《開心速遞》繼續玩嘢本色 今次輪到豹哥自抽侯賽因：「想偷我雞？」

無綫處境劇《愛·回家之開心速遞》劇情搞笑又創新，一直大受觀眾歡迎，收視及口碑都好多唔少大製作劇集。最近仲大玩二次創作，重現唔少經典電影及電視場面，好似熊心如及池子考版《LaLaLand》、KC及Terry版《大叔的愛》同埋大小姐及送水輝版《天若有情》等等，獲得網民都一致好評。喺噚晚劇集繼續發揮玩嘢本色，連單立文（豹哥）都要自抽自己喺電影《賭俠》飾演嘅反派角色侯賽因。

噚晚第409集劇情就講到初戀cafe老闆佳叔（鍾志光飾）舉辦「接龍麻雀王大賽」，吸引咗唔少接龍集團員工參加，當然唔少得尋寶圖嘅員工啦！大龍生（羅樂林飾）有意帶「接龍麻雀王大賽」冠軍嘅男同事去北京傾生意，大小姐（林淑敏飾）好不滿老豆大龍生覺得男士打麻雀會稍勝一籌。本身諗住報名參加，用實力證明俾大龍生睇，不過報名期已過，佢唯有急召參加嘅女同事進行特訓。去到比賽日，熊若水（呂慧儀飾）不負所託成功躋身4強。

豹哥飾演嘅熊樹仁都有參加「接龍麻雀王大賽」，佢著住同《賭俠》侯賽因幾乎一模一樣嘅白色禮服，仲要講埋經典對白「想偷我雞？」。熊樹仁仲話唔知點解著住呢套衫就好想講「想偷我雞？」呢句說話。之後龔燁問佢點解要著到咁打牌，佢就話呢套衫旺佢，喺二十幾年前佢上賭船出公海採訪，因為著呢套衫所以贏咗百幾蚊。之後佢覺得因為呢套衫令佢喺比賽中食到「大三元」。

唔少網民睇完之後都紛紛留言：「笑死，自抽」、「件衫都似先好笑」、「完全係童年回憶」、「侯賽因係今集亮點」及「今集侯賽因出嚟搞笑到夠晒，好耐冇聽過想偷我雞」等等。