萬千星輝頒獎典禮2023｜佘詩曼大熱成三料視后 場地細樓底低被嘲：個場好唔掂，仲衰過擺酒

TVB年度盛事《萬千星輝頒獎典禮2023》昨晚（14日）喺澳門圓滿結束，各個獎項結果塵埃落定，大家最關心嘅視帝視后分別由兩屆視帝陳豪以及三屆兼三料視后佘詩曼奪得。想知網民對頒獎典禮有咩感受？快啲轆落去睇啦！

場地細樓底低被嘲
TVB搞搞新意思，《萬千星輝頒獎典禮2023》今屆去咗澳門舉行，而一班藝員就被安排坐喺多張圓枱，以便佢哋睇表演及上台攞獎。不過網民就認為場地細樓底又低，有一陣old school及low budget味道，好似普通公司嘅annual dinner咁，甚至衰過新人擺酒，留言話 「笑死 今年個台做annual dinner咁」、「個場好old school咁」、「個台細到」、「真係以為邊間酒樓」、「今次真係annual dinner」、「個場真係幾唔掂」、「個台好cheap」、「好似夜總會咁」、「個場好亞視feel」、「個場仲差過一廠」、「個場樓底好矮」及「個場好唔掂，仲衰過擺酒」等等。

司儀丁子朗瘋狂被彈
昔日嘅《萬千星輝頒獎典禮》都會由星級司儀，例如汪明荃及Do姐等等，不過今年就淨係得上位小生丁子朗，雖然佢明顯備受力捧，不過一班網民就似乎覺得佢老是常出現及唔多buy佢嘅表現，例如「又丁子朗 本身又冇料 但有夾硬捧佢」、「可唔可以唔好再捧丁子朗」、「冇X嘢呀嘛丁子朗做主持」、「真係邊到都要有佢 又無觀眾緣」、「收返埋丁子朗啦」、「俾咁多機會佢出場 但又無星味」、「場面尷尬有一半以上係黎自丁子朗」、「TVB究竟知唔知丁子朗真係幾無觀眾緣」、「大佬做乜要係咁捧丁子朗」、「做主持做到好似背稿咁」、「搵周奕瑋主持今晚頒獎典禮好過」及「入完超星團之後，下下出鏡都化到成個吸血疆屍咁」等等。

高海寧奪最佳女配角獲網民支持
「最佳女配角」競爭激烈，結果由入行15年嘅高海寧憑劇集《新聞女王》揮低同劇嘅何依婷、王敏奕、《隱形戰隊》劉穎鏇合《香港人在北京》傅嘉莉大熱奪得。除咗高海寧得獎時心情激動之外，網民們亦非常替佢高興，紛紛留言表示支持佢攞獎，例如「高ling 今次真係演得好嘅」、「實至名歸」、「高ling 算最好」、「高ling 攞服既」、「實至名歸，恭喜高Ling」、「高ling實至名歸嘅」及「真的看到她的進步 恭喜恭喜」等等。不過亦有部份網民認為傅嘉莉更值得拎「最佳女配角」，留言「傅嘉莉更加應該得獎 火雞姐 好驚喜」、「講做戲佢一定好過高ling」及「傅嘉莉有啲可惜 唔知有無機會再遇到好劇本加角色」等等。

《無窮之路III-無垠之疆》奪最佳資訊及專題節目惹不滿
「最佳資訊及專題節目」由陳貝兒主持嘅的《無窮之路Ⅲ——無垠之疆》大熱奪得，唔少網民都戥皇牌節目《東張西望》唔抵，認為《東張西望》更加值得拎呢個獎，留言話「陳貝兒嘔返個獎俾東張了」、「國家級節目喎 東張都要讓路啦」、「以為東張西望」、「搶咗東張嘅獎」、「東張西望幾值得攞」、「東張值得更多 真王牌節目」及「食左東張個獎仲好講, 報東張呀啦」等等。

陳豪佘詩曼奪視帝視后實至名歸
今屆視帝視后寶座終於揭盅，結果由陳豪憑《破毒強人》「毒王」文華一角再一次稱帝（上一次係2007年《溏心風暴》）；而佘詩曼就憑《新聞女王》「Man姐」文慧心一角，以大熱姿態奪得「最佳女主角」、「馬來西亞最喜愛TVB女主角」」及「大灣區最喜愛TVB女主角」，成為TVB史上首位三屆視后。結果出爐後，網民們都認為賽果合理，二人都係實至名歸，留言話「文華真心係做得好嘅」、「陳豪做文華做得好」、「nice 陳豪 is good」、「恭喜陳豪 再登視帝」、「陳豪個角色好難演，佢係成功咗，恭喜」、「Man姐一出，誰與爭鋒」、「恭喜亞佘，3屆3料視后」、「老實講 唔比佢比邊個 第二個攞都慚愧啦」、「恭喜Man姐 實至名歸！Tvb真的很難不給吖佘，畢竟很多人都是為了佘詩曼才看的～」、「無可能唔贏晒，根本屈機」及等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！