湯洛雯證冇因馬國明接劇影響婚禮 婚禮大致籌備完成拒透露太多：唔想變咗個活動咁

年底即將同馬國明（馬明）拉埋天窗嘅湯洛雯（靚湯）今日就出席活動，大談護膚同Keep fit心得，仲為咗做新娘加緊步伐護膚，更加為做瘦身戒糖，令個人變到非常「躁底」。另外，有傳馬明臨危受命被安排接拍新劇令婚期延遲，靚湯就再次強調婚禮如期舉行，仲話婚禮大致上籌備得七七八八。

馬明日前接受訪問就爆被靚湯詐型，投訴佢向外界透露太多婚禮消息。靚湯今日就澄清，話因為馬明本身怕煩，唔想俾人問，所以就提醒佢要搵返個Balance（平衝）：「本身諗住影婚紗相靜悄悄咁影，影完就算，因為驚俾人見到我哋喺街影，雖然影婚紗相難免，但係起碼唔想話俾人知係邊到影，點知佢一下就講咗出嚟我哋出埠影，因為佢（馬明）有時太隨和傾傾吓就講咗出嚟，所以就提吓，有啲私底下嘅情話又唔好講出嚟。」靚湯仲話知大家都戥佢哋開心，不過都想有啲私人空間。

對於被指馬明開新劇影響婚禮，湯洛雯就表示一開始都好驚訝，不過因為公司好好肯遷就佢哋婚禮行先，所以就冇影響婚禮進度。而佢亦都透露婚禮大致都籌備好，宜家處理緊裝飾部分，靚湯就話享受籌備過程，不過唔希望再透露太多，想婚禮盡量低調進行：「講吓又講吓成件事好似變咗個活動咁，呢個係我哋兩個嘅日子，想有啲驚喜保留返！」