無制限探險隊｜咖喱黃雅慧成功登非洲最高峰 真情流露獨白睇到網民眼濕濕

以「黃金畫面」為關鍵主題嘅ViuTV節目《無制限探險隊》正在熱播中，節目由「格仔導演」劉諾衡（Mike導）主理，並搵嚟P1X3L成員Marco（葉振弘）及「小薯茄」程人富擔任主持，而曾參加《全民造星IV》嘅「咖喱」黃雅慧（Kelly）就擔任隨行醫生。噚晚（9日）播出一集就以「番外篇 － 非洲最高峰」為主題，原本一行13人嘅節目組喺相處四十日後便要分開，其中5人（Mike導、Agent L、Rain P、Ray及咖哩）前往坦桑尼亞，挑戰登上「非洲最高峰」吉力馬札羅山（Kilimanjaro），喺登山前大家都認為咖喱係最早放棄及下山嘅成員，不過佢終於成功登頂，喺登頂後佢仲講出一段真情流露嘅獨白，睇到一班網民眼濕濕。

《無制限探險隊》5人小隊前往坦桑尼亞，挑戰登上「非洲最高峰」吉力馬札羅山，佢哋選擇成功率只有65%嘅6日團（7至8日團成功率為95%）及由位於1800米嘅MACHAME路線開始登上海拔5855米嘅山頂，期間Mike導表示好想13人一齊行，不過資源有限，入山嘅費用每人高達2萬元港幣，所以最後由5位番外篇小隊，自己拎錢去登山。

喺6日嘅登山過程中，小隊成員經過不斷努力，成功挑戰自己嘅體能極限，有幾位成員因海拔增加而身體出現頭痛及作嘔作悶嘅不適症狀。去到成功超越海拔5500米，咖喱一路努力行，一路講出自己今次行山嘅目的：「我喺好早之前已經打定輸數呢，我係一定做唔到㗎，因為我做乜嘢好多人都會同我講做唔到㗎，我以前係一個肥婆嘅時候，啲人就會同我講「你都冇自制力，你唔會減到㗎啦！」；去到我去玩《全民造星》，啲人就話「你咪發明星夢啦！努力做個公家醫生咪好囉！」」；到我做醫美醫生，啲人又話「你做醫美你都唔係醫生」；然之後我話我要去爬吉力馬札羅山，啲人又話「你都冇train開，你都唔得！」及「點解我要行呢一座山？我就係覺得所有嘢都要由我自己試咗，試完之後先至話自己做唔到，要自己去學習、去努力、學習去放棄，而唔係聽人講呢一樣嘢係咁就係咁。因為你唔做嘅話，根本冇人知道最後結果係點，或者你喺當中會得到啲咩，可能我呢一刻都係行唔到上去，但至少我覺得我都喺入面得到啲嘢，同埋而家睇到好靚嘅日出！就係咁啦！」

喺最後一日，小隊成員向山上行8小時，去到早上7點終於成功登上吉力馬札羅山山頂，成員們都非常感觸。喺呢個時候Mike導問咖喱：「點解想上嚟？」咖喱忍唔到喊住有感而發話：「我就係想試下自己究竟可以去到幾多，同埋我覺得我就係要有呢種衝動，同埋我唔想喺呢個社會營營役役，冇咗自己嘅童真同衝動，所以我想堅持做一啲我想做嘅嘢，然之後我做到啦！」

節目出街後，唔少網民都俾佢嘅獨白所感動，對佢刮目相看留言話「咖喱好叻好勁 登頂5000海拔真係能人所不能 Respect無制限登頂5人小隊」、「好感動，堅持到最後，作為女仔咖哩我真的佩服佢，比著我一早爆喊叫放棄了」、「Respect 咖哩」、「咖哩好令人touching 點解佢唔化妝嗰樣仲靚過化咗妝」、「以為佢只係隊醫, 最後變成為左睇佢而繼續追」、「咖哩真係女中豪傑」、「Viu應再畀多啲機會咖哩 Respect 咖喱」、「今集好正！個個都好勁，特別係咖哩，加油！」、「今集真係好熱血，尤其你同alfred兩段monologue ，睇到哭咗。 多謝你地」、「你個段好有！比你感動左！叻叻」、「發自真心佩服你，真心想為你打氣，相信你嘅將來一定可以做到更加多你想做既野，因為你已經證明到俾大家睇你既熱誠同毅力，我係今晚其中一個被你感動到既人」、「好叻女！睇你成功登頂同你個段話好感動好感觸，的確有好多嘢真係要親身試咗先知得唔得」、「真心癲，睇到好激動，喊岀黎，好欣賞你哋」、「睇完呢個節目, 覺得妳好叻女, 相信妳做咩都會成功, 加油」、「發自內心嘅說話最能感動人，今晚睇到喊咗」及「咖喱面都腫晒都堅持到山頂，絕對比花瓶系或乜都大叫一輪嘅女演員更值得欣賞」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！