鄭欣宜復出有新進展 將為迪士尼動畫《星願奇緣》女主角配音
鄭欣宜今年初舉行紅館演唱會後突然神隱,經理人林姍姍向外界表示欣宜病咗,未有透露幾時會再次現身。欣宜好友許廷鏗早前推出新歌《一場同學》,就搵咗欣宜做佢嘅新歌MV女主角,又話欣宜嘅演出可以當係報平安。
神隱一輪後,鄭欣宜再有新工作。尋日迪士尼電影facebook專頁發放片段,介紹動畫電影《星願奇緣》香港版配音陣容。2位負責配音嘅藝人都遮樣示人,但一開聲都相當易認。為女主角Asha配音嘅,聲線同欣宜相當相似;而另一位為山羊仔華倫天奴配音嘅男聲,雖然壓低把聲,但迪士尼facebook所俾嘅提示係「個名都有個『華』字」,好大機會係ERROR嘅何啟華(阿Dee)。
而電影公司今日亦為2位人選揭盅,一如所料係欣宜同阿Dee。片段中欣宜精神唔錯,同早前拍《一場同學》MV嘅狀態差唔多。
今日商台公布欣宜打入叱咤我最喜愛的女歌手7強,假如Joyce真係殺入5強甚至攞埋獎,會唔會就係欣宜正式歸位之時?
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!