鄧麗欣開個唱親證吳雨霏楊愛瑾冰釋前嫌 當年傳反目原因係咁？

鄧麗欣Stephy相隔16年後再次舉行個唱，唔少圈中人捧場，包括喺劇集《男排女將》飾演受Stephy指導嘅MIRROR「球員」盧瀚霆Anson Lo、呂爵安Edan及李駿傑Jeremy。出身女團Cookies嘅Stephy向來同各隊友關係唔錯，除咗不嬲唔多埋堆嘅傅穎(Theresa)、身在外國嘅Serena同Helena之外，6位「餅碎」齊人現身。

Stephy再上台獻唱係焦點之外，曾經被傳不和嘅吳雨霏Kary同楊愛瑾Miki同場現身，影合照一齊企，連睇show都一齊坐。有記者完show後問返Stephy 2位好友係咪破冰，Stephy 都話Kary同Miki無問題，私底下有見面，似乎已冰釋前嫌。

當年Cookies由9個變4個，得返鄧麗欣、傅穎、吳雨霏同楊愛瑾有得留低，之後亦係得佢地以獨立身份於幕前發展。以唱功取勝嘅Kary 2015年喺事業高峰之際，宣布同拍拖多年嘅男友Brian(洪立熙）結婚，翌年底在社交媒體透露年初時曾小產。當時有傳Kary只係將小產消息同姊妹分享，但後來竟然被外界得知，而Kary就將IG上有Miki份嘅合照刪走，仲取消埋關注，令Miki被指係爆料人。Kary回應時話「做朋友要講緣份」，似有弦外之音；至於Miki就話「冇做嘅事唔回應」。到2018年2月，Kary宣布再次懷孕，但今次就非常口密，以免再被好友出賣。

自此之後，即使「餅碎」有聚會，合照中總係會冇咗Miki或者Kary是但一個。2021年，Cookies成員之一Gloria（陳素瑩）嘅婚宴上，Kary 同Miki被指同場但分枱坐，同一對新人嘅合照當然更加冇可能有齊Miki同Kary。Gloria之後要主動解畫兼post相，強調2位姊妹係同枱嘅，並且為二人道歉。當時Miki都有回應話「心裡無數委屈，卻說不出口」。

即使去到上個月，吳雨霏同楊愛瑾同一日分別去主題樂園試玩，都有報導話未見二人有交流式碰面。咁可能真係多得Stephy開show，先至令2位姊妹和好。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！