炎明熹Boxing Day探訪護理安老院為長者送暖
Gigi炎明熹帶同後援會義工隊於十二月二十六日boxing day去探訪護理安老院,為住喺院舍內嘅老友記帶來歡樂同送上節日嘅祝福。當日有三十多位老友記出席,為咗讓一班老友記開心,Gigi與十位義工同佢哋一齊唱吓歌,當唱到漫步人生路及喜氣洋洋時,現場更有老友記出黎同Gigi拖住手一齊跳舞,氣氛非常高漲!
原來唔少老友記都認得Gigi,佢地都有睇電視有聽過佢唱歌,仲讚佢唱歌好聽又靚女。有老友記仲叫佢多啲開演唱會添!當介紹Gigi俾大家識時,又有老友記仲打趣咁話:「哦,妳就係炎姑娘!」,場面非常搞笑。
此外,Gigi更化身小導師,教老友記玩小遊戲,先親身為佢哋示範,繼而從旁鼓勵,為佢哋加油打氣!老友記完成遊戲更會得到Gigi送上嘅小禮物:包裝紙巾。原來老友記都好鐘意,因為方便好用,每位老友記都展現出燦爛笑容,表示玩得開心。
Gigi更在聖誕節期間為今次嘅探訪活動去學扭氣球,將佢嘅心意送比一班精靈可愛嘅老友記。Gigi更加發揮佢嘅創意,為蝴蝶及兔仔造型嘅氣球畫上圖案,又喺元寶造型嘅氣球上寫上龍馬精神等祝福語送俾老友記,佢哋收到嘅時候開心之餘場面亦非常温馨,Gigi同老友記都玩得非常開心,全場笑聲歡呼聲不斷。
一向都關愛老友記嘅Gigi,更帶來滿載溫暖嘅禮物包送俾每一位老友記,禮物包內有保暖嘅披肩,Gigi送上披肩時更貼心問候每位老友記並得到老友記嘅同意才為他們披上,真係一個十分窩心既女孩。此外,禮物包裡面仲有由後援會嘅會員及有心人親手織嘅溫暖牌冷帽,喺今個寒冷嘅冬天為老友記們送上滿滿嘅溫暖同充滿愛嘅祝福。短短兩小時嘅相聚,令老友記非常難忘,仲話歡迎炎姑娘同義工們下次再黎探佢地。
Gigi表示在她小學時亦有到老人院探訪,但今次係第一次參與由自己後援會主辦嘅老人院探訪活動,見到一班老友記健康開心,自己亦希望出一分力。很感激後援會義工隊多次自發舉辦好多不同類型慈善活動,並希望自己日後可以抽到更多時間參與慈善活動。