蔡思貝胡鴻鈞密會斷正 細數二人過往緋聞史

現年28歲嘅蔡思貝，喺2013年參選港姐奪得亞軍後入行，至今一直被無綫力捧上位。劇接劇拍不停嘅佢，每次拍劇都會同合作嘅男拍擋傳出緋聞。今日就有報道指蔡思貝暗撻29歲嘅胡鴻鈞（Hubert），佢哋喺節目《降魔的捉妖遊戲》時開始熟落，仲話佢哋喺10日內密會3次，每次都約喺唔同地方，被傳媒撞破時二人顯得不知所措，問到係唔係拍拖，胡鴻鈞就衝口而出回答係，不過其後佢哋就否認拍拖。而家就同大家重溫佢哋嘅緋聞啦！

喺入行初期，蔡思貝就被爆出與排舞師麥秋成暗撻，佢哋雖然多次被拍到出雙入對，仲被指已經發展去到同居關係，不過佢哋一直否認戀情。直至2016年，麥秋成突然喺社交網站暗示分手。

蔡思貝同洪永城因合作拍攝劇集《味想天開》而傳緋聞，當時已經有傳佢哋戲外曖昧，洪永城更做「柴可夫司機」接載蔡思貝。喺2017年，佢哋再因劇集《大帥哥》而再次合作，當時有報道喺拍攝外景時蔡思貝單獨走入洪永城房間，而蔡思貝亦被指係唐詩詠同洪永城分手嘅導火線，之後蔡思貝否認，而洪永城亦指分手嘅原因不涉及第三者。

蔡思貝與周志文因拍攝劇集《衝線》而傳出緋聞，有報道就話佢地去台灣拍外景嘅時候，佢哋除咗表演親暱之外，蔡思貝仲主動上男方酒店房過夜。之後佢哋被傳媒影到相約睇戲，及喺周志文家中出入，不過事後周志文就解釋當時屋企仲有其他藝員一齊Jam歌。

有指蔡思貝喺拍攝劇集《衝線》期間，主動向羅仲謙攞電話約食飯，仲試過幫羅仲謙扣皮帶，搞到楊怡都要去廠睇實。

喺拍攝劇集《踩過界》嘅時候，有指佢哋單獨喺火鍋店貴賓房打邊爐，之後仲傳出王浩信去蔡思貝香閨短敍兩小時。當時王浩信更傳出與陳自瑤婚變，之後王浩信仲同陳自瑤一齊出席活動，期間陳自瑤指老公冇出軌。

余德丞（Dickson）同蔡思貝喺上年拍攝旅行節目《緬甸奇幻旅程》，全程佢哋對足12日，仲傳出佢哋因而成為好友，再發展成為情侶關係。上年8月，余德丞踢波昏迷留醫ICU，蔡思貝都有去醫院探望。不過今年余德丞與周秀娜（Chrissie）傳譜出姊弟戀，睇嚟佢同蔡思貝嘅緋聞係時候劃上句號。

同蔡思貝傳緋聞嘅男星仲有李思捷、崔建邦、鄭俊弘、溫家偉及沈震軒等等。

相比起蔡思貝，胡鴻鈞（Hubert）就少好多緋聞，不過佢嘅緋聞對象就係「男女通殺」。

入行多年二人嘅性取向一直成疑，更被傳緋聞多年，好似前年情人節許廷鏗（Alfred）不避嫌咁上載兩人合照，之後又被傳媒影到胡鴻鈞買宵夜去Alfred屋企過夜。去到上年農曆新年，佢哋不約而同去咗冰島睇極光，雖然Alfred話唔係一齊去，不過同一時間，同一地點，唔係一齊去都冇人信啦。

有傳喺2013年胡鴻鈞力追Super Girl成員Heidi（李靜儀），除咗為對方搞生日party之外，佢仲使出短訊攻勢冧Heidi。胡鴻鈞更不避嫌大讚Heidi係好女仔又勤力。

除咗許廷鏗同Heidi之外，胡鴻鈞嘅緋聞對象仲有鍾欣潼（阿嬌）、林欣彤、吳若希（Jinny）及張敬軒等等。