睇完《愛的迫降》轉口味 恐怖韓劇《謗法》紅到拍電影版

呢期個個講《愛的迫降》，不過再好嘅劇都有煲完嘅一日，要唔要轉下口味？

韓國tvN電視台呢期播嘅月火（星期一二播放）靈異劇《謗法》，今晚（星期二）就會播大結局。《謗》嘅收視未去到《愛的迫降》以至另一套大熱劇《梨泰院CLASS》咁高，但係質素絕對唔差，夜媽媽一個人熄晒燈睇，見住唔同人嘅恐怖死法同變臉，包你心寒。

故事講述女記者林珍熙（嚴智苑飾）為人正義感爆棚，因為採訪而逐步揭發全國最大IT企業Forest嘅秘密，仲因此認識到神秘少女白昭袗（鄭知昭 飾演）。昭袗原來係巫女，識得詛咒之術（即係類似落降頭），而Forest嘅社長（成東鎰飾）正正對巫術深信不疑，甚至搵個巫婆做分公司社長。於是……就梗係各自出招一較高下啦。

演員班底未算星光熠熠，稍為多人識嘅係演邪門社長嘅成東鎰係劇集《請回答》系列嘅「御用老豆」，而鄭知昭就係《上流寄生族》嗰位有錢女。不過2位創作大腦就大有來頭，《屍殺列車》導演延尚昊為劇集編劇，再加埋《神臂大叔》導演金容完執導，難怪咁有電影感。

既然有呢2個電影人助陣，收視又唔錯，劇未播完就已經宣布會拍電影版，打算夏天上映。據知原班人馬上陣機會頗大，仲會加入劇集無嘅新角色。

《上流寄生族》揚威奧斯卡效應之後，韓片當堂有國際市場，仲要係恐怖片，殺晒！不過最緊要捱得過更恐怖嘅……疫情！