男女之間可以有純友誼!5個朋友界線請分清楚

現今社會男女關係愈來愈複雜，異性朋友界線模糊不清，周旋前度與現任嘅例子亦好常見。近日有位日本妹就面對類似難題，上電視節目尋求藝人意見。

近日一名日本女生於節目《中居くん決めて》分享其關於前度與現任嘅「複雜」個案，原來佢每星期會與前男友見面兩次，仲話間中會一齊瞓晏覺，不過堅稱兩人只係好朋友關係!至於現任，反而兩星期先見一次，少女好苦惱，煩緊好唔好同前男友斬纜，因為擔心會畀現任發現咁話。

在場藝人展開激烈辯論，究竟男女之間有冇純友誼關係呢?中居正廣信異性之間確有純友誼關係，自己亦有多位異性朋友；而吉村崇就相反，指「20代男女冇可能有純友誼」，仲要每星期見2次咁過火。

如果你同呢名少女、中居正廣一樣相信男女之間有純友誼，好喇，以下呢5個與異性朋友相處嘅界線，請分清楚:

1.主動介紹畀另一半

如果兩人只係單純朋友，咁就要大方、主動同另一半介紹，唔好刻意隱瞞或者唔講，令另一半嬲、呷醋，往往都係因為「事後」發現。

2.注意吹水時間

同異性朋友平時嘅傾計時間都要注意，盡量避免深夜時間，臨瞓前真係有心事想分享，就打畀另一半先啦。好多人令另一半懷疑，就係因為總係兩人鬧交後，即刻聯絡異性朋友。

3.禁講曖昧說話

會令人聯想嘅曖昧話語，就咪講啦，除非你根本唔當呢段係純友誼關係!

4.慎選見面場合

盡量少啲單獨見面，如果真係要出去，場合都好重要，睇戲、去同另一半有紀念意義嘅餐廳、單獨長時間相處都應該要避忌。

5.避免肢體接觸

親密接觸，係愛情最直接嘅證明方式。拖手、摸頭、幫佢抹嘴…呢啲親密小舉動絕對唔應該出現，就算你覺得冇咩，都請你顧慮另一半感受吧!

圖片來源：www.pakutaso.com