萬千星輝頒獎典禮2023｜紅地毯盛況回顧！何沛珈中門大開激性感 炎明熹再玩突破玩出事

《萬千星輝頒獎典禮2023》昨晚（14日）於澳門圓滿結束，各個獎項結果塵埃落定，劇集《新聞女王》全晚合共奪得8個獎成為大贏家。台上鬥得激烈，台下亦然，TVB花旦們互相爭妍鬥麗，就為大家回顧一下紅地毯盛況，睇吓今次又有邊個女藝人出現時裝車禍！

佘詩曼
佘詩曼憑劇集《新聞女王》文慧心（Man姐）一角成為三料視后，為全晚焦點之一。久未出席TVB頒獎典禮嘅佘詩曼於紅地毯環節壓軸登場，著上黑色Tube Top貼身晚裝，除咗胸前裝飾夠晒閃，身上亦有唔少鑽飾，造型優雅貴氣；而阿佘更孖住馬明奪得「最佳衣著男、女藝人」獎。

高海寧
高海寧入行15年憑劇集《新聞女王》許詩晴一角勇奪首個「最佳女配角」獎項，當晚以低胸平口晚裝出席，紫色絲綢質地相當亮眼及高貴，就咁睇前面好似無咩特別，但仔細一睇側身已經係鏤空設計露出纖腰，再一個轉身原來係大露背，非常性感。

李施嬅
李施嬅當晚帶病出席，著上白色及啡色拼接設計嘅露肩晚裝裙，仿似成晚披上披肩一樣，有種講唔出口嘅奇怪。

龔嘉欣
龔嘉欣以一身粉紫色閃片大露背晚裝孖住阮浩棕行紅地毯，配以簡約頸鏈及手鏈，清新奪目，不過龔嘉欣驟眼睇就圓潤咗唔少。

郭柏妍
郭柏妍一貫以往頒獎典禮作風，以淺粉色平口長傘裙造型出席，胸前帶有類似花瓣般嘅設計，配合黑色長直髮，係就係仙氣十足，但就無咩新鮮感，略為安全過頭。

劉佩玥
劉佩玥失住聲咁出席獎典禮，而佢嘅晚裝都令佢十足十病人一樣，驟眼睇激似包紮帶；而且前額無神神整兩條胎毛瀏海，認真失誤。

炎明熹
炎明熹呢期出席頒獎典禮嘅造型皆成熱話，今次炎明熹再度作出新嘗試又再成為焦點，大膽地以黑色性感內衣、白色長身襯衫配搭紅色半身裙及絲襪亮相，不過咁樣嘅搭配加埋件白色長身襯衫有陣去動漫節嘅Cosplay味，仲好似隻紅鶴。好彩佢之後就換返套黑色Bling Bling貼身晚裝，襯返個年紀。

劉穎鏇
奪得飛躍進步女藝員嘅劉穎鏇繼續大騷長腿，單肩和開衩晚裝盡顯好身形，不過背後長披設計加上寶藍色就令人聯想起Superwomen。

何依婷
成為人妻無耐嘅何依婷相當錫身，以長袖白色喱士晚裝亮相，僅露出香肩；紮上公主頭及配以蝴蝶結頭飾，散發陣陣仙氣。

何沛珈
「東張女神」何沛珈紅地毯打扮極性感，以「中門大開」黑色低胸貼身晚裝現身，遠睇仿似只得兩塊細布遮胸一樣，戰鬥力十足，何沛珈就形容自己係「型得嚟性感」。

古佩玲
古佩玲以灰色蛋糕傘裙出席，安全過關。不過，佢就真係要換一換個髮型，黑色瀏海感覺超級厚重。

游嘉欣
游嘉欣一向都係穩打穩陣派，今次都唔例外，淺色調Tude Dress打扮化身甜美乖乖女，不過如果可以加啲首飾點綴就更加好。

陳星妤
陳星妤著上白色開衩晚裝現身，腰部和腹部位置為鏤空設計，隱約露出胸邊，絕對係小心機打扮。不過，可能因為裙款材質太透，加埋現場燈光，令內裡三角褲現形，稍稍失手。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！