Yahoo奇摩新聞 
腳踏實地真漢子 韋家雄入行28年辛酸史
無綫藝人 韋家雄 ，近日突然成為網民爭相討論的對象，而且人人都俾個like佢！事緣日前網上流傳一段「男子力抗地鐵猥瑣男」片段，該正義氣之士被證實係藝人韋家雄，唔少網民對其正義行為表示欣賞，大讚佢係真漢子！韋家雄 入行28年，一直屬於默默耕耘的低調實幹型演員，就算在今次事件上，佢回應亦只係「做自己應該做的事」 。事實上，佢入行多年多是演一啲正氣凜然、忠厚老實的角色，戲內戲外表裏如一！
原文：新Monday
圖片：網上截圖、官方劇照
見義勇為真漢子
網上流傳的片段當中，正在拍攝的女事主發現自己重要部位被偷拍，然後指着一名禿頭中年男子並以英文斥責：「這名男士拍了我的相片，我要舉報你！」其後該名男子更欲衝向女事主動粗，於是在旁的韋家雄數度阻止該男子，而且出口訓斥：「你影人哋唔啱吖嘛！」影片瘋傳後，網民一致力讚韋家雄係真漢子！
其後韋家雄接受傳媒訪問，佢謙虛表示「只係做自己應該做的事」，因為當時認為要優先保護該女子。佢又話事件其實發生在於兩個月前，唔知道當時被拍下，估唔到會引起咁大回響。
入行28年 不靠哥哥
現年51歲的韋家雄，係香港著名電視電影製作人韋家輝的弟弟。佢出道前曾任廣告攝影師，1989年報讀亞洲電視藝員訓練班入行，成為亞洲電視演員，直至1995年轉投無綫電視。當然，低調的韋家雄多年來鮮有提及哥哥，一直憑自己實力在娛樂圈打拼。韋家雄都係演一啲比較忠厚老實的戇直角色，雖然未必令人留下深刻印象，不過演出自然又帶點喜劇感，起碼觀眾睇得開心。
韋家雄表示從來唔會跟哥哥比較，因為對方寫作叻，但演戲就唔及自己好，而且兩人從來都未有合作過。韋家雄稱哥哥早年搵自己拍《一個字頭的誕生》，但佢心想做呢一行靠關係的人都係冇好結果，所以最後決定推了。而且如果一直靠哥哥幫助，他朝有任何成績都會指係「靠阿哥」，韋家雄最唔想聽到就係句話！
悲慘童年時
童年時， 韋家雄父親開設塑膠廠，生意愈做愈大，可是發達後便拋妻棄子，跟另一女人一起。對此韋家雄直言：「我係非常之憎他！不過依家冇得憎，因為佢死咗十幾年。我記細個嗰陣，屋企真係好唔掂，我由土瓜灣舅父屋企跑去爸爸太古城屋企問佢攞一、二百元，佢都唔願意！求咗好多次，我記得佢俾咗支票我！」
韋家雄十二、三歲時已經要做非法童工，在酒樓賣點心幫補家計，倒垃圾都試過：「我經常落樓下士多賒罐頭，以前冇大財團壟斷，士多好有人情味，大家講個『信』字。佢哋會用拍子簿記低：『韋太，兩罐豆豉鯪魚。』月尾先去找數。」母親會幫人車衣服，哥哥韋家輝則去停車場賣票。
2011年投資失敗
韋家雄 2008年暫別演藝圈，專注發展LED燈生意，其公司設在日本福岡，曾接辦不少大型活動項目如大除夕倒數、世界博覽會及2008年北京奧運等。
不過韋家雄說，頭一次與朋友合作搞display monitor生意便敗陣而回，「俾好朋友呃，因為我對那門生意不熟悉，好多錢在不知道甚麼情況下便蝕了。」後來投資了四、五十萬做Led燈生意，接過幾單大project，零八至零九年的《幻彩詠香江》都是他投得的項目。11年日本福岡大地震，佢設於福崗的廠房全軍覆沒，日籍拍檔全家死晒，韋家雄孭了一身債，「說起都流眼淚，總之是一筆大錢，銀行完全沒有錢，是零呀！於是甚麼工作都做，搬運我都做過，現在已經清還了。剛好那時阿戚（戚其義）找我回無綫拍劇，叫做救番一命。」
2015年首獲最佳男配角
韋家雄入行多年，主要演綠葉角色，多數沒有主角的風采。直至2015年，憑《梟雄》中「麥瀚林」一角奪得萬千星輝頒獎典禮「最佳男配角」，佢獲獎時再三感謝黃秋生當頭棒喝的一番話，改變其命運：「秋生哥一句說話改寫我命運，多謝佢。多謝監製，搵我做秋生哥得力助手，仲要多謝各位導演、每個用過我的監製，珍姐同埋戚其義。我喺TVB 20年，兩個十年，我曾經離開過，係佢哋搵我返嚟，否則呢個獎唔係屬於我。」
望擔任導演
韋家雄 的哥哥和妹妹均於娛樂圈任幕後工作，他亦正在籌備成為導演。有指他有不少私人珍藏，一直想嘗試成為導演，目前在準備。
全文完
延伸閱讀：
