會做女一。不過因外形似網絡紅人達哥而不受討好，加上在《衝線》擔正做女主角，觀眾批評聲線刺耳，封佢做「高分貝」。

不過蔡思貝未受負面報導影響，更識把握機會，最爆係《踩過界》中以哨牙造型做麻甩女，絲毫不介意形象降呢，令人刮目相看！

▲TVB《踩過界》劇照。

推薦閱讀:

➤ 【TVB 萬千星輝頒獎典禮2018】台慶5位大熱候選視后 代表劇集逐個睇

➤ 【TVB 萬千星輝頒獎典禮 2018】7大上位男藝人有望提名視帝？他們都是顧家暖男

➤ TVB台慶視帝不是唯一出路！蕭正楠成功上位全靠做人能屈能伸

Follow us on:

• Facebook: CosmoHK

• Instagram: @cosmopolitan_hk

• YouTube: CosmopolitanHK