泰國潑水節2020 避開曼谷 大城兩日一夜行程

泰國一年一度潑水節每年4月就會舉辦，今年日期定於4月13至15日；潑水節大家都應該有所認識，不過好多人以為只會於曼谷、清邁有得玩，其實唔係呢，由於知道大家都擔心4月時疫情控制好未，所以安全計就當大家避開曼谷、清邁呢啲熱門城市，其實「大城」都一樣係潑水節勝地，本身亦係一個旅遊城市，但遊客少啲，點計都安全啲！今日介紹一個潑水節2日行程，等大家初接觸大城啦！

Day 1:

上午：曼谷坐火車直達

大城於曼谷北面，於曼谷坐MRT到Hua Lumpong站，再轉乘火車就可以到大城（Ayutthaya），車程約2至3小時。

中午：古城周邊遊

大城為泰國一個極為古老城市，入面有眾多歷史悠久嘅古廟、古城，唔少都列入世遺。去到大城，必要參觀就係瑪哈泰寺，係以前素可泰王朝古城遺址，於1991年已入選世遺。瑪哈素寺周邊有大大小小200座佛塔及佛像，建築都似柬埔寨高棉式風格，唔少貼上金邊。當中瑪哈泰寺都出名就係一尊被樹根纏繞嘅佛像，被稱為「樹中佛」。

地址：Naresuan Rd, Tha Wasukri, Phra Nakhon Si Ayutthaya District, Phra Nakhon Si Ayutthaya

預訂：可參加Local Tour，每位約二百多港元（按這裡）

傍晚：文青咖啡廳 影相影到飽

於瑪哈泰寺北邊少少，就有一間被泰國KOL們盛讚嘅文青咖啡室Busaba！全店以白色為主色，配以泰國木材家具，極有格調。美食方面最大特色係用上大城特產「龍鬚糖絲」作為咖啡Toppings，加上其他各種輕食簡餐。店入面除咗有得飲咖啡同食嘢，仲有好多本地文創產品，例如文具、家品擺設、明信片等，真係有得食又有嘢買！

Busaba Cafe&Meal

地址：Uthong Rd, Tambon Tha Wa Su Kri, Phra Nakhon Si Ayutthaya District, Phra Nakhon Si Ayutthaya

營業時間：9AM至9PM

晚上：復古夜市店面超懷舊

泰國各地都有夜市，大城都唔例外，兩個夜市之中推介大家去「假日復古夜市」，當然係星期五、六、日先開，先夜市之中每間店都係以茅屋造型出現，而且部份店主仲會以古裝造型示人，夜市旁就係小河，可以買啲地道小食坐喺河邊食飯。夜市全長幾百米，要逐間行逐間睇，隨時要用幾個鐘呢！

大城假日復古夜市

地址：Unnamed Road, Phra Nakhon Si Ayutthaya District, Phra Nakhon Si Ayutthaya

營業時間：4PM至10PM

Day 2: 全城潑水節 大象也出現

大城潑水節與一般曼谷潑水節唔同，因為地方大，大城潑水節出動到大象都一齊玩，就係著名嘅「彩繪大象」活動。行程中呢幾隻潑水大象會沿大城府街頭遊走，向沿途民眾潑水，而在場左右民眾都會以水槍、水盤還擊。至於地點包括邊度？基本上包括全部大城街頭，所以唔使怕搵唔到。提醒大家，泰國潑水節嚴禁穿暴露衣著，例如比堅尼、甚至男性赤膊上身都係唔得㗎！

大城潑水節

地點：大城各街頭

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！