開show前2日入境申請未批 鄭中基加拿大個唱延期「好難過好無奈」

鄭中基原定於本周末展開世界巡迴演唱會加拿大站演出，但係Ronald尋晚突然宣布，「由於本人的加拿大入境申請一直處於審查中，經多方努力後仍未能如期出發，現只能帶著無奈的心情，與主辦單位一致決定演唱會延期」。

原本Ronald喺當地時間28日（星期六）及31日（下周二）分別喺溫哥華及多倫多開show，而家要取消，佢表示「好難過、好無奈、甚至生氣，因為我同團隊、主辦大家都努力咗好耐，而觀眾亦都期待咗好耐，我好想好想可以做得到，真係好對唔住！」。鄭中基又話「希望eTA一批到我就盡快同主辦reschedule過2場show，再同大家見面」。

由於鄭中基提到eTA（Electronic Travel Authorization電子旅客許可文件），令大家對於「大佬」未獲批准入境加拿大議論紛紛，因為一般情況下，旅客申請完好快就批出，好少人會被拒。有網民估計Ronald其實係咪申請工作簽證出問題，亦有人懷疑多年前鄭中基喺航機上醉酒鬧事係咪有影響。鄭中基曾經喺美國留學，有人提出美國公民可以由加美陸路口岸入境而毋須簽證。

今次演出延期，有美國fans十分失望，因為佢係專程請假，原本打算由東岸芝加哥飛去西雅圖再揸車上溫哥華睇show，而家改期可能冇機會睇到喇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！