極端天氣令蛇更活躍 註冊蛇王：遇蛇入屋應報警拍照 勿紮緊或吸啜傷口

現年 35 歲的 Ken，捉蛇經驗接近 20 年。他自小喜歡兩棲爬行動物，在蛇舖結識了一些老行尊，17 歲就成功獲其他蛇王推薦，在警方註冊為認可蛇王。他亦持有警方及嘉道理農場頒發的「本地原生蛇類野放許可證」，協助市民捕蛇後尋找合適地方放生。訪問當日，記者隨 Ken 到荃灣芙蓉山一帶，放生一條同區野生捕獲的滑鼠蛇。

留戀棲息地 有蟒蛇渡海回家

該條滑鼠蛇甫離開蛇袋即猛烈擺動，Ken 將其後半身捲在手上，再輕托頸部，牠才穩定下來，「當你拎住佢條頸、身體前三分一嘅地方，佢會覺得好唔舒服」。滑鼠蛇等大多數蛇類均會原區野放，尤其青竹蛇、蟒蛇等對棲地專一性較高，會嘗試用盡方法重返原棲地，有些蟒蛇更會渡海「回家」，「佢哋會不斷嘗試搵返自己屋企，呢段時間可能會好惶恐，直到佢死亡一刻」。野放的選址經 Ken 精密計算，氣候是考量之一，雨季期間不會放於闊大溪澗，否則暴雨、颱風來襲會沖回市區；旱季則要放在水源附近，「所有生物無食物佢會去搵，但無水源係唔得」。

Ken 的正職是拍攝野生記錄片，為準備隨時出動捉蛇，背包常備捉蛇手套、不同尺寸蛇袋、蛇勺、蛇鉗、頭燈等。捉蛇手套長約 30 至 35 厘米，緊緊包裹蛇王的前臂，手套有摺痕讓蛇的毒液容易流走，內層加入鐵網等，非常堅固，「以前香港蛇王會用勞工、燒焊手套，但其實一咬就會穿」。蛇勾則是捉蛇輔助工具，適用於狹窄空間。Ken 指，蛇王大多會將蛇勾放置蛇的肚底「上勾」；蛇鉗多用於捕捉攻擊力大的蛇，如全世界最長的毒蛇眼鏡王蛇，「專業嘅蛇鉗係夾實之後會收力，市面有好多都唔會，如果唔識用一夾會重創蛇嘅脊椎，之後就會癱咗」。

「無蛇天生為咬人而出世」

根據環境及生態局資料，目前本港共約 53 種蛇類，其中 14 種為陸棲毒蛇。Ken 指，除了滑鼠蛇（無毒）外，紅脖游蛇（有毒）、青竹蛇（有毒），眼鏡蛇（有毒）和蟒蛇（無毒）均為本港常見蛇類。青竹蛇更可「隱身」於草叢中，因此路人稍不留神便會被牠自衛反擊而咬傷，「佢日頭好保護色，同埋喺啲葉遮住晒嘅丫位」。不過，Ken強調這不代表青竹蛇攻擊性強，「人覺得蛇好危險，其實蛇都覺得人好危險，無蛇係為咗咬人而出世，多數都係意外」

環境及生態局資料顯示，過去 3 年間每年接獲逾 3,000 宗蛇出沒求助報告。Ken 解釋，蛇會於市區出沒，全因蛇每逢打風落雨均會於溪澗活動，結果被地下水道沖出市區。月前「世紀黑雨」，Ken 短短數天在各區捕獲 20 多條蛇，「平時 10 至 11 月都係每日一條，係比平時多兩三倍」。

除打風外，每年 10 至 11 月蛇類發現案頻率會驟升，Ken 指因蛇要在冬天前爭取時間吃飽，「好多人講蛇要冬眠，其實喺香港、台灣，蛇係唔需要冬眠，只會將身體機能調慢，食少啲嘢，等暖返再出嚟活動，但都係要出嚟曬太陽」。

極端天氣來襲，冬天時間越縮越短，對蛇反而是好事，「冬休有機會易啲死，缺水、過唔到冬等等，所以冬天短，佢哋活動時間就可以長啲」。他續指，蛇屬外溫動物，需要曬太陽讓身體有足夠溫度才可活動，因此在每年屢破高溫的夏天，蛇仍然是「最大贏家」，「過熱佢會即刻降溫，落水浸、瓹落啲疏水孔度，只要有水源，曬熱咗落嚟飲水、降溫，有水就唔會死」。

切勿冰敷、紮緊或吸啜被咬傷口

Ken 指，如市民發現家有蛇蹤要保持冷靜，勿與蛇搏鬥，先拍照再報警，期間可瀏覽蛇類分析網站，找出蛇的種類和毒性，「有啲網例如 Hksnakeid 咁，會寫埋有乜嘢係重要嘅特徵」。大膽者可嘗試以麻包袋、大垃圾桶蓋在蛇身上，「蛇喺漆黑、狹窄嘅環境會靜落嚟，尤其係啲日行性種類，當然嗰刻你要衡量吓個風險」。

萬一不慎被蛇咬傷，Ken 提醒市民小心處理傷口，萬萬不可冰敷或紮緊患處，否則會令毒液停留，有機會致患處組織壞死，「條蛇嘅毒性應該由成個（人）身體去分擔，如果你綁住繃帶或者止血帶，毒液不斷喺同一個位循環，都有可能令傷口壞死」，應以清水輕抹傷口就可。

另一個市民常犯錯誤是吸啜傷口，「你啜嘅時候會將毒液吞落肚，加上牙肉嘅血管入埋血，又會多一個患處」。Ken指，曾有傷者被毒蛇咬後吸啜傷口，最終令牙肉中毒潰爛，不斷掉牙，「畀蛇咬等於針筒注射，你擠唔到出嚟，所以唔應該咁樣做，一個地方中毒好過兩個地方中毒」。