[衝擊視覺]《八時入席》黎耀祥壁咚毛舜筠 網民：個心離一離

打工仔每日工作忙碌，好多人返到屋企都係想開著電視同屋企人食晚飯輕鬆一下。原本一路食飯一路睇《愛‧回家之八時入席》都係唔錯嘅選擇，因為貪佢單元形式，就算睇少一集都唔會唔明，輕輕鬆鬆半粒鐘，不過噚晚嗰集到臨完結嘅時候就上演一幕黎耀祥壁咚加咀咀毛舜筠嘅戲碼，可能嚟得太突然，嚇親唔少觀眾。

呢條感情線拖咗咁耐，去到噚晚第161集終於有新發展，劇情講到邦主（黎耀祥飾演）去咗台灣出差，期間除咗林小小（毛舜筠飾演）嘅短訊之外，每個人嘅短訊都會回覆。後尾發現原來邦主喺台灣失職，要返香港補拍返啲戲，仲搞到林小小要取消放假配合佢。林小小當然好不滿啦，佢就去咗邦主屋企搵佢對質。向來事業心重嘅邦主就責怪到佢神不守舍，為咗去搵林小小有份做臨記嘅電影碟而miss咗班飛機搞到去唔到拍攝。之後，重口味戲碼就出現啦，邦主壁咚加咀咀林小小。

呢個咁衝擊視覺嘅畫面，唔少網民睇完都話重口味、無晒胃口、毛管戙、嚇到大叫兼個心離一離。

不過當然，亦有部份網民覺得佢哋好sweet既。