網上驚傳 佗B四個月 吳若希：有咗3個月結婚會通知大家

吳若希（Jinny）自從今年7月頭公開同澳門闊少男友Alex Ho（何兆鴻）拍拖後就經常放閃，去到9月中佢突然喺社交網站高調宣佈分手，到咗10月有傳又復合，劇情峰迴路轉。不過故事仲未完，Jinny其後以健康為由即時向公司請一年長假。

點知有報道指Jinny原來未婚有餡4個月，而男友Alex一知道喜訊，就火速送豪宅畀女友，仲話打本畀佢做小生意。

故事咁好睇，瓊姐又點會放過呢？

瓊姐喺Facebook專頁post咗懷孕4個月兼收千萬豪宅嘅報道，仲話著名媽媽討論區「Baby Kingdom」，有c9 已經係九月果陣爆料話有女歌手有咗，而且仲估係Jinny咁話。

傳聞越傳越勁，Jinny亦終於忍唔住發聲回應，不過就唔係發聲明，而係直接喺瓊姐Facebook留言。佢留言話：「 嬲豬～ 我無收過千萬豪宅～～」而瓊姐亦回應話：「我都唔係好信，何文田三百呎都成千萬？」

另外，Jinny喺凌晨時分喺自己Facebook回應有關傳聞，仲話：「Well～ 有左3個月會通知大家～ 結婚通知大家～～應承你！留意吳若希官方認證Facebook、instagram、微博。」

想知Jinny係唔係真係有咗？大家就即管等多幾個月，謎底應該好快會揭曉！