社內相親｜陳漢娜自爆與沈殷怡拍攝時收攻擊性DM被鬧「賤女人」：攻擊唔到我 我對得住自己

有份參演ViuTV劇集港版《社內相親》嘅陳漢娜Hanna今日同Frankie、Lokman@MIRROR今日出席活動，Hanna自爆同沈殷怡拍攝時收到攻擊性DM，更被鬧係「賤女人」，不過佢就相信呢啲攻擊留言並非來自任何Fans，而佢亦都透露因為被問太多次，對有冇擔心被MIRROR嘅Fans圍攻，佢就話雖然有壓力，但係可能被問太多，亦都有心理準備，所以已經麻木；而佢亦都分享MIRROR Fans好好為佢打氣，更加送糖為佢加油。

對於《社內相親》即將開播，Hanna表示已經唔驚被Fans圍攻：「俾人問到唔驚，已經怕完一段時間，自己都冇咗嗰個感覺，因為都冇得預計呢件事。」佢亦都深呼一口氣表示有少少壓力：「大家都講得多，都有心理準備。佢哋啲Fans其實都好好嘅，拍嘅時候都會同我哋加油，佢哋都好理智嘅其實。」不過Hanna亦都爆出拍攝期間同沈殷怡都曾經收到過攻擊性DM被鬧「賤女人」，相信對方並非Anson Lo嘅Fans（神徒）：「得啖笑嘅姐，演員唔通唔接工作咩？好簡單大家都係做嘢。我真係唔會覆同埋真係攻擊唔到我㗎，我對得住自己囉做嘅所有嘢。做得呢個行業好似阿Lo同Edan都會受過唔同言語上或者網絡上攻擊，大家點樣處理，就係唔可以太過認真對待嗰啲Comments，專注自己工作同本份係最好，反而Focus咁多人哋點講反而會Lost。」

雖然有收過攻擊性留言，不過Hanna都表示鏡粉好Supportive：「有一晚喺山旮旯地方拍嘢，佢哋有個Fans都送咗包糖俾我，我係覺得好Sweet嘅。」佢亦都透露嚟緊仲會同鏡仔有合作拍攝《IT狗2》。

除咗《社內相親》，Hanna最近亦都有電影《年少日記》上映，佢就大爆導演卓亦謙經常喺本場流淚：「有時我喺後面Stand by會見到阿卓（卓亦謙）慢慢默默流淚，佢係每一日都會喊，佢好可愛。因為我係冇見過一個導演可以一路拍一路喊，因為個劇本係佢自己寫嘅，佢要對佢劇本好有感受，Feel到佢好愛呢個劇本先會咁樣睇住都喊得出。」