條件比你差都有男朋友？3個特徵顯示你係天生「男人絕緣體」

好多女仔唔理咩年齡，基本上只要一單身就會不停受到親戚朋友嘅質問「無人追咩？」通常仲一定會附帶好多讚美詞語「咁靚女」、「有學識」、「斯斯文文」，然後就會再用3,500字提你快啲拍拖之類。其實唔少女生的確崇尚自由，唔係覺得單身有乜問題，但午夜夢迴或者大時大節，有時難免會諗「點解我仲喺單身？」坦白講係咪眼角太高？自問唔係；最恐怖係根本唔知自己點解一直遇唔到一個合適對象，係連衰乜都唔知。最慘係見住好多條件比自己差嘅女仔都有另一半，偏偏自己永遠遇唔到。呢種「男人絕緣體」，仿似女版天煞孤星。其實想知自己，又或者身邊姊妹係咪都係屬於「男士絕緣體」，一齊睇下有冇以下特徵。

同男人無話題

識親嘅男人都係沉默寡言居多，能言善道嘅男人從來無喺你身邊出現過，同男士傾計大家永遠無乜話題，一句起兩句止，莫講話發展，連做普通朋友都未得，何況更進一步呢？不過女仔有時要反省下，溝通從來係雙向，人哋講嘢，你自己有無畀應有反應呢？

識親都係已婚或名草有主男人

有部分職業先天已經係無乜機會識人，而且識親可能都係上咗年紀嘅，變相如果你一日唔跳出呢個生活圈子，就會無限Loop，最後自己年紀愈大，就愈難搵得啱。不過時也命也，永遠唔知真命天子會唔會係下一秒出現。

太靚

唔係講笑，太靚絕對有機會令你變成絕緣體，畢竟所有男人都會認為你有男朋友，再者；有人會覺得就算你無，但你應該係收兵嘅女神，又或者係拜金港女；總之就唔敢埋身接觸，君不見幾多靚女，最後人到中年，惟有草草下嫁一啲相識不久，但條件又唔高嘅男士咩。

（圖片來源：擷取自TVB《盛女愛作戰》）