莊子璇驚現「間尺鼻」惹整容疑雲 比同屆佳麗工作機會少 自認陪跑「最具潛質新人」

應屆港姐冠軍莊子璇（Hilary）以大熱姿態奪得冠軍后冠，不過奪冠路上是非不斷，先被指人前人後兩個樣，與其他佳麗不和，當選後被傳因家族背景而成為冠軍。莊子璇否認兼懶理新聞，繼而獲TVB安排擔任台慶司儀。雖然有幸孖住前輩們做司儀，但莊子璇嘅工作機會比同屆佳麗少之又少，被網民封為「空殼」冠軍。網民近日又留意到莊子璇樣貌升級，變做「間尺鼻」。

莊子璇日前分享聖誕到商場打卡嘅照片，相中嘅佢著上低胸Tube dress，大曬事業線及美腿，不過網民卻將焦點放於莊子璇個鼻，指佢個鼻變得又直又尖，與參選時極大分別：「終於整左個鼻，好睇呀」、「嗰鼻打針收鼻翼啦、縮得咁快」、「唉，整咩鬼、無哂特色」、「個鼻又jm呀」等等。對於整容疑雲，莊子璇出席活動時回應傳媒，表示之前有留意外界話佢鼻唔靚嘅評論，宜家好用心化鼻妝；又指唔知有縮鼻針，如果有都想試，但自己好怕打針又覺得宜家自己年輕，唔需要打針，但唔確保將來唔打。

然而，同屆佳麗郭珮文率先跑出，與黃宗澤、袁偉豪、蔡潔等人合作拍攝《法證先鋒6 倖存者的救贖》，王敏慈被安排與江美儀、麥長青拍攝飲食節目《大灣區好玩美味攻略》，就連五強不入嘅鄧凱文及陳曉彤都被安排加入《東張西望》。對於當選後工作比其他佳麗少，莊子璇就回應指係自己主動要求少啲工作，表示仲有半年先畢業，而自己唔係好醒目，兼顧唔到讀書；不過就透露之後會主持新節目。而莊子璇有份獲提名成《萬千星輝頒獎典禮2023》「最具潛質新人」，與古佩玲、區明妙、游嘉欣、陳懿德等19名藝人爭奪獎項，莊子璇則笑指應該係陪跑居多，因為自己太新，並無代表作和角色。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！