【眼前一亮】《全職沒女》姚瑩瑩演活麻甩男人婆

無綫近年鬧小生花旦荒，除咗力捧新人上位之外，力邀舊人回巢救亡都係一個好方法。劇集《全職沒女》就搵嚟好耐冇喺無綫出現嘅陳松伶及張兆輝擔正。劇集播映後反應尚算不俗，第一集就有24點收視（約156萬觀眾）。46歲嘅松松姐姐喺劇中飾演冇樣冇身材，仲要嫁唔出嘅沒女－羅麗晶，不過最搶鏡、最令觀眾深刻嘅係同平時演啲角色有好大反差嘅姚瑩瑩。唔少觀眾睇完都話覺得「眼前一亮」、「有驚喜」同埋「成功演活角色」等等。

姚瑩瑩喺劇中飾演羅麗晶嘅家姐羅麗芝，喺劇入面最粗魯、最麻甩嘅女人。姚瑩瑩今次幾乎以素顏示人不特止，仲要一身男人婆嘅造型、說話態度粗魯、成日咬住枝牙籤、坐底仲要戙起隻腳，成個look真係同麻甩佬冇咩分別。其實今次角色同以往女性化角色好唔同，就連姚瑩瑩自己起初都唔知自己做唔做到，好彩得到監製陳耀全嘅信任同幕後人員嘅提點。

姚瑩瑩係91年新加坡小姐冠軍，之後參加環球小姐。喺選美期間認識咗好朋友袁詠儀，係佢介紹下加入無綫。當時第一個工作就係主持星期日早上節目《文化廣場》，之後監製戚其義搵佢拍攝劇集《O記實錄II》。雖然姚瑩瑩喺大部份劇集都係做配角，但曾幾何時佢都被喻為係一個上緊位嘅花旦，亦被捧為五美之一，相信最多人記得嘅應該係佢喺《尋秦記》中飾演朱姬（林峯阿媽）一角。

大家又對佢今次嘅演出有咩評價呢？