《降魔的》大派洋蔥感動觀眾 網民推趙永洪何遠東攞最佳男配角

台慶劇《降魔的》深受觀眾歡迎，贏盡口碑。劇集今個星期進入結局篇後，劇情越嚟越感人，差唔多晚晚都大派洋蔥感動觀眾。繼小馬（馬國明飾）同已死嘅親生父母（金剛及小儀飾）相認後，近兩晚講到些粉（趙永洪飾）坐龍貓（何遠東飾）順風車，途中因為要落車捉精靈，而令龍貓意外被壓車內死亡。

噚晚講到些粉為龍貓嘅死而自責，認為係自己害死龍貓，如果唔係自己嘅話，佢根本唔會死，搞到喺醫院亦唔敢見佢最後一面。

小馬幫助龍貓靈魂出現，當佢知道自己已經死咗嘅時候表現得好激動，喊到對眼紅曬。之後龍貓報夢俾老婆交代身後事，仲叫老婆遇到岩嘅人就要改嫁，但佢老婆決定終身不嫁。二人成場戲都眼濕濕，睇到好心酸。

而一直都好自責害死龍貓嘅些粉差啲撞車，佢覺得係龍貓又救佢一命，佢決定代龍貓做個好人。雖然些粉見唔到龍貓喺身邊，但其實龍貓一直係佢身邊同佢隔空對話，場面感人。

之後一班的士司機一齊睇龍貓早前嘅電視訪問，大家有講有笑講龍貓嘅過去，睇得出每一個都好掛住龍貓，而小馬同在旁聽嘅龍貓一直強忍淚水。

劇中些粉同龍貓真係演技大爆發、超水準，網民一致推舉佢地做今年最佳男配角。